އިންޓަ-ޕާލިމެންޓަރީ ޔުނިއަން (އައިޕީޔޫ) ގެ 153 ވަނަ އެސެމްބްލީގައި ބައިވެރިވެވަޑައިގަތުމަށްޓަކައި ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުالله ޓެންޒޭނިއާގެ އަރޫޝާއަށް ފުރާވަޑައިގެންފިއެވެ.

ރައްޔިތުންގެ މަޖިލީހުން ރޭ ބުނީ މި އެސެމްބްލީގެ ތެރެއިން ބޭއްވޭ އާންމު ބަހުސްގައި ރައްޔިތުންގެ މަޖިލީހުގެ ރައީސް އަބްދުއްރަޙީމް ވާހަކަފުޅު ދައްކަވާނެ ކަމަށެވެ. އެމަނިކުފާނު މި އެސެމްބްލީގައި ވާހަކަފުޅުދެއްކެވުމަށް ހަމަޖެހިފައިވާ މައިގަނޑު މައުލޫއަކީ "އެންމެންގެ ޝާމިލުވުމާއި އިތުބާރާއި އަދި ފުރުސަތުތައް ފަހިކޮށްދީގެން ހެޔޮވެރިކަން ކުރިއެރުވުމާއި މުޖުތަމައުތައް ބާރުވެރިކުރުވުން" ކަމަށެވެ.

މަޖިލީހުން ބުނީ މި ދަތުރުފުޅުގައި މަޖިލީހުގެ ރައީސްގެ އަރިހުގައި ރައްޔިތުންގެ މަޖިލީހުގެ މެންބަރުންނާއި އިސް ވެރިން ހިމެނިވަޑައިގަންނަވާ ވަފުދެއް ބައިވެރިވެވަޑައިގަންނަވައެވެ. މިގޮތުން ވަފުދުގައި ހިމެނިވަޑައިގަންނަވާ މަޖިލިސް މެންބަރުންނަކީ ހުޅުދޫ ދާއިރާގެ މެންބަރު މުހައްމަދު ޝާހިދު، ބާރަށު ދާއިރާގެ މެންބަރު އިބްރާހީމް ޝުޖާއު، މާފަންނު މެދު ދާއިރާގެ މެންބަރު އަސްމާ ރަޝީދު، ހުރާ ދާއިރާގެ މެންބަރު ޑރ. އަނާރާ ނައީމް، ނިލަންދޫ ދާއިރާގެ މެންބަރު ފާތިމަތު ސައުދާ، ގައްދޫ ދާއިރާގެ މެންބަރު މުހައްމަދު އަލީ އަދި ތޮއްޑޫ ދާއިރާގެ މެންބަރު ހުސައިން ސަމީރެވެ.

މީގެ އިތުރުން މަޖިލީހުގެ އިދާރާގެ އިސް ބޭފުޅުންގެ ގޮތުގައި ކައުންސެލް ޖެނެރަލް އަލްއުސްތާޒާ ފާތިމަތު ފިލްޒާ އާއި ޗީފް އޮފް ބިއުރޯ އަހުމަދު ނިހާން ހުސައިން މަނިކުގެ އިތުރުން ފޮރިން ރިލޭޝަންސް ޑިޕާޓްމަންޓުގެ އެސިސްޓެންޓް ޑިރެކްޓާ ޖެނެރަލް ޒުއްޔިނާ ބަދުރީ ވެސް މި ވަފުދުގައި ހިމެނިވަޑައިގަންނަވާ ކަމަށް މަޖިލީހުން ބުންޏެވެ.

މި އެސެމްބްލީ ކުރިއަށްދާނީ މި ހިނގާ އޮކްޓޯބަރު މަހުގެ ފަހަކުން ނުވައެއްގެ ނިޔަލަށެވެ.