ޝަރުއީ ދާއިރާގެ ހުރިހާ ކޯޓުތަކެއްގެ ރެކޯޑް ސާފުކުރުމުގެ ކަންތައްތައް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް ބަދަލުކޮށްފިއެވެ.
ޖިނާއީ އިޖުރާއަތުގެ ގާނޫނަށް ތިންވަނަ އިސްލާހު ގެނައުމުގެ ގާނޫނަށް އަމަލުކުރަން ފަށާތާ 30 ދުވަހުގެ ތެރޭގައި، މަރުކަޒީކޮށް ކުށުގެ ރެކޯޑު ބަލަހައްޓާނެ އިދާރާއެއް އެޓާނީ ޖެނެރަލް ކަނޑައަޅަން ޖެހެއެވެ. އެގޮތުން ކުށުގެ ރެކޯޑު ބަލަހައްޓާނެ އިދާރާއަކީ ޑީޖޭއޭ ކަމުގައި އެޓާނީ ޖެނެރަލް އިބްރާހީމް ރިފްއަތު ވަނީ ކަނޑައަޅުއްވައިފައެވެ.
ޑީޖޭއޭއިން ބުނީ މާދަމާއިން ފެށިގެން ޝަރުއީ ދާއިރާގެ ހުރިހާ ކޯޓުތަކެއްގެ ރެކޯޑް ސާފުކުރުމުގެ ކަންތައްތައް މިހާރު ހަމަޖައްސާފައިވާ ކަމަށެވެ. އަދި ކުށުގެ ރެކޯޑް ސާފުކުރަން އެދޭ ފޯމް އެ އިދާރާއަށް އީމެއިލް މެދުވެރިކޮށް ވެސް މިހާރު ހުށަހެޅޭނެ ކަމަށާއި އެގޮތަށް ހުށަހަޅާ ފޯމަށް އީމެއިލުން ވެސް ޖަވާބު ދޭނެ ކަމަށެވެ.
ގާނޫނުގައި ބުނާގޮތުން މަރުކަޒީކޮށް ކުށުގެ ރެކޯޑު ބަލަހައްޓާނެ އިދާރާ އެޓާނީ ޖެނެރަލް ކަނޑައެޅުއްވުމާއެކު ހަ މަސް ދުވަހުގެ ތެރޭގައި، މަރުކަޒީކޮށް ކުށުގެ ރެކޯޑު ބެލެހެއްޓޭނެ ނިޒާމެއް ޑީޖޭއޭ އިން ހަމަޖައްސަން ޖެހޭނެއެވެ.
މީގެ ކުރިން ކުށުގެ ރެކޯޑް ސާފުކުރަން ޖެހެނީ އެކި ކޯޓުތަކަށް ވަކިވަކިންނާއި މުއައްސަސާތަކަށް ވެސް ވަކިވަކިން ފޯމު ހުށަހަޅައިގެންނެވެ. އެހެންކަމުން ކުށުގެ ރެކޯޑް ސާފުކުރަން އާންމުކޮށް ވަރަށް ގިނަ ދުވަސް ނަގައެވެ.
ނަމަވެސް މި ފަހުން ކޮވިޑާ ގުޅިގެން ކުށުގެ ރެކޯޑް އޮންލައިންކޮށް ސާފުކުރެވޭނެ ގޮތް ޑީޖޭއޭ އިން ހަމަޖެއްސިއެވެ.
