މިއަހަރަކީ ރާއްޖޭގެ ތާރީހުގައި އެންމެ ގިނައިން ޒަކާތް ދެއްކި އަހަރު ކަމަށާއި މިދިޔަ ދެ އަހަރަކީ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް އައި ދުވަސްތަކެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އެކްސްގައި މިއަދު ހިއްސާކުރެއްވި ޕޯސްޓެއްގައި މިނިސްޓަރު ވިދާޅުވީ، ރާއްޖޭގެ ޒަކާތުގެ ނިޒާމަކީ ހަރުދަނާ އުސޫލުތަކެއްގެ މައްޗަށް ބިނާވެ ގާނޫނަކުން ރައްކާތެރިކަން ލިބިފައިވާ ނިޒާމެއް ކަމަށެވެ. އަދި މިއަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް އަދަދު ވަނީ 109 އަރާފައި ކަމަށް ވިދާޅުވިއެވެ.

ޒަކާތުގެ ފައިސާ ބަލަހައްޓަމުންދަނީ މަރުކަޒީ ބޭންކުން ކަމަށާއި، އެ ފައިސާ ހޭދަކުރަމުންދަނީ އިސްލާމީ ޝަރީއަތުގައިވާ ގޮތުގެ މަތިން އާންމުކޮށްފައިވާ ޝަރީއާ ގައިޑްލައިނަކާ އެއްގޮތަށް ކަމަށްވެސް މިނިސްޓަރު ވިދާޅުވިއެވެ.

މީގެ އިތުރުން ޒަކާތުގެ ފައިސާ ހަރަދުކުރަމުންދާ ގޮތް މަހުން މަހަށް އާންމުކޮށް ހާމަކުރަމުން އަންނަ ކަމަށްވެސް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، މިދިޔަ ދެ އަހަރަކީ ޒަކާތުގެ ގޮތުގައި އެންމެ ބޮޑު އާމްދަނީއެއް ލިބި، ފަގީރުންގެ ދަފުތަރުގައިވާ ފަރާތްތަކަށް އެންމެ ބޮޑު އެހީތެރިކަމެއް ފޯރުކޮށްދެވުނު ދެ އަހަރު ކަމަށާއި އެގޮތުން މާލީ އެހީތެރިކަން ދިނުމުގެ އިތުރުން ފަގީރުންގެ ތައުލީމާއި ސިއްހީ ދާއިރާއަށްވެސް އެ ފައިސާއިން ބޮޑެތި ހަރަދުތަކެއް ކޮށްފައިވާ ކަމަށް ވިދާޅުވިއެވެ.

ރާއްޖޭގައި ޒަކާތް ބަލައިގަތުމުގެ އެންމެހާ ކަންކަން ކުރަމުންދަނީ ދައުލަތުގެ ޓެކްސް އިދާރާ މީރާ މެދުވެރިކޮށެވެ.

މީރާގެ ތަފާސްހިސާބުތައް ދައްކާ ގޮތުގައި މިދިޔަ އަހަރު ޒަކާތުގެ ގޮތުގައި މުޅި ޖުމްލަ 107,205,043 ރުފިޔާ ވަނީ ބަލައިގެންފައެވެ.