މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބާއްވާ ފިންލިޓް ފެސްޓް 2026 ގެ ކުރެހުމުގެ މުބާރާތަށް ކުރެހުން ހުށަހެޅުމުގެ ފުރުސަތު ހުޅުވާލައިފިއެވެ.

އެމްއެމްއޭއިން މިއަދު ބުނި ގޮތުގައި، މިއީ ރާއްޖޭގައި މާލީ ހޭލުންތެރިކަން އިތުރުކުރުމަށް އެ އޮތޯރިޓީން ކުރަމުންދާ މަސައްކަތްތަކުގެ ތެރެއިން ސްކޫލް ކުދިންނަށް އަމާޒުކޮށްގެން ކުރިއަށްގެންދާ ހަރަކާތެކެވެ.

ސްކޫލް ކުދިންނަށް ހާއްސަކޮށްގެން ކުރިއަށްގެންދާ މި މުބާރާތުގައި ވާދަކުރެވޭނީ ދެ ކެޓަގަރީއަކުންނެވެ. އެއީ ގްރޭޑް 5 އިން 7 އަށް އަދި ގްރޭޑް 8 އިން 9 ގެ ކެޓަގަރީއެވެ. މި މުބާރާތުގައި ޑިޖިޓަލް ކުރެހުންތަކާއި ޑިޖިޓަލް ނޫން ކުރެހުންތައް ވެސް ބަލައިގަންނާނެ ކަމަށް އެމްއެމްއޭއިން ބުނެފައިވެއެވެ.

މި މުބާރާތަށް ކުރެހުން ހުށަހެޅުމަށް ފަސް ތީމެއް ވަނީ ކަނޑައަޅައިފައެވެ. އޭގެ ތެރޭގައި މާލީ ދުޅަހެޔޮކަމާއި ވިސްނުންތެރިކަމާއެކު ފައިސާ ގެންގުޅުމާއި، ފައިސާ ރައްކާކުރުމާއި މުސްތަގުބަލުގެ އަމާޒުތައް ހިމެނެއެވެ. މީގެ އިތުރުން އެންމެން ބައިވެރިވާ މާލީ އިގުތިސާދާއި، އީޖާދުތަކާއި ކުރިމަގުގައި ފައިސާގެ އިތުރުން ރައްކާތެރި އަދި ޒިންމާދާރު ދެމެހެއްޓެނިވި މާލީ ނިޒާމާ ގުޅޭގޮތުން ވެސް ކުރެހުންތައް ހުށަހެޅިދާނެއެވެ.

ފިންލިޓް ފެސްޓް ކުރެހުމުގެ މުބާރާތަށް ކުރެހުން ހުށަހަޅައިގެން 3،000 ރުފިޔާއާ ހަމައަށް އިނާމު ލިބުމުގެ ފުރުސަތު އޮތް ކަމަށް އެމްއެމްއޭއިން ބުނެއެވެ. އަދި މި މުބާރާތަށް ހުށަހަޅާ ކުރެހުންތަކުގެ ތެރެއިން ހޮވާލެވޭ ބައެއް ކުރެހުންތައް އެ އޮތޯރިޓީގެ އެކިއެކި އިވެންޓްތަކާއި ހޭލުންތެރިކަމުގެ ކެމްޕޭނުތަކުގައި ބޭނުންކުރާނެ ކަމަށް ވެސް ބުނެފައިވެއެވެ.

މި މުބާރާތަށް ކުރެހުން ހުށަހަޅަން ބޭނުންވާ ދަރިވަރުންނަށް އީމެއިލް މެދުވެރިކޮށް ނުވަތަ ކުރެހުމުގެ އަސްލު އެމްއެމްއޭއަށް ފޮނުވައިގެން ވެސް ބައިވެރިވެވޭނެއެވެ. އީމެއިލް ކުރާނީ [email protected] އަށެވެ. ކުރެހުން ހުށަހެޅުމުގެ ސުންގަޑިއަކީ އަންނަ މަހުގެ އެއްވަނަ ދުވަހުގެ 23:59 އެވެ.