އީރާނުން ހޮރްމޫޒް ކަނޑުއޮޅި ވިޔަފާރި ބޯޓުފަހަރަށް ހުޅުވާލައިފިއެވެ.

އީރާނުން ހޮރްމޫޒް ކަނޑުއޮޅި ހުޅުވާލުމަށް ނިންމާފައިވަނީ އިސްރާއީލާއި ލުބުނާނާ ދެމެދު ވެވުނު ހަމަލާ ބަދަލުކުރުން ހުއްޓާލުމުގެ އެއްބަސްވުމާ ގުޅިގެންނެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވި ގޮތުގައި، އެ ނިންމުމަކީ ލުބުނާނުގައި ގާއިމުކުރެވުނު ސުލްހައިގެ މުއްދަތާ ގުޅިފައިވާ ނިންމުމެކެވެ.

އީރާނުން ހޮރްމޫޒް ކަނޑުއޮޅި ހުޅުވާލާފައިވަނީ އިސްރާއީލާއި ލުބުނާނުގެ ހިޒްބުﷲ އާ ދެމެދު އެއްބަސްވެވުނު ދިހަ ދުވަހުގެ ހަމަލާ ބަދަލުކުރުން ހުއްޓާލުމުގެ އެއްބަސްވުމަށް އިހުތިރާމުކުރުމުގެ ގޮތުންނެވެ.

އީރާނުގެ ފޮރިން މިނިސްޓަރު ވިދާޅުވި ގޮތުގައި، އެ ކަނޑުއޮޅި ހުޅުވިފައި ހުންނާނީ ލުބުނާނުގެ ހަމަލާ ބަދަލުކުރުން ހުއްޓާލުމުގެ އެއްބަސްވުމުގެ ބާކީ އޮތް މުއްދަތަށެވެ. އަދި ބޯޓުފަހަރު ދަތުރުކުރަންޖެހޭނީ އީރާނުގެ ކަމާބެހޭ އިދާރާތަކުން ކުރިން ކަނޑައަޅާފައިވާ ވަކި ހާއްސަ މަގަކުން ކަމަށްވެސް ވިދާޅުވިއެވެ.

އީރާނުގެ އެ ނިންމުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ މަރުހަބާ ވިދާޅުވެފައެވެ. ނަމަވެސް، ޓްރަމްޕް ވިދާޅުވީ އީރާނާއެކު އެމެރިކާއިން ކުރާ މުއާމަލާތްތައް 100 އިންސައްތަ ފުރިހަމަވަންދެން، އީރާނުގެ ބަނދަރުތަކަށާއި އީރާނުގެ ބޯޓުފަހަރަށް އެމެރިކާއިން އަޅާފައިވާ ކަނޑުގެ ދަތިކުރުމުގެ ފިޔަވަޅުތައް ދެމިއޮންނާނެ ކަމަށެވެ.

ހޮރްމޫޒް ކަނޑުއޮޅި ހުޅުވާލުމާއެކު، ދުނިޔޭގެ ބާޒާރުގައި ތެލުގެ އަގު ވަނީ ގާތްގަނޑަކަށް ދިހަ އިންސައްތަ ދަށަށް ގޮސްފައެވެ.