ޔޫރޯ 2024 ގެ 20 ވަނަ މެޗުގައި ޕޮލެންޑާއި އޮސްޓްރިއާ ވާދަކުރާ މެޗުގެ ލައިވް ބްލޮގަށް "ވަން ސްޕޯޓްސް"ގެ ކިޔުންތެރިންނަށް މަރުހަބާ!

މިރޭގެ މެޗަށް ނުކުންނަ އިރު ޕޮލެންޑް އޮތީ ފުރަތަމަ މެޗުގައި ނެދަލޭންޑްސް ކައިރިން ބަލިވެފައި. އެއީ 2-1 ގެ ނަތީޖާއަކުން. މެޗުގައި ނެދަލޭންޑްސްއިން ޕޮލެންޑް ކޮޅަށް ދެވަނަ ގޯލު ޖެހީ ފަހު ވަގުތު. އޮސްޓްރިއާވެސް އޮތީ ފުރަތަމަ މެޗުގައި ބަލިވެފައި. އެއީ ފެވަރިޓެއް ކަމަށްވާ ފްރާންސް އަތުން. މެޗުގައި އޮސްޓްރިއާ ރަނގަޅަށް ކުޅުނު ނަމަވެސް ބަލިވީ 1-0 ގެ ނަތީކާއަކުން.

  • އޮސްޓްރިއާ - ރަލްފް ރަންގްނިކް

އުމުރު: 65 އަހަރު

އޮސްޓްރިއާއާ 2022 ވަނަ އަހަރު ހަވާލުވި ކޯޗު ރަންގްނިކަކީ ޔޫރަޕްގެ ފުޓުބޯޅައިގެ އެންމެ މަތީ ފަންތިއަށްވެސް އާ މޫނަކަށް ނުވާނެ. ޖަރުމަނަށް އުފަން ރަންގްނިކަކީ ޒަމާނީ ފުޓުބޯޅައިގެ އިސް މޭސްތެރިއެއް. އޭނާ ވަނީ "ޖެންޖެންޕްރެސިން"ގެ ހާއްސަ ފިލޯސަފީއެއް ޔޫރަޕަށް ގެނެސްދީ، ކުޅުމުގެ ސްޓައިލަށް ބަދަލުތަކެއް ގެނެސްފައި. ކޯޗިންގެ އިތުރުން ފުޓުބޯޅައިގެ ޓެކްނިކަލް ދާއިރާތަކުގައިވެސް ފުންނާބު އުސް މީހެއްގެ ގޮތުގައި ރަންގްނިކް ފާހަގަވެފައިވޭ. އޮސްޓްރިއާއާ ހަވާލުވުމުގެ ކުރިން ރަންގްނިކް ވަނީ މެންޗެސްޓާ ޔުނައިޓެޑާއި ލެއިޕްޒިގް، ޝާލްކޭ، ސްޓަޓްގާޓްގެ އިތުރުން ހެނޯވާ ފަދަ ކްލަބުތަކަށް ކޯޗުކޮށްދީފައި.

  • ޕޮލެންޑް - މިޝަލް ޕްރޮބިއޭޒް

އުމުރު: 51 އަހަރު

ޕްރޮބިއޭޒްއަކީ ފުޓުބޯޅަ ކުޅުންތެރިއެއްގެ ގޮތުގައި ފާހަގަކޮށްލެވުނު މިޑްފީލްޑަރެއް. އޭނާ ވަނީ ޕޮލެންޑްގެ ގިނަ ކްލަބުތަކަކަށް ކުޅެފައެވެ. އޭގެ ތެރެއިން ކެރިއަރުގެ ބޮޑު ބައެއް ހޭދަކުރީ ޕޮލެންޑްގެ ގޯނިކް ޒަބޭޒް. ޕޮލެންޑްގެ ޒުވާން ގައުމީ ޓީމުތަކަށް ކުޅުނު ޕްރޮބިއޭޒްގެ ކޯޗިން ކެރިއަރުވެސް ގުޅިފައި އޮތީ އުފަން ގައުމު ޕޮލެންޑް. 2005 ވަނަ އަހަރުން ފެށިގެން ކޯޗިން މަސައްކަތަށް ނުކުމެ، އޭނާ މިއަދާ ހަމައަށްވެސް މަސައްކަތް ކުރީ އަމިއްލަ ގައުމުގެ ކްލަބުތަކާ އެކުގައި. ޕޮލިޝް ކަޕް ދެފަހަރަށް، ޕޮލިޝް ސުޕަ ކަޕްވެސް ދެ ފަހަރަށް ހޯދާފައިވާ ޕްރޮބިއޭޒްއަކީ 2010 ވަނަ އަހަރު އެގައުމުގެ އެންމެ މޮޅު ކޯޗެއް. ގައުމީ ސީނިއާ ޓީމާ ޕްރޮބިއޭޒް ހަވާލުވީ 21 އަހަރުން ދަށުގެ ޓީމާ ހަވާލުވެ ހުރުމަށްފަހު، 2023 ވަނަ އަހަރު.