ޝަރުއީ ކޯޓުތަކަށް ހުށަހަޅާ މައްސަލަތަކުގައި ގޮތް ކަނޑައެޅުމުގެ އިހުތިޔާރު އާޓިފިޝަލް އިންޓެލިޖެންސް (އޭއައި) އަށް ދޫކޮށްލުމަކީ ކުރެވޭނެ ކަމެއް ނޫން ކަމަށާއި ނަމަވެސް މައްސަލަތައް ނުނިމި ލަސްވާ ސަބަބުތައް ދެނެގަތުމަށް ޓެކްނޮލޮޖީ ބޭނުންކުރެވިދާނެ ކަމަށް އުއްތަމަ ފަނޑިޔާރު އަބްދުއްގަނީ މުހައްމަދު ވިދާޅުވެއްޖެއެވެ.

އުއްތަމަ ފަނޑިޔާރު މިހެން ވިދާޅުވީ އުޒްބެކިސްތާނުގެ ސަމަރުގަންދުގައި ބޭއްވި އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް (އޭއޭސީސީ) ގެ ހަތް ވަނަ ކޮންގްރެސްގައި ތަގުރީރުކުރައްވަމުންނެވެ.

އަދުލު އިންސާފު ގާއިމުކުރުމުގެ ފެންވަރު މަތިކޮށް، އަވަސް އިންސާފެއް ހޯދައިދިނުމުގައި ޑިޖިޓަލް ޓެކްނޮލޮޖީގެ ދައުރާ ގުޅޭގޮތުން ވާހަކަދައްކަވަމުން އުއްތަމަ ފަނޑިޔާރު ވިދާޅުވީ، ޓެކްނޮލޮޖީ ކިތަންމެ ކުރިއަރައި ދިޔަ ނަމަވެސް ފަނޑިޔާރުންގެ ޒިންމާ އަލްގޯރިދަމްތަކަކަށް ދޫކޮށްލައިގެން ނުވާނެ ކަމަށެވެ. އޭގެ ބަދަލުގައި ޝަރުއީ ދާއިރާތަކުން އިސްކަންދޭންވާނީ އޭއައި އަކީ މަސައްކަތްތަކަށް އެހީތެރިވެދޭ ވަސީލަތެއްގެ ގޮތުގައި ބޭނުންކުރުމަށް ކަމަށް ވިދާޅުވިއެވެ.

ރާއްޖޭގެ ކޯޓުތަކުގައި މައްސަލަތައް ނުނިމި ލަސްވާ ސަބަބުތައް ދެނެގަތުމަށާއި، ޝަރީއަތްތައް އަވަސްކުރުމަށް ޒަމާނީ ޓެކްނޮލޮޖީގެ އެހީތެރިކަން ހޯދަމުންދާ ގޮތްތަކަށް ބަލަން ޖެހޭ ކަމަށް އުއްތަމަ ފަނޑިޔާރު ފާހަގަކުރެއްވިއެވެ. އެގޮތުން، ރާއްޖޭގެ ޝަރުއީ ނިޒާމުގެ ތެރޭގައި ފުރިހަމަ ކޭސް މެނޭޖްމަންޓް ސިސްޓަމެއް ގާއިމުކުރުމަކީ މި ތަސައްވުރުގެ މުހިންމު ލަނޑުދަނޑިއެއް ކަމަށް ވިދާޅުވިއެވެ.

މި ކޮންގްރެސްގެ ހަވާސާގައި، އެހެން ގައުމުތަކުގެ އުއްތަމަ ފަނޑިޔާރުންނާއި ދުސްތޫރީ ކޯޓުތަކުގެ އިސްވެރިންނާއެކު ބޭއްވި މުހިންމު ބައްދަލުވުންތަކެއްގައި އުއްތަމަ ފަނޑިޔާރު ބައިވެރިވެވަޑައިގެންނެވިއެވެ. އޭއޭސީސީގެ ކޮންގްރެސް ނިންމާލާފައިވަނީ ދުސްތޫރީ ކޯޓުތަކުގައި ޒިންމާދާރުކަމާ އެކު އޭއައި ބޭނުންކުރުމާ ބެހޭގޮތުން އެކުލަވާލި "ސަމަރުގަންދު ޑިކްލަރޭޝަން" ފާސްކުރުމަށް ފަހުގައެވެ.