އިންޑޮނޭޝިއާގެ ބާލީގައި ހިނގި އެކްސިޑެންޓެއްގައި ބޮލީވުޑްގެ ބަތަލާ ނުޝްރަތު ބަރޫޗާގެ މައިބަދައިގެ ކަށިގަނޑެއް ބިނދި، އިތުރު ފަރުވާއަށް އެއަރ އެމްބިއުލާންސެއްގައި އިންޑިއާގެ މުމްބާއީއަށް ގެންގޮސްފިއެވެ.

ނުޝްރަތުގެ ޓީމުން ނެރުނު ބަޔާނެއްގައި ބުނި ގޮތުގައި، އޭނާ ބާލީއަށް ދިޔައީ ޗުއްޓީ ހޭދަކުރުމުގެ އިތުރުން މަސައްކަތުގެ ބޭނުމަކުއެވެ. އެކްސިޑެންޓަށް ފަހު ބާލީގެ ހޮސްޕިޓަލެއްގައި ފުރަތަމަ ފަރުވާ ދިނުމަށްފަހު، މުމްބާއީއަށް ގެންދިޔައީ މައިބަދައިގެ ސާޖަރީއެއް ކުރުމަށެވެ. މުމްބާއީއަށް ގެންދިއުމަށްފަހު ހޮސްޕިޓަލަށް ވެއްދި ވަގުތު، ސްޓްރެޗަރެއްގައި އޭނާ އޮތް މަންޒަރު ފެންނަ ވީޑިއޯތަކެއް ސޯޝަލް މީޑިއާގައި ވަނީ އާންމުވެފައެވެ. މި ވީޑިއޯތަކުން ފެންނަ ގޮތުގައި އޭނާގެ އާއިލާގެ މެންބަރުންނާއި މެޑިކަލް ޓީމުން ދިޔައީ އޭނާއަށް އެހީތެރިކަން ފޯރުކޮށްދެމުންނެވެ.

ނުޝްރަތުގެ ޓީމުން ބުނީ މިވަގުތު އެންމެ އިސްކަމެއް ދެނީ އޭނާގެ ސިއްހަތަށް ކަމަށާއި، ބޭނުންވާ ފަރުވާ ކަށަވަރުކުރުމަށް ކަމަށެވެ. ލިބިފައިވާ އަނިޔާގެ ކުޑަބޮޑުމިނާއި ކުރާން ޖެހޭ ސާޖަރީގެ ސަބަބުން، އަރާމުކުރަން ގިނަ ވަގުތު ބޭނުންވާނެތީ ކުރިއަށް އޮތް ހަފުތާތަކުގައި އޭނާގެ މަސައްކަތްތަކަށް ބުރޫއަރާނެ ކަމަށް ވެސް އެ ޓީމުން ފާހަގަކުރިއެވެ. މީގެ އިތުރުން، މި ދަނޑިވަޅުގައި ނުޝްރަތުގެ ޕްރައިވެސީއަށް އިހުތިރާމުކުރުމަށް ޓީމުން ވަނީ އެދިފައެވެ.

މި އެކްސިޑެންޓް ހިނގަން މެދުވެރިވި ސީދާ ސަބަބެއް އޭނާގެ ޓީމުން ބުނެފައެއް ނުވެއެވެ. އިންޑިއާގެ މީޑިއާތަކުން ރިޕޯޓުކޮށްފައިވާ ގޮތުގައި، ނުޝްރަތު ދެން އެންމެ އަވަހަށް ފެންނާނީ ޑައިރެކްޓަރު ރޭމޯ ޑިސޫޒާގެ އެކްޝަން ފިލްމަކުން ޓައިގާ ޝްރޮފްއާ އެކުގައެވެ. ނަމަވެސް ސާޖަރީއަށްފަހު އޭނާ އެނބުރި މަސައްކަތަށް ނުކުންނާނެ ތާރީހެއް އަދި ކަށަވަރުވެފައެއް ނުވެއެވެ.