ބޮލީވުޑްގެ މަޝްހޫރު އެކްޓަރު ވަރުން ދަވަންގެ ހުއްދަޔަކާ ނުލައި އޭނާގެ ނަމާއި، ސޫރައާއި، އަޑު ވިޔަފާރީގެ ބޭނުމަށް ބޭނުންކުރުން މަނާކުރުމަށް އެދި ދިއްލީ ހައިކޯޓަށް ހުށަހެޅި މައްސަލައިގައި، އޭނާގެ ޝަހުސިއްޔަތުގެ ހައްގުތައް ހިމާޔަތްކުރުމަށް ވަގުތީ އަމުރެއް ނެރުމަށް އެ ކޯޓުން ނިންމައިފިއެވެ.

މި މައްސަލަ ބައްލަވާ ފަނޑިޔާރު ޖަސްޓިސް ޖިޔޯތީ ސިންގް ވިދާޅުވި ގޮތުގައި، ވަރުން ދަވަންގެ ސޫރަ ބޭނުންކޮށްގެން ހަދާފައިވާ ޑީޕްފޭކް ވީޑިއޯތަކާއި، ބަރަހަނާ މަންޒަރުތަކާއި، އަދި ހުއްދަނެތި ވިއްކާ މުދާ އިންޓަނެޓުން ނެގުމަށް އަމުރުކުރައްވާނެއެވެ. އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، ވަރުން ދަވަންގެ ފަރާތުން ކޯޓުގައި ވަކާލާތުކުރި ސީނިއަރ އެޑްވޮކޭޓް ސަންދީޕް ސޭތީ ވަނީ، އޭނާގެ މުވައްކިލުގެ ހައްގުތަކަށް އުނިކަން އަންނަ ގޮތަށް އާންމުކޮށްފައިވާ ގިނަ ލިންކުތަކެއް ކޯޓަށް ހުށަހަޅާފައެވެ. އެ ލިންކުތަކުގެ ތަފުސީލުތައް ކޯޓަށް ހުށަހެޅުމަށް ފަނޑިޔާރު ވަނީ އަންގަވައިފައެވެ.

މި މައްސަލައަކީ އާޓިފިޝަލް އިންޓެލިޖެންސް (އޭއައި) އާއި ޑީޕްފޭކް ޓެކްނޮލޮޖީގެ ސަބަބުން މަޝްހޫރު ފަރާތްތަކުގެ އައިޑެންޓިޓީ ނަހަމަ ގޮތުގައި ބޭނުންކުރުން އިތުރުވަމުންދާ ދަނޑިވަޅެއްގައި ފެންމަތިވި މައްސަލައެކެވެ. މީގެ ކުރިން އަމީތާބް ބައްޗަން، ސަލްމާން ހާން، އަދި އައިޝްވާރިޔާ ރާއީ ފަދަ ތަރިންވެސް ވަނީ އެމީހުންގެ ޝަހުސިއްޔަތުގެ ހައްގުތައް ހިމާޔަތްކުރުމަށް ކޯޓަށް ގޮސްފައެވެ.

ގާނޫނީ ތަޖުރިބާކާރުން ފާހަގަކުރާ ގޮތުގައި، ޑިޖިޓަލް ޒަމާނުގައި މީހުންގެ އައިޑެންޓިޓީ ކޮޕީކުރުން ފަސޭހަވެފައިވާއިރު، ވިޔަފާރީގެ ފައިދާއަށް މީހުންގެ ނަން ބޭނުންކުރުން ހުއްޓުވުމަށް މިފަދަ ގާނޫނީ ރައްކާތެރިކަން ވަރަށް މުހިންމެވެ.