ރައީސް ޑރ. މުހައްމަދު މުއިއްޒު، މިނިސްޓާ އޮފް ޑިފެންސް އެންޑް ނޭޝަނަލް ސާވިސްގެ މަގާމަށް، ހަސަން ރަޝީދު މިއަދު އައްޔަންކުރައްވައިފިއެވެ.

ރައީސް އޮފީހުން މިރޭ ބުނީ ހަސަން ރަޝީދަށް މަގާމުގެ ފަތްކޮޅު ހަވާލުކުރުމުގެ ރަސްމިއްޔާތު ބާއްވާފައިވަނީ މިރޭ އިރާކޮޅުގެ ވަގުތެއްގައި ކަމަށެވެ.

އެ ރަސްމިއްޔާތުގައި ވަޒީރުންގެ މަޖިލީހުގެ މެންބަރުކަމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމްކަމަށް ރައީސް އޮފީހުން ބުންޏެވެ.

ހަސަން ރަޝީދުވަނީ މަގާމުގެ ހުވައި ކުރެއްވުމަށްފަހު، ވަޒީރުންގެ މަޖިލީހުގެ މެންބަރުންގެ ހުވައިގެ އިގުރާރުގައި ސޮއިކުރައްވާފައިކަމަށް ރައީސް އޮފީހުން ބުންޏެވެ.

ޑިފެންސް މިނިސްޓަރުގެ މަގާމަށް ހަސަން ރަޝީދު އައްޔަންކުރައްވާފައިމިވަނީ އެ މަގާމުގައި ކުރިން ހުންނެވި ގައްސާން މައުމޫން އެ މަގާމުން އިއްޔެ އިސްތިއުފާދެއްވުމާ ގުޅިގެންނެވެ.