އިނގިރޭސިވިލާތުގެ ސައުތެމްޓަންގައި ފުލުހުންގެ ބެލުމުގެ ދަށުގައި ހުއްޓައި 18 އަހަރުގެ ހެންރީ ނޯވަކް މަރުވި މައްސަލައިގައި ފުލުހުން އަމަލު ކުރި ގޮތާމެދު އާންމުން ނުރުހުން ފާޅުކޮށް، އެ ގައުމުގައި މުޒާހަރާކުރަން ފަށައިފިއެވެ.

މިދިޔަ ޑިސެމްބަރު މަހު ހިނގި މި ހާދިސާގައި ނޯވަކް މަރުވީ 23 އަހަރުގެ ވިކްރަމް ޑިގްވާ، އޭނާގެ ގަޔަށް ވަޅިޖެހުމަށްފަހު، ނޯވަކް އޭނާއަށް ނަސްލީ ގޮތުން ފުރައްސާރަ ކުރި ކަމަށް ފުލުހުން ގާތު ދޮގު ހެދުމުންނެވެ.

ފުލުހުންގެ ބޮޑީކޭމް ވީޑިއޯއިން ފެންނަ ގޮތުގައި، ނޯވަކްގެ ގަޔަށް ވަޅިޖަހާފައިވާ ކަމަށާއި ނޭވާނުލެވޭ ކަމަށް އޭނާ ތަކުރާރުކޮށް ބުނަމުންދިޔަ ނަމަވެސް، ފުލުހުން ވަނީ އޭނާގެ އަތުގައި ބިޑި އަޅުވައިފައެވެ.

މި ވީޑިއޯ އާންމުވުމާ ގުޅިގެން ސައުތެމްޓަންގެ ފުލުހުންގެ މަރުކަޒު ކައިރިއަށް އެއްވި މީހުންނާއި ފުލުހުންނާ ދެމެދު ހިނގި ކުރިމަތިލުންތަކުގައި 11 ފުލުހަކަށް އަނިޔާވެ، ދެ މީހަކު ވަނީ ހައްޔަރުކޮށްފައެވެ.

ކަނާތުފިޔައިގެ ހަރުކަށި ފިކުރުގެ ސިޔާސީ ފަރާތްތަކުން އަންނަނީ މި ހާދިސާއަކީ އިނގިރޭސި ފުލުހުން، ދޮން ނަސްލުގެ މީހުންނާ މެދު ތަފާތުކުރުން ގެންގުޅޭ ކަމުގެ ހެއްކެއް ކަމަށް ބުނެ، އާންމުންގެ މެދުގައި ރުޅިވެރިކަން އުފެއްދުމަށް މަސައްކަތް ކުރަމުންނެވެ.

ނަމަވެސް، އިނގިރޭސި ބޮޑުވަޒީރު ކިއާ ސްޓާމަރު ވަނީ ފުލުހުން ނަސްލީ ތަފާތުކުރުން ގެންގުޅޭ ކަމަށް ކުރެވޭ ތުހުމަތުތައް ދޮގުކުރައްވައިފައެވެ. ބޮޑުވަޒީރުގެ ތަރުޖަމާނު ވިދާޅުވި ގޮތުގައި، ފުލުހުން އަމަލު ކުރަން ޖެހޭނީ ވަކި ފަރާތަކަށް ނުޖެހި، ހަމަހަމަ ކަމާއެކުގައެވެ. އަދި ހަރުކަށި ފިކުރުގެ ފަރާތްތަކުން މި ހާދިސާގެ ބޭނުން ހިފައިގެން މުޖުތަމައު ބައިބައިކުރަން މަސައްކަތްކުރާ ކަމަށް ސަރުކާރުން ވަނީ ތުހުމަތުކޮށްފައެވެ.

ނޯވަކްގެ ބައްޕަ މާކް ނޯވަކް ބުނި ގޮތުގައި، ފުލުހުން އޭނާގެ ދަރިފުޅާ މެދު އަމަލު ކުރީ ވަރަށް އިހާނެތިކޮށެވެ. އެހެންނަމަވެސް، މި ހިތާމަވެރި ހާދިސާގެ ބޭނުން ހިފައިގެން މުޖުތަމައުގައި ނަފުރަތާއި ބައިބައިވުން ނުއުފެއްދުމަށް އޭނާ ވަނީ އާންމުންގެ ކިބައިން އެދިފައެވެ.

މި މައްސަލައިގައި ނޯވަކް މަރާލި ޑިގްވާގެ މައްޗަށް ކުށް ސާބިތުވެ، އޭނާ ވަނީ އުމުރަށް ޖަލަށްލުމަށް ހުކުމްކޮށްފައެވެ. އަދި ފުލުހުން އަމަލު ކުރި ގޮތުގެ މައްސަލަ އިނގިރޭސިވިލާތުގެ އިންޑިޕެންޑެންޓް އޮފީސް ފޯ ޕޮލިސް ކޮންޑަކްޓް (އައިއޯޕީސީ) އިން މިހާރު އަންނަނީ ތަހުގީގު ކުރަމުންނެވެ.