މިދިޔަ ޖެނުއަރީ މަހު ބޭއްވި އޯލެވެލް އިމްތިހާނުގެ ނަތީޖާ މިއަދު ދޫކުރަން ފަށާނެ ކަމަށް ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) އިން ބުނެފިއެވެ.

ޑީޕީއީން ބުނީ އެސްއެސްސީ އަދި ކެމްބްރިޖް އައިޖީސީއެސްއީ އޯލެވެލް އިމްތިހާނުގެ ނަތީޖާ މިއަދު މެންދުރު 12:00 އިން ފެށިގެން ލިބޭނެ ކަމަށެވެ.

އެގޮތުން އަމިއްލަ ގޮތުން އިމްތިހާނުގައި ބައިވެރިވި ކެންޑިޑޭޓުންގެ ނަތީޖާ ދޫކުރާނީ އައިޑީކާޑު ގެންދިއުމުން ކަމަށާއި ބަދަލުގައި މީހަކު ފޮނުވާ ނަމަ، ދަރިވަރުގެ އައިޑީކާޑާއި ހަވާލުވާ މީހާގެ އައިޑީކާޑު ގެންދަން ޖެހޭނެ ކަމަށް ވެސް ޑީޕީއީން ބުންޏެވެ.

މިދިޔަ ޖެނުއަރީ މަހު ބޭއްވި އެސްއެސްސީ އަދި ކެމްބްރިޖް އައިޖީސީއެސްއީ އޯލެވެލް އިމްތިހާނުގައި 267 ސެންޓަރަކުން 8،218 ދަރިވަރުން ބައިވެރިވިއެވެ. އެއީ ރަށްރަށުގެ 246 ސެންޓަރަކާއި މާލޭގެ 21 ސެންޓަރެއްގައެވެ.

މި އަހަރު ގްރޭޑު ދިހައެއް ނިންމާ ދަރިވަރުންގެ އޯލެވެލް އިމްތިހާނު ފަށާނީ އޮކްޓޫބަރު މަހުގެ ތެރޭގައެވެ.