އަންހެނުންގެ ތަރައްގީއަށް މަސައްކަތްކުރާ ކޮމިޓީ، ޑަބްލިޔުޑީސީގެ ބަޖެޓުގެ ގޮތުގައި ކައުންސިލުގެ ބަޖެޓުން ދެމުން ގެންދާ އަދަދު ދެގުނައަށް ބޮޑުކުރުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.

ރައީސް އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ ޑަބްލިޔުޑީސީ ކޮމިޓީތައް އިތުރަށް ބާރުވެރިކުރުވުމަށްޓަކައި، އަންނަ އަހަރަށް ބަޖެޓު ހުށަހެޅުމުގެ ކުރިން، ދެ ބަދަލެއް ގެނައުމަށް ނިންމާފައިވާ ކަމަށެވެ.

އެއް ބަދަލެއްގެ ގޮތުގައި ނިންމަވާފައިވަނީ ޑަބްލިޔުޑީސީ ބަޖެޓުގެ ގޮތުގައި، ކައުންސިލުގެ ބަޖެޓުން ދެމުން ގެންދާ ފަސް ޕަސަންޓު ދެގުނަ ބޮޑުކޮށް، ދިހަ ޕަސަންޓަށް ބަދަލުކުރުމަށެވެ.

އޭގެ އިތުރުން ދެވަނަ ބަދަލެއްގެ ގޮތުގައި ނިންމަވާފައިވަނީ ޑަބްލިޔުޑީސީ މެންބަރުންނަށް ދޭ ރަމަޟާން މަހުގެ އެލަވަންސް، އެ ކޮމިޓީގެ ބަޖެޓުން ދިނުމުގެ ބަދަލުގައި ކައުންސިލްގެ ބަޖެޓުގެ ތެރެއިން ހަމަޖެއްސުމެވެ.

ރައީސް މިދިޔަ އޮގަސްޓް މަހުގެ 19 ވަނަ ދުވަހު އއ. މަތިވެރިއަށް ވަޑައިގެން އެ ރަށު ރައްޔިތުންނާ ބައްދަލުކުރެއްވުމަށް ބޭއްވ ޖަލްސާގައި ވިދާޅުވެފައިވަނީ ރައްޔިތުންގެ މަޖިލީހުގެ އަންނަ ދައުރުގައި ގާނޫނުއަސާސީ އިސްލާހުކުރުމަށް ހުށަހަޅުއްވާނެ ކަމަށެވެ. އެއީ ލާމަރުކަޒީ ނިޒާމު އިތުރަށް ވަރުގަދަކުރުމުގެ ގޮތުން ގެންނަ އިސްލާހުތަކެއް ކަމަށެވެ.

އެގޮތުން ކައުންސިލުތަކުގެ ސައިޒު ކުޑަކުރައްވާނެކަމަށް ރައީސް ވިދާޅުވެފައިވެއެވެ.

ރައީސް ވިދާޅުވެފައިވަނީ އަންހެނުންގެ ތަރައްގީއަށް މަސައްކަތްކުރާ ކޮމިޓީ، ޑަބްލިޔުޑީސީތަކަށް ވެސް ބަދަލު އަންނާނެ ކަމަށާއި ޑަބްލިޔުޑީސީގެ ރައީސާ ވަކިން ހޮވާ ގޮތަށް އިސްލާހު ހުށަހަޅުއްވާނެ ކަމަށެވެ. އަދި ޑަބްލިޔުޑީސީގެ ރައީސާއަކީ ފުލްޓައިމް ވަޒީފާއެއްގެ ގޮތުގައި ހަމަޖައްސަވާނެ ކަމަށް އެ މަނިކުފާނު ވިދާޅުވެފައިވެއެވެ.

ނަމަވެސް އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބަޖެޓު ބޮޑުކުރާނެކަމަށް އެފަހަރު ރައީސް ވިދާޅުވެފައެއް ނުވެއެވެ.