އޭއައި އޭޖެންޓުންގެ ސަބަބުން ކުރިމަތިވެދާނެ ނުރައްކާތަކުން ސަލާމަތްވުމަށްޓަކައި، މެކްއޯއެސްގެ "ފުލް ޑިސްކް އެކްސެސް" އަށް ބަދަލުތަކެއް ގެންނަން ނިންމައިފި ކަމަށް އެޕަލް އިން އިއުލާންކޮށްފިއެވެ.

އެޕަލްގެ ޑިވެލޮޕަރުންގެ ވެބްސައިޓުގައި އޮކްޓޯބަރު 2 ވަނަ ދުވަހު އާންމުކުރި ބަޔާނެއްގައި ބުނެފައިވާ ގޮތުގައި، ކުރިއަށް އޮތް ތަނުގައި މި އެކްސެސް ދެވޭނީ ބޭނުންކުރާ ފަރާތުގެ ވަރަށް ސާފު ހުއްދައަކާ އެކުގައެވެ. މީގެ ކުރިން ބެކަޕް އެޕްލިކޭޝަންތަކަށް ހާއްސަކޮށްފައިވާ މި ފީޗާ، ބައެއް ޑިވެލޮޕަރުން ބޭނުންކުރަމުންދަނީ ޔޫޒަރުންނަށް ނުރައްކާވެދާނެ ގޮތަކަށް ކަމަށް އެ ކުންފުނިން ފާހަގަކުރިއެވެ.

އެޕަލް އިން ބުނި ގޮތުގައި، ފުލް ޑިސްކް އެކްސެސް މެދުވެރިކޮށް ޔޫޒަރުންނަށް ނޭނގި ފައިލްތަކާއި، އީމެއިލް އާއި، މެސެޖުތަކުގެ އިތުރުން ބްރައުޒިން ހިސްޓްރީ ވެސް ހާމަވެގެންދިއުމުގެ ފުރުސަތު އޮވެއެވެ.

މީގެ އިތުރުން، މުއާސަލާތުކުރުމަށް ބޭނުންކުރާ އެޕްލިކޭޝަންތަކުގެ ސަބަބުން، ޔޫޒަރުންނާ މުއާމަލާތްކުރާ އެހެން މީހުންގެ ޕްރައިވެސީއަށް ވެސް އަސަރުކުރާނެ ކަމަށް އެޕަލް އިން ބުނެފައިވެއެވެ.

"އޭއައި އޭޖެންޓުންގެ ގާބިލުކަން އިތުރުވެ، އަމިއްލައަށް ކަންކަން ކުރުމުގެ ބާރު ލިބޭ ވަރަކަށް، މިފަދަ އެކްސެސްއަކާ ގުޅިފައިވާ ނުރައްކާތައް ވަރަށް ބޮޑަށް އިތުރުވެގެންދާނެ،" އެޕަލްގެ ބަޔާނުގައި ބުނެފައިވެއެވެ.

މި ބަދަލު ގެންނާން އެޕަލް އިން ނިންމާފައި މިވަނީ، މެޓާގެ "މިއުޒް" އަދި އޯޕަންއޭއައިގެ "ޑޮޓްސް" ފަދަ އޭއައި އޭޖެންޓުން އާންމުވަމުންދާ ދަނޑިވަޅެއްގައެވެ. މިސާލަކަށް، 'އިންކް' މެގަޒިންގެ ކޮލަމިސްޓް ޖޭސަން އޭޓެން ދާދި ފަހުން ރިޕޯޓުކޮށްފައިވާ ގޮތުގައި، އޭނާ ހުއްދަ ނުދެނީސް މެޓާގެ މިއުޒް އޭޖެންޓުން ވަނީ އޭނާގެ ޕްރައިވެޓް މެސެޖުތައް ކިޔައިފައެވެ.

މި އާ ކޮންޓްރޯލްތައް ތައާރަފުކުރާނެ ވަކި ތާރީހެއް ނުވަތަ މެކްއޯއެސްގެ ކޮން ވަޝަންތަކަކަށް ކަމެއް އެޕަލް އިން އަދި ހާމަކޮށްފައެއް ނުވެއެވެ.