ރާއްޖޭގައި އުފައްދާ ބޯފެނުގައި ނުރައްކާތެރި ކެމިކަލެއް އެކުލެވޭ ކަމަށްބުނެ ސޯޝަލް މީޑިއާގައި ފަތުރަމުންދާ ވާހަކަތައް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދޮގުކޮށްފިއެވެ.

ސޯޝަލް މީޑިއާގައި ދައުރުވަމުންދާ މެސެޖެއްގައި ބުނެފައިވަނީ، ރާއްޖޭގެ ގިނަ ފެން ޕްލާންޓުތަކުން އުފައްދާ ފެނުގައި "ޑައިހައިޑްރޮޖެން މޮނޮކްސައިޑް" ނަމަކަށް ކިޔާ ނުރައްކާތެރި ކެމިކަލެއް ހުރި ކަމަށެވެ. އަދި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ރިޕޯޓަކާ ހަވާލާދީ، ވިޔަފާރި އުސޫލުން ވިއްކާ ގިނަ ފެންފުޅިތަކުގައި، ހާއްސަކޮށް ތާޒާ އަދި ބޮނަކުއާ ފަދަ ބްރޭންޑުތަކުގެ ފެނުގައި ވެސް މި ކެމިކަލް ހުރި ކަމަށް އެ މެސެޖުގައި ދައުވާކޮށްފައިވެއެވެ. މީގެ އިތުރުން، މި ކެމިކަލްގެ އަސަރު ހަށިގަނޑަށް ކޮށްފި ކަމަށް ލަފާކުރެވޭނަމަ ވަގުތުން 119 އަށް ގުޅުމަށް ވެސް އެ މެސެޖުގައި ގޮވާލާފައިވެއެވެ.

މިކަމާ ގުޅިގެން އެމްއެފްޑީއޭއިން މިއަދު ބުނީ، މެސެޖުގައި ނުރައްކާތެރި ކެމިކަލެއްގެ ގޮތުގައި ސިފަކޮށްފައިވާ "ޑައިހައިޑްރޮޖެން މޮނޮކްސައިޑް" އަކީ ފެނުގެ ކެމިކަލް ނަން ކަމަށެވެ. އަދި ފެނުގައި ފެން އެކުލެވޭކަން އެއީ ނުރައްކާތެރި ކަމެއްގެ ގޮތުގައި ދައްކުވައިދީ ފަތުރަމުންދަނީ އޮޅުވާލުމެއް ކަމަށް އެ އޮތޯރިޓީން ފާހަގަކުރިއެވެ.

އާންމު ސިއްހަތަކީ މަޖަލަކަށް ހަދަންޖެހޭ ކަމެއް ނޫން ކަމަށާއި، މައުލޫމާތު ހޯދުމުގައި އިތުބާރު ހުރި މަސްދަރުތަކަށް ބަރޯސާވުމަށް އެމްއެފްޑީއޭއިން އިލްތިމާސްކުރިއެވެ. އަދި މަޖަލަކަށް ނަމަވެސް މިފަދަ ދޮގު ވާހަކަތައް އުފައްދައި ނުފެތުރުމަށް އެ އޮތޯރިޓީން ވަނީ އަންގައިފައެވެ. ސަބަބަކީ އޭގެ ސަބަބުން އާންމުންގެ މެދުގައި ބޭކާރު ހާސްކަން އުފެދިދާނެތީ ކަމަށް އެމްއެފްޑީއޭއިން ބުނެފައިވެއެވެ.