އީރާނާއެކު ވެވޭ ނިއުކްލިއަރ އެއްބަސްވުން ރަސްމީކޮށް މުރާޖައާކުރުމަށް އެމެރިކާގެ ކޮންގްރެސްއަށް ހުށަހަޅުއްވާނެ ކަމަށް އެމެރިކާގެ އެމެރިކާގެ ރައީސް ޑޮނަލްޑް ޓްރަމްޕް، ވިދާޅުވެއްޖެއެވެ.

ޓްރަމްޕް މިކަން އާންމުކުރެއްވީ ފަރަންސޭސިވިލާތުގެ އޭވިއަން-ލޭ-ބޭންގައި މިހާރު ކުރިއަށްދާ ޖީ7 ސަމިޓުގެ ހަވާސާގައި، އެކުވެރި އަރަބި އިމާރާތް (ޔުނައިޓެޑް އަރަބް އެމިރޭޓްސް - ޔޫއޭއީ) ގެ ރައީސް ޝައިހް މުހައްމަދު ބިން ޒާއިދު އާލް ނަހްޔާންއާ އެކު ބޭއްވެވި ބައްދަލުކުރެއްވުމެއްގައެވެ.

ޓްރަމްޕް ވިދާޅުވި ގޮތުގައި، އީރާނުން ދުވަހަކުވެސް ނިއުކްލިއަރ ހަތިޔާރު ނުހަދާނެކަން ކަށަވަރުކުރުމަށް ވެވޭ މި އެއްބަސްވުން ކޮންގްރެސްއަށް ފޮނުވުމަކީ ތާއީދުކުރައްވާ ކަމެކެވެ. އެއްބަސްވުމުގެ ދެވަނަ މަރުހަލާގެ މަޝްވަރާތައް ވަރަށް އަވަހަށް ކުރިއަށްދާނެ ކަމަށް އުއްމީދުކުރައްވާ ކަމަށްވެސް ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވިއެވެ.

އީރާނާއެކު ވެވޭ އެއްބަސްވުމުގެ ތަފުސީލުތައް އަދި ހާމަކޮށްފައި ނުވާއިރު، އެމެރިކާގެ ގާނޫނުހަދާ މަޖިލީހުގެ މެންބަރުން އަންނަނީ މިކަމާ މެދު ކަންބޮޑުވުން ފާޅުކުރައްވަމުންނެވެ.

ރިޕަބްލިކަން ޕާޓީގެ ސެނެޓަރު ލިންޑްސީ ގްރަހަމް ފާހަގަކުރެއްވި ގޮތުގައި، އެމެރިކާގެ ގާނޫނުތައް ބުނާ ގޮތުން އީރާނާއެކު ވެވޭ ކޮންމެ ނިއުކްލިއަރ އެއްބަސްވުމެއްވެސް މުރާޖައާކޮށް ވޯޓަށް އެހުމަށް ކޮންގްރެސްއަށް ފޮނުވަން ޖެހޭނެއެވެ. ކޮންގްރެސްގެ ރުހުން ހޯދުމަކީ އެމެރިކާގެ ހާރިޖީ ސިޔާސަތު ތަންފީޒުކުރުމުގައި މުހިންމު ދައުރެއް އަދާކުރާނެ ކަމެއްކަން ހަބަރުތަކުގައި ވަނީ ފާހަގަ ކޮށްފައެވެ. ސަބަބަކީ، ކޮންގްރެސްގެ ބައިވެރިވުމާއެކު ފާސްކުރާ އެއްބަސްވުންތަކަކީ ދިގު މުއްދަތަކަށް ދެމިއޮންނާނެ އެއްބަސްވުންތަކަކަށް ވުމެވެ.

މި އެއްބަސްވުމުގެ ދަށުން ހޮރުމުޒް ކަނޑުއޮޅި ހުޅުވާލުމާއި، ދަތިކުރުމުގެ ފިޔަވަޅުތަކަށް ލުއިދިނުމާ ގުޅޭގޮތުން ކުރިއަށް އޮތް 60 ދުވަހުގެ ތެރޭގައި އިތުރު މަޝްވަރާތައް ކުރިއަށްދާނެ ކަމަށް ރިޕޯޓުތައް ބުނެއެވެ. ޓްރަމްޕްގެ ސަރުކާރުން މި އެއްބަސްވުން ދިފާއުކުރަމުން އަންނައިރު، ގާނޫނުހަދާ މަޖިލީހުގެ މެންބަރުން ބޭނުންވަނީ އެއްބަސްވުމުގެ ސަބަބުން އެމެރިކާއަށް ލިބޭނެ ފައިދާތައް ކަށަވަރުކުރުމަށެވެ. ޖީ7 ސަމިޓުގައި ބައިވެރިވެވަޑައިގަންނަވާ އެހެން ގައުމުތަކުގެ ލީޑަރުންވެސް ވަނީ މެދުއިރުމަތީގެ ސަލާމަތާއި ރައްކާތެރިކަން ކަށަވަރުކުރުމަށް މި އެއްބަސްވުމުގެ މުހިންމުކަން ފާހަގަކުރައްވާފައެވެ.