ކުރިއަށް އޮތް 20 އަހަރުގެ ގައުމީ ތަރައްގީގެ ޕްލޭނެއް އެކުލަވާލުމުގެ މަސައްކަތް ކޮށްދޭނެ ރާއްޖޭގެ ކޮންސަލްޓެންސީ ފާމެއް ހޯދުމަށް ފިނޭންސް މިނިސްޓްރީން އިއުލާނުކޮށްފިއެވެ.

އެ މިނިސްޓްރީން މިއަދި ކުރި އިއުލާނެއްގައި ބުނީ ކޮންސަންޓެންސީ ފާމް ހޯދަނީ ހައުސިން މިނިސްޓްރީގެ އެދުމުގެ މަތިން ކަމަށެވެ.

މިސައްކަތަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ދައުވަތު މިކަމަށް ޝަރުތުހަމަވާ ހުރިހާ ފަރާތްތަކަށް ފިނޭންސުން ވަނީ ހުޅުވާލައިފައެވެ.

އެ އިއުލާނުގައި ބުނީ، އެ މަސައްކަތާ ގުޅޭ މައުލޫމާތު ހިމެނޭ ގޮތަށް ތައްޔާރުކުރެވިފައިވާ ޓާމްސް އޮފް ރިފަރެންސް (ޓީއޯއާރް) މާދަމާއިން ފެށިގެން މިނިސްޓްރީގެ [ވެބްސައިޓް](www.finance.gov.mv) އިން ޑައުންލޯޑް ކުރެވެން ހުންނާނެ ކަމަށެވެ.

އެ އިއުލާނުގައި ބުނީ، އެ މަސައްކަތަށް ޝައުގުވެރިވާ ފަރާތްތަކުން މި މަހުގެ 16 ވަނަ ދުވަހުގެ ރަސްމީ ގަޑި ނިމުމުގެ ކުރިން އީއޯއީ ހުށަހަޅަން ޖެހޭނެ ކަމަށެވެ.

ގައުމީ ތަރައްގީގެ ޕްލޭންގެ މަގުސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ރާއްޖޭގެ ދެމެހެއްޓެނިވި އިގުތިސޯދީ، އިޖުތިމާއީ، ތިމާވެށި އަދި އާބަން ޑިވެލޮޕްމަންޓު ގައުމީ ތަރައްގީގެ ޕްލޭނެއް އެކުލަވާލުމެވެ. އަދި މި ޕްލޭންގައި ނެޝަނަލް ޑިވެލޮޕްމަންޓް ޕްލޭން ފައިދާހުރި ގޮތެއްގައި ތަންފީޒުކުރުމާއި މޮނިޓާކުރުމާއި އިވެލުއޭޓް ކުރެވޭނެ ގޮތްތައް ހިމަނާނެއެވެ.