ތޫނުއެއްޗަކުން މީހެއްގެ ބުރަކައްޓަށް ހަމަލާދިން މާރާމާރީގައި ބައިވެރިވި ދެމީހުން ޖަލަށް ލުމަށް ކުރިމިނަލް ކޯޓުން ހުކުމްކޮށްފިއެވެ.

މީހަކަށް ނުރައްކާތެރި ހާނިއްކައެއްވާ ގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގައި ދައުލަތުން ދައުވާކުރީ، ގއ. މާމެންދޫ ރިހިފަރުދާގެ އަހްމަދު ޝަމީމް އާއި ގުލްފާމްގެ މުހައްމަދު މާޒިން އާއި ބިލަތްމާގެ ޝަރަފް ރަޝީދު މައްޗަށެވެ.

މި މީހުންގެ މައްޗަށް ދައުވާކުރީ، 2021 ވަނަ އަހަރުގެ ފެބްރުއަރީމަހުގެ އަށްވަނަ ދުވަހުގެރޭ މާމެންދޫ ކަތިބެއްޔާ މަގާއި ކޭވަނެބެއްޔާމަގާ ގުޅުނު ހަތަރުއަނގޮޅި ކަންމަތީގައި ހުންނަ ވެރައިޓީސްކެއާ ކައިރިން މާމެންދޫ ވަގުތީމަންޒިލް ފިރުޝާން ޒާހިރުގެ ބުރަކައްޓަށް ތޫނު އެއްޗަކުން ހަމަލާދީފައިވާ މާރާމާރީގައި އިތުރު ބަޔަކާއެކު ބައިވެރިެފައިވާކަމަށް ބުނެއެވެ.

ނަމަވެސް އެ މާރާމާރީގައި ބައިވެރިވެފައިވާކަމަށް، އަހްމަދު ޝަމީމްގެ މައްޗަށްކުރި، މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށް ސާބިތު ނުވާކަަމަށް ކަނޑައަޅައި، އެ މާރާމާރީގައި މާޒިން އާއި ޝަރަފް ބައިވެރިވެފައިވާކަން ސާބިތުވާތީ، މާޒިން 10 އަހަރަށް ޖަލަށްލުމަށް ހުކުމްކޮށް، ޝަރަފް ހަތް އަހަރު ދުވަހަށް ޖަަލަށްލުމަށް ކުރިމިނަލް ކޯޓުން ވަނީ ހުކުމްކޮށްފައެވެ.