ޒިންމާދާރު އަދި ހުނަރުވެރި ޒުވާން ޖީލެއް ބިނާކުރުމަށް ސަރުކާރުން ފަށާފައިވާ "ނޭޝަނަލް ސާވިސް ސްކިލްސް ޓްރެއިނިން ޕްރޮގްރާމް" ނުވަތަ ވަތަނީ ހިދުމަތުގެ ފަންނީ ތަމްރީނުގެ ދެވަނަ ބެޗު ފުރިހަމަކޮށް، 73 ދަރިވަރަކު މިއަދު ދަސްވެނިވެއްޖެއެވެ.

ބ. ކިހާދޫގައި ހުންނަ އެމްއެންޑީއެފް ސްކޫލް އޮފް އިންޖިނިއަރިން އެންޑް ލޮޖިސްޓިކްސްގައި މިއަދު ހެނދުނު ބޭއްވި މި ރަސްމިއްޔާތު ޝަރަފުވެރިކޮށްދެއްވީ ދިފާއީ އަދި ވަތަނީ ހިދުމަތާ ބެހޭ ވަޒީރު ހަސަން ރަޝީދެވެ.

3 އޮކްޓޯބަރު 2026، ވަތަނީ ހިދުމަތުގެ ފަންނީ ތަމްރީނުގެ ދެވަނަ ބެޗު ފުރިހަމަކޮށް، 73 ދަރިވަރަކު ދަސްވެނިވުން -- ފޮޓޯ/ ޑިފެންސް މިނިސްޓްރީ

މިދިޔަ ޖޫން މަހުގެ ތިންވަނަ ދުވަހު 77 ދަރިވަރުންނާއެކު ފެށި މި ތަމްރީނު ޕްރޮގްރާމް ފުރިހަމަކޮށް މިއަދު ދަސްވެނިވީ 60 ފިރިހެން ދަރިވަރުންނާއި 13 އަންހެން ދަރިވަރުންނެވެ. މިއީ ރާއްޖޭގެ 16 އަތޮޅެއްގެ 45 ރަށަކަށް ނިސްބަތްވާ ދަރިވަރުންނެވެ. އުމުރުފުރާއަށް ބަލާއިރު، ދަސްވެނިވި ދަރިވަރުންގެ ތެރޭގައި އެންމެ ގިނައީ 17 އަހަރާއި 18 އަހަރުގެ ޒުވާނުންނެވެ. އެގޮތުން 17 އަހަރުގެ 41 ދަރިވަރުންނާއި 18 އަހަރުގެ 30 ދަރިވަރުން ހިމެނެއެވެ.

ޖުމުލަ 16 ހަފުތާގެ މުއްދަތަށް ކުރިއަށްގެންދިޔަ މި ތަމްރީނު ޕްރޮގްރާމަކީ ނޭޝަނަލް ސާވިސް އިނީޝަލް ޓްރޭނިން ފުރިހަމަކުރާ ދަރިވަރުންނަށް އަމާޒުކޮށްގެން ހިންގާ ޕްރޮގްރާމެކެވެ. މި ޕްރޮގްރާމުގެ ތެރެއިން ސެޓްފިކެޓް ލެވެލް 3 ގެ ހަ ކޯހެއް ކުރިއަށް ގެންގޮސްފައިވެއެވެ.

މިއަދު ދަސްވެނިވި 73 ދަރިވަރުންގެ ތެރެއިން 66 ދަރިވަރަކު ވަނީ ސެޓްފިކެޓް ލެވެލް 3 ގެ ސަނަދު ހާސިލުކޮށްފައެވެ. އޭގެ ތެރޭގައި ހިމެނެނީ މެރިން އިންޖިނިއަރިން ފުރިހަމަކުރި 15 ދަރިވަރުންނާއި، އޮޓޯމޯބައިލް އިންޖިނިއަރިން ފުރިހަމަކުރި 14 ދަރިވަރުންނާއި، ރެފްރިޖަރޭޝަން އެންޑް އެއާ ކޮންޑިޝަނިން ފުރިހަމަކުރި 13 ދަރިވަރުންނެވެ. މީގެ އިތުރުން އިލެކްޓްރީޝަން ކޯހުން 11 ދަރިވަރުން، އޮފީސް މެނޭޖްމަންޓުން 7 ދަރިވަރުން އަދި ވެލްޑިން އެންޑް މެޓަލް ފެބްރިކޭޝަން ކޯހުން 6 ދަރިވަރުން ވަނީ ސަނަދު ހާސިލުކޮށްފައެވެ.

3 އޮކްޓޯބަރު 2026، ވަތަނީ ހިދުމަތުގެ ފަންނީ ތަމްރީނުގެ ދެވަނަ ބެޗު ފުރިހަމަކޮށް، ދަސްވެނިވި ދަރިވަރަކަށް މިނިސްޓަރު ހަސަން ރަޝީދު ލިޔުން ހަވާލުކޮށްދެއްވަނީ -- ފޮޓޯ/ ޑިފެންސް މިނިސްޓްރީ

ފަންނީ ހުނަރުތަކުގެ އިތުރުން، މި ތަމްރީނުގައި ފިޒިކަލް ފިޓްނަސް، ސްވިމިން، ޑްރިލް އަދި ތަފާތު ކުޅިވަރު ހަރަކާތްތައް ކުރިއަށް ގެންގޮސްފައިވެއެވެ. ހަމައެއާއެކު، ލައިފް ސްކިލް ކޮމްޕޯނަންޓްގެ ދަށުން ދިރިއުޅޭ ވެށި ސާފުކޮށް ބެލެހެއްޓުމާއި، ޓީމް ބިލްޑިން އަދި ލީޑާޝިޕް ހަރަކާތްތަކުގެ އިތުރުން އަދަބު އަހުލާގު ދަރިވަރުންނަށް ދަސްކޮށްދީފައިވެއެވެ. ޑިފެންސް ބުނި ގޮތުގައި، މި ތަމްރީނުގެ މަގުސަދަކީ ފަންނީ ދާއިރާތަކުން ކުރިއަށް ދިއުމުގެ ގާބިލުކަން ލިބިފައިވާ، އުފެއްދުންތެރި އަދި ޒިންމާދާރު ޒުވާނުންތަކެއް ބިނާކުރުމެވެ.

މިއަދު ނިމުނު ދެވަނަ ބެޗާއެކު، މިހާތަނަށް ޖުމުލަ 136 ދަރިވަރުން ވަނީ ވަތަނީ ހިދުމަތުގެ ފަންނީ ތަމްރީނު ފުރިހަމަކޮށްފައެވެ. މި ޕްރޮގްރާމުގެ ތިންވަނަ ބެޗު މިމަހުގެ މެދުތެރޭގައި ފެށުމަށް މިހާރު އަންނަނީ ތައްޔާރުވަމުންނެވެ.