އިންޑިއާގެ ހިލޭ އެހީގެ ދަށުން އިތުރު 11 ރަށެއްގައި ކުޑަކުދިންގެ ޕާކު ތަރައްގީ ކުރައްވާނެ ކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެއެވެ.

މިނިސްޓަރު މަހުލޫފު މިއަދު ކުރެއްވި ޓުވީޓެއްގައި ވިދާޅުވީ، އިންޑިއާގެ މާލީ އެހީތެރިކަމުގައި ކުޑަކުދިންގެ ޕާކުތައް އިތުރު ފަސް އަތޮޅެއްގެ ރަށްތަކުގައި ތަރައްގީކުރަން ސަރުކާރުން ނިންމާފައިވާ ކަމަށެވެ.

މީގެ ކުރިންވެސް މިނިސްޓަރު މަހުލޫފު ވަނީ އިންޑިއާ ސަރުކާރުގެ ހިލޭ އެހީގެ ދަށުން ދިހަ ރަށެއްގައި ކުޑަކުދިންގެ ޕާކު ތަރައްގީކުރަން ސަރުކާރުން ނިންމައިފައިވާ ކަމަށް ވިދާޅުވެފައެވެ. އެގޮތުން އެއިރު ވިދާޅުވީ، ހދ.ނާވައިދޫ، ށ.ޅައިމަގު، ށ.ފީވަށް، ށ.ކޮމަންޑޫ، ށ.ނޫމަރާ، ށ.ބިލެއްފަހި، ށ.ފޭދޫ، ނ.މާފަރު ނ.ފޮއްދޫގައި ކުޑަކުދިންގެ ޕާކު ތަރައްގީކުރައްވާނެ ކަމަށެވެ.

މި ރަށްރަށުގައި ކުޑަކުދިންގެ ތަރައްގީކުރާނެ ކަމަށް ވިދާޅުވި ނަމަވެސް އެ ޕާކުތައް ތަރައްގީކުރުމުގެ އަމަލީ މަސައްކަތް ފެށޭނެ ވަކި ތާރީހެއް މިނިސްޓަރު މަހުލޫފު ވިދާޅެއް ނުވެއެވެ.