ބޮލީވުޑްގެ މަޝްހޫރު ތަރި ދީޕިކާ ޕަދުކޯން ވަނީ ފިލްމު އިންޑަސްޓްރީގެ "އިންސައިޑާ-އައުޓްސައިޑާ" ބަހުސްއާ ބެހޭގޮތުން ވާހަކަދައްކައިފައެވެ. މިއީ ވޭވްސް ސަމިޓް 2025 ގައި ދެއްކި ވާހަކައެކެވެ. މި ސަމިޓުގައި ދީޕިކާގެ އިތުރުން ޝާހުރުކް ޚާން އަދި ކަރަން ޖޯހަރު ވެސް ބައިވެރިވިއެވެ.

ދީޕިކާ ބުނެފައިވަނީ އޭނާ ފިލްމު އިންޑަސްޓްރީއަށް އައި އިރު "އިންސައިޑާ-އައުޓްސައިޑާ" ގެ ވާހަކަ މާ ބޮޑަށް ނުދެކެވޭ ކަމަށެވެ. އޭނާ ބުނެފައިވަނީ ބެންގަލޫރުން އައި 17 އަހަރުގެ އަންހެން ކުއްޖެއްގެ ގޮތުގައި ކަމަށެވެ. ފަރާ ޚާން އޭނާއަށް ފިލްމެއްގައި ފުރުސަތު ދިން ވާހަކަ ދީޕިކާ ހިއްސާކޮށްފައިވެއެވެ.

ދީޕިކާ އިތުރަށް ބުނެފައިވަނީ އޭނާގެ މޮޑެލިން ތަޖުރިބާއިން ބައެއް ދޮރުތައް ހުޅުވުނު ކަމަށެވެ. ނަމަވެސް އޭނާގެ ކާމިޔާބީގެ ފަހަތުގައި އޮތީ މަސައްކަތްތެރިކަން ކަމަށް ދީޕިކާ ބުނެފައިވެއެވެ. "އަހަރެންގެ ކޮންޓްރޯލްގައި ހުރި ކަންކަމަކީ އެއީ. އަހަރެން ޝައުގުވެރިވާ ކަންކަމުގައި އެ ސިފަތައް ބޭނުންކުރިން،" އޭނާ ބުންޏެވެ.

މި ބަހުސާ ގުޅޭގޮތުން ޝާހު ބުނެފައިވަނީ "އިންސައިޑާ-އައުޓްސައިޑާ" ލޭބަލްއަށް މާބޮޑު އަހައްމިއްޔަތުކަމެއް ދޭކަށް ނުޖެހޭ ކަމަށެވެ. އޭނާ ބުނެފައިވަނީ މުހިންމީ މީހަކު އަންނަ ތަނެއް ނޫން ކަމަށާއި، މުހިންމީ އިންޑަސްޓްރީގައި އަމިއްލަ ޖާގަ ހޯދުން ކަމަށެވެ. ޝާހު އިތުރަށް ބުނެފައިވަނީ އައުޓްސައިޑަރެއްގެ ގޮތުގައި ދެކި، އެގޮތަށް ވިސްނުމުން މީހާގެ ކުރިއެރުމަށް ހުރަސްއެޅިދާނެ ކަމަށެވެ.