9/11 ގެ ހަމަލާތަކަށްފަހު އެމެރިކާގައި ދިމާވި އާދަޔާ ޚިލާފު ހާދިސާއެއްގެ ވާހަކަ ސުނިލް ޝެއްޓީ ހިއްސާކޮށްފިއެވެ. އެ ހިތާމަވެރި ހާދިސާ ހިނގިއިރު ސުނިލް ހުރީ ލޮސް އެންޖެލެސްގައި އޭނާގެ ފިލްމު 'ކާންޓޭ' ގެ ޝޫޓިން ގައެވެ. ފަހުގެ އިންޓަވިއުއެއްގައި، ސުނިލް ބުނީ އޭނާގެ ސިފައިގެ ސަބަބުން އުފެދުނު އޮޅުމެއްގެ ތެރޭ ފުލުހުން އޭނާގެ ބޮލަށް ބަޑި އަމާޒުކޮށްގެން ހިފެހެއްޓި އެވެ.

ސުނިލް އާއި އޭނާގެ ފިލްމު ކްރޫއަށް ލޮސް އެންޖެލެސްއަށް ދެވުނީ ވޯލްޑް ޓްރޭޑް ސެންޓަރަށް ހަމަލާދިނުމުގެ ކުޑަ އިރުކޮޅެއް ކުރީންނެވެ. ހޮޓަލުގައި ތިބިއިރު ވޯލްޑް ޓްރޭޑް ސެންޓަރަށް މަތިންދާ ބޯޓުން ޖެއްސި ޝޮކިން މަންޒަރު ފުރަތަމަ އޭނާއަށް ވަނީ ފެނިފައެވެ. އިންޑިއަން އެކްސްޕްރެސްއަށް ދިން އިންޓަވިއުއެއްގައި ސުނިލް ބުނީ އެއީ ހަމަ ޔަގީންކުރަން ދަތި ކަމެއް ކަމަށެވެ. އޭނާ ބުނީ އެވަގުތު އޭނާއަށް ފެންނަމުންދިޔަ މަންޒަރު ގަބޫލުކުރަން ދަތިވި ކަމަށެވެ.

އަސްލު ޝޮކު އައީ އޭގެ ދުވަސްކޮޅެއް ފަހުން ފުލުހުންނާއެކު ދިމާވި ހާދިސާއެއްގަ އެވެ. އޭނާގެ ހޮޓަލު ކޮޓަރީގެ ތަޅުދަނޑި ބޭއްވުނުތަން ހަނދާންނެތިގެން ހޮޓަލުގެ ލޮބީގައި ހުރި މީހެއްގެ އެހީތެރިކަމަށް އެދުނެވެ. ތަޅުދަނޑި ހޯދުމަށް އާދައިގެ އިޝާރާތެއް ކުރުމުން، އެ މީހާ އެ އަމަލު އޮޅިގެން ހަޅޭއްލަވަން ފެށިއެވެ. ވަރަށް އަވަހަށް، ފުލުހުން އެތަނަށް އައީ ބަޑިތައް ހިފައިގެނެވެ.

ސުނިލްއަކީ ނުރައްކަލެއް ކަމަށް ބަލައި، އޮފިސަރުން އޭނާއަށް އަމުރުކުރީ ކަކޫމައްޗަށް ތިރިވުމަށެވެ. އަތުގައި ބިޑިއަޅުވަން ތައްޔާރުވާށޭ ބުނެ އެގޮތަށް އަމަލު ނުކޮށްފި ނަމަ ބަޑި ޖަހާނެ ކަމުގެ އިންޒާރު ދިން ކަމަށްވެސް ސުނިލް ބުންޏެވެ. އެ ބިރުވެރި ވަގުތުކޮޅު، ސުނިލް ހުރީ ޝޮކެއްގައި، ވަމުންދާ ގޮތް ނޭނގިފައެވެ. އޭނާގެ ސިފަ، ހާއްސަކޮށް އޭނާގެ ތުނބުޅި، 9/11 އަށްފަހު އިތުރުވެފައިވާ ސަލާމަތީ މާހައުލުގައި އޭނާ ޓާގެޓަކަށް ހެދީ ކަމަށް ބެލެވޭ ކަމަށްވެސް ސުނިލް ބުންޏެވެ.

ނަސީބު ރަނގަޅުކަމުން، ޕްރޮޑަކްޝަން ޓީމުގެ ބައެއް މެންބަރުން އެދޭތެރެއަށް މެދުވެރިވެ، އަދި ހޮޓަލުގެ މެނޭޖަރުންގެ ތެރެއިން ޕާކިސްތާނު މީހަކު، ސުނިލްއަކީ މަޝްހޫރު އެކްޓަރެއްކަން ކިޔައިދިނެވެ. އެންމެ ފަހުން އެ ހާލަތު މަޑުމައިތިރިވި ނަމަވެސް، ސުނިލް އެ ތަޖުރިބާ ސިފަކުރީ ބިރުވެރި ކަމެއްގެ ގޮތުގައެވެ. ހަމަލާތަކަށްފަހު އުފެދިފައިވާ ނުރައްކާތެރި މާހައުލުގައި، ދެން ވާނީ ކިހިނެއްކަން އޭނާއަށް ޔަގީނެއްނުވިއެވެ.

މަސައްކަތުގެ ދާއިރާއަށް ބަލާއިރު، ސުނިލް އެންމެ އަވަހަށް ފެންނާނީ އަހުމަދު ޚާންގެ ކޮމެޑީ ފިލްމު 'ވެލްކަމް ޓު ދަ ޖަންގަލް' އިންނެވެ. މި ފިލްމުގައި ތަރީން ގިނަ އަދަދަކަށް ހިމެނޭ ކާސްޓެއް ވެއެވެ. އޭގެ ތެރޭގައި އަކްޝޭ ކުމާރު، ދިޝާ ޕަޓާނީ، ލާރާ ދައްތާ، ޕަރޭޝް ރާވަލް، ރަވީނާ ޓަންޑަން، ޖެކުލިން ފަރްނާންޑޭޒް، ޝްރެޔާސް ތަލްޕަޑޭ، އަރްޝަދު ވާރުސީ، ޖޮނީ ލީވަރު، ރާޖްޕާލް ޔާދަވް، އަދި ތުއްޝާރު ކަޕޫރު ހިމެނެއެވެ.

މީގެ އިތުރުން، ސުނިލް ތައްޔާރުވަމުން އަންނަނީ 'ހޭރާ ޕޭރީ 3' ގައި އޭނާގެ މަޝްހޫރު ރޯލު ކަމަށްވާ ޝިޔާމްގެ ރޯލު އަލުން ކުޅުމަށެވެ. މި ފިލްމުގައި އަކްޝޭ ކުމާރު އަދި ޕަރޭޝް ރާވަލް ވެސް ހިމެނެއެވެ.