ވިލާ ކޮލެޖުގެ ބާނީ ގާސިމް އިބްރާހީމަކީ މުޅި ރާއްޖޭގެ ރައްޔިތުންނަށްޓަކައި ބޮޑެތި ގުރުބާނީތަކެއް ވެވަޑައިގެންފައިވާ ގައުމީ ބަތަލެއް ކަމަށް ނައިބު ރައީސް ހުސައިން މުހައްމަދު ލަޠީފް ވިދާޅުވެއްޖެއެވެ.

ވިލާ ކޮލެޖުގެ ސްޓޫޑެންޓް އެޗީވްމެންޓްސް އެވޯޑްސް ރަސްމިއްޔާތުގައި ވާހަކަފުޅުދައްކަވަމުން ނައިބު ރައީސް ވިދާޅުވި ގޮތުގައި، ގާސިމް އިބްރާހީމް ގައުމަށް ކޮށްދެއްވާފައިވާ ހިދުމަތްތަކަކީ ކުޑަ ވަގުތުކޮޅެއްގެ ތެރޭގައި ކިޔައިދެވޭނެ ކަންކަމެއް ނޫނެވެ. ގާސިމްގެ ނަމުގައި ދެވޭ އެކްސެލެންސް އެވޯޑްސް ދަސްވެނިންނަށް ލިބުމަކީ އާދައިގެ ކަމެއް ނޫން ކަމަށްވެސް ނައިބު ރައީސް ފާހަގަކުރެއްވިއެވެ.

"މި ކޮލެޖުން ރަމްޒުކޮށްދޭ މި ކޮލެޖުގެ ބާނީ އޮނަރަބަލް ގާސިމް އިބްރާހީމަކީ، އަޅުގަނޑުމެން މުޅި ރާއްޖޭގެ ރައްޔިތުންނަށްޓަކައި ވަރަށް ބޮޑެތި ގުރުބާނީ ވެވަޑައިގެންނެވި، ވަރަށް ބޮޑެތި ހިދުމަތްތައް ކޮށްދެއްވާފައި ހުރި ގައުމީ ބަތަލެއްވެސްމެ،" ޖުމްހޫރީ ޕާޓީ (ޖޭޕީ)ގެ ލީޑަރު އަދި މާމިގިލީ ދާއިރާގެ މަޖިލިސް މެންބަރުކަން ވެސް ކުރައްވާ ގާސިމްއާ ގުޅޭގޮތުން ނައިބު ރައީސް ވިދާޅުވިއެވެ.

މީގެ އިތުރުން، ގާސިމް އިބްރާހީމް ޒުވާން އުމުރުން ފެށިގެން މިއަދާ ހަމައަށް ގައުމީ ހިދުމަތުގައި ހޯއްދަވާފައިވާ ތަޖުރިބާއާއި އިލްމުގެ ބޭނުން ހިފައިގެން ގައުމަށް ގިނަގުނަ ހިދުމަތްތަކެއް ކުރައްވަމުން ގެންދަވާކަން ނައިބު ރައީސް ފާހަގަކުރެއްވިއެވެ. ހާއްސަ ގޮތެއްގައި އިންސާނީ ވަސީލަތް ތަރައްގީކުރުމަށްޓަކައި ޒަމާނީ ވަސީލަތްތަކާއެކު މުޅި ރާއްޖެއަށް ގާސިމް ފަތުރުއްވައިދެއްވާފައިވާ މަސައްކަތްތަކަކީ އަބަދުވެސް ހަނދާންކޮށް ޝުކުރުވެރިވާންޖެހޭނެ ކަންކަން ކަމުގައި ނައިބު ރައީސް ސިފަކުރެއްވިއެވެ.

ރައްޔިތުންގެ މަޖިލީހުގައި އެކުގައި މަސައްކަތްކުރެއްވި ގާސިމް އިބްރާހީމް ގައުމަށް ކޮށްދެއްވަމުން ގެންދަވާ މަސައްކަތަކަށް ނައިބު ރައީސް ވަނީ ޝުކުރު ދަންނަވައިފައެވެ.