SAFF ah dhaa anhen futsal team ge squad final koffi

ފުރަތަމަ ފަހަރަށް ސާފުން ބާއްވާ ސާފް ވިމެންސް ފުޓްސަލް ޗެމްޕިއަންޝިޕަށް ދާ ރާއްޖޭގެ ގައުމީ އަންހެން ސްކޮޑު ފައިނަލް ކޮށްފިއެވެ.

ސާފް އަންހެން ފުޓްސަލް މުބާރާތް މިމަހުގެ 13-27 އަށް ތައިލެންޑުގެ ނޮންތަންބުރީގައި ބާއްވަން ނިންމާފައިވާ އިރު، ރާއްޖޭން ފައިނަލް ކޮށްފައި ވަނީ 14 ކުޅުންތެރިންގެ ސްކޮޑެކެވެ. އޭގެ ތެރޭގައި ގިނައިން ހިމެނެނީ ނިމިދިޔަ ވިމަންސް ފުޓްބޯލް ލީގުގައި ކުޅުނު ކުޅުންތެރިންނެވެ.

އެ މުބާރާތުގައި ނުކުޅެ، ފުޓްސަލް ޓީމަށް އެރި ކުޅުންތެރިޔަކީ އޭރު އަނިޔާގައި ހުރުމަށްފަހު، މިހާރު ރިކަވާވެގެން ތަމްރީނުތަކަށް ނުކުންނަ ރާނިޔާ އިބްރާހިމެވެ.

ކޯޗު އާތިފް މުހައްމަދު (އާތީ) އާއެކު ރާއްޖޭގެ އަންހެން ޓީމުން ފަރިތަކުރުންތައް ކުރިއަށް ގެންދާ އިރު، އޭނާ ކުރިން "ވަން ސްޕޯޓްސް" އަށް ބުނީ ތަމްރީނުތައް ކުރިއަށް ގެންދިޔައީ ފިރިހެން ގައުމީ ޓީމު ކޯޗު، ފާރޫގް ޒަކިރޯވްގެ އިރުޝާދުގެ ދަށުން ކަމަށެވެ.

އޭގެ އިތުރުން އާތީ ބުނީ އެހެން ގައުމުތަކުން އިންޑޯގައި ފަރިތަކުރުންތައް ކުރިއަށް ގެންދިޔުމަކީ ޗެލެންޖެއް ކަމަށެވެ. އެހެން ނަމަވެސް އެކަން ހައްލުކުރުމަށް ގޮތްތަކެއް ހޯދާނެ ކަމަށްވެސް އޭނާ ފާހަގަކުރިއެވެ.

ރާއްޖޭގެ އަންހެން ފުޓްސަލް ޓީމުން ނުވަ ވަނަ ދުވަހު ފުރަން ތައްޔާރުވެފައިވާ އިރު، ޓީމުން މުބާރާތަށް ނުކުންނާނީ ޓާފްގައި ޕްރެކްޓިސް ކޮށްފައެވެ. ޓީމުގެ ފަރިތަކުރުންތަކަށް އިންޑޯއެއް ހަމަޖެހިފައެއް ނުވެއެވެ. އޭގެ އިތުރުން އަންހެން ޓީމުން ކޭމްޕް ކުރުމަށް ބޭރަށްވެސް ގޮސްފައެއް ނުވެއެވެ.