(25 ސެޕްޓެމްބަރުގެ އަދަދާ ގުޅޭ)

ނިރުމަލާ ޖަވާބު ދެއްވިއެވެ. "އެއީ މުޅިއަކުން އިއްތިފާޤެއް ވެސް ނޫނެވެ. މި ރަށުގެ އަންހެންވެރީން އަޅުގަނޑު ގާތު ބުންޏެވެ. ޝަކުންތަލާގެ ކޮޓަރިކޮޅަށް ލަކްޝަމީ ދޭވީ ވަޑައިގަންނަވައެވެ. ޝަކުންތަލާ، އެ ދޭވީގެ އިންތިޒާރުގައި ކޮޓަރިކޮޅު އަބަދުވެސް ބަހައްޓަވަނީ ދިއްލަވައިފައެވެ. އަވަށުގެ އަންހެން ވެރީން އަޅުގަނޑު ގާތު އެ ވާހަކަ ބުނުމުން، އަޅުގަނޑު ވެސް އުޅޭ ހިތް ވީ މި ކޮޓަރީގައެވެ. ނިދާ އިރު ވެސް ބަހައްޓަނީ ކޮޓަރީގެ ބައްތި ދިއްލައިފައެވެ. އަޅުގަނޑުގެ ކޮޓަރީގެ އަލިކަން ކޮންމެވެސް ދުވަހަކުން މަނިކުފާނަށް ކެހި ދޭނެކަމަށް އަޅުގަނޑަށް ހުވަފެނެއްގައި ވެސް ހީ ކުރެވިފައެއް ނެތެވެ. އަޅުގަނޑު މި ދަންނަވަނީ ތެދަށެވެ. އަޅުގަނޑު ޝަކުންތަލާއެއް ނުދެކެމެވެ. އަޅުގަނޑު މި ރަށަށް އައީ ވެސް އެކަމަނާ ގެއްލުނުތާ ދެތިން ދުވަސް ފަހުންނެވެ. އަޅުގަނޑު އެކަމަނާ ދުށް ނަމަ، ބައްޕާފުޅުގެ ކޯފާއަށް ގަންނަ ބިރަށް ވެސް އަޅުގަނޑު އެކަމަނާ ޙިމާޔަތް ކުރުމުން އެއްކިބައެއް ނުކުރެވުނީހެވެ. ނަމަވެސް އަޅުގަނޑު ނިހާޔަތަށް ހިތާމަ ކުރަމެވެ. އަޅުގަނޑުގެ ކިބައިން އެކަމަނާއަކަށް އެއްވެސް ބޭނުންފުޅެއް ނުފުދުނެވެ. އަޅުގަނޑު މިހެން މި ދެންނެވީ މަނިކުފާނުގެ ހަމްދަރުދީ ހޯދާކަށެއް ނޫނެވެ. މިއީ އަންހެނަކާ މެދު އަންހެނެއްގެ ޖަޒުބާތެވެ. އަޅުގަނޑުގެ ބައްޕާފުޅުގެ ދުޝްމަންގެ އަރިހުން އަޅުގަނޑު އޯގާވެރިކަމަށް އެދި ސަލާމެއް ނުޖަހާނަމެވެ. އަޅުގަނޑުގެ ކިބައިން މަނިކުފާނުގެ ކޮއްކޯފުޅުގެ ބަދަލު ހިއްޕެވުމުން މަނިކުފާނުގެ ހިތްޕުޅަށް ހަމަޖެހުމެއް ލިބިވަޑައިގަންނަވާނެ ކަމުގައި ވާނަމަ، އަޅުގަނޑު މިހިރީއެވެ. އަޅުގަނޑުމެން ދެމީހުންނަކީ އެކަކު އަނެކެއްގެ ދުޝްމަނުންނެވެ. އަޅުގަނޑަކީ ޖޭކްރިޝަންގެ އަންހެން ދަރިޔަކީމެވެ. މަނިކުފާނަކީ މޯހަންޗަންދުގެ ދަރިކަލެކެވެ. ދެންމެ އަޅުގަނޑުގެ ހިތްވަރު އެލޭ ގޮތް ނުވި ނަމަ އަޅުގަނޑު މަނިކުފާނު ޤަތުލު ކޮށްލީމުހެވެ. ޝަކުންތަލާއާ މެދު ހަމްދަރުދީ ވުމާ އެކު ވެސް މަނިކުފާނު ޤަތުލު ކޮށްލުމަކީ އަޅުގަނޑުގެ ވާޖިބެކެވެ. މަނިކުފާނަށް ވެސް މަނިކުފާނުގެ ވާޖިބު އަދާ ކުރައްވާން ޖެހިވަޑައިގަންނަވާނެއެވެ."

ރަންބީރު ހުންނެވީ އެއްވެސް ޙިއްސެއް ޙަރަކާތެއް ނެތިއެވެ. ހުއްޓުން އަރައިފައެވެ. އޭނާއަށް ނިރުމަލާއާ ހަތަރުކަޅި ހަމަ ކޮށްލައްވާކަށެއް ކެރިވަޑައެއްނުގެންނެވިއެވެ. އޭނާގެ ކުރިފުޅުމަތީގައި ވަނީ އަންހެން ކުއްޖެކެވެ. ކޮން ކަހަލަ އަންހެން ކުއްޖެއްތޯއެވެ؟ އެ ކުއްޖެއްގެ ލުއިލުއި ހިނިތުންވުމަކުން ވެސް، ފުރާނަ ނެތް ހިލަ ފަރުބަދަތަކުން ވެސް ލޯބީގެ ރާގު އުފައްދައިލާ ފަދަ ކުއްޖެކެވެ. އެ ކުއްޖެއްގެ ކަރުނަ ޖައްލާދެއްގެ މޭގައި ވެސް ރިހުން އުފައްދައިލާ ފަދަ ކުއްޖެކެވެ. ޖޭކްރިޝަންގެ ދަރިކަނބަލުން އުފައްދަވައިފައި ވަނީ މީހުންނަށް އާދޭސް ކުރައްވާކަށެއް ނޫނެވެ. އަދި ކީއްތޯއެވެ. އަމުރު ކުރައްވާށެވެ.

ރަންބީރު ވިދާޅުވިއެވެ. "އަޅުގަނޑުމެން ދެ މީހުން ހައްދަވައިފައި ވަނީ އެކަކު އަނެކެއްގެ ދުޝްމަނުން ކަމުގެ ކުށްހީގައި މުޅި ޢުމުރަށް ހައްޔަރު ވެފައި ތިބުމަށެވެ. މިއީ އަޅުގަނޑުމެންގެ އެންމެ ފަހުގެ ބައްދަލުވުމެވެ. ތިޔަ ބޭފުޅާ ވަޑައިގަންނަވާނީ ކޮން އިރަކު ކޮން ތަނަކަށްކަން ކަނޑައެޅުއްވުމަކީ ތިޔަ ބޭފުޅާގެ ކަމެކެވެ."

"އަޅުގަނޑު މިހާރު ވެސް މިއިނީ ދާން ތައްޔާރަށެވެ."

"ކޮން ތަނަކަށްތޯއެވެ؟"

"ގަވާލިޔާރަށެވެ. އަޅުގަނޑުގެ މާބެގެ އަރިހަށެވެ."

"ތިޔަ ބޭފުޅާގެ ބައްޕާފުޅު ވެސް އެތާ ހުންނަވާނެތޯއެވެ؟"

"ފަހަރެއްގައި ހުންނަވައިފާނެއެވެ."

"މިހާރު ހަވީރު ވަނީއެވެ. އަޅުގަނޑު މާދަމާ ހެނދުނާ ތިޔަ ބޭފުޅާ މިތަނުން ފުރުވައިލާނަމެވެ. ތިޔަ ބޭފުޅާގެ އަރިހުގައި ދާނީ ޝަމްބޫނާތެވެ." ރަންބީރު އެހެން ވިދާޅުވެފައި ބޭރަށް ނުކުމެވަޑައިގެންފިއެވެ.

+ + + +

އެރޭގެ ރޭގަނޑު ވަރަށް ގިނަ އިރު ވާންދެން ރަންބީރު ހުންނެވީ ގޯތިތެރޭގައި ދެކޮޅަށް ހިންގަވަހިންގަވައެވެ. ރޭ ދެބައި ވި ފަހުން އޭނާ ކޮޓަރިއަށް ވަޑައިގެން އަވަހާރަފުޅު ލެއްޕެވޭތޯ މަސައްކަތްޕުޅު ކުރެއްވިއެވެ. ނަމަވެސް އޭނާގެ ލޯފުޅަކަށް އަވަހާރަފުޅެއް ނައެވެ. އޭނާގެ ހިތްޕުޅާއި ސިކުނޑިފުޅުގައި ނިރުމަލާގެ ތަސްވީރު ވަނީ ވަނީ ބިންވަޅު ނެގިފައެވެ. އޭނާ ހާރުދަމު ޖެހިގެން ހުރި ކޮޓަރިއަށް ވަޑައިގެން ރާމްނާތަށް ވިދާޅުވެ ހޭލައްވައިފިއެވެ. އޭނާ ގޮވައިގެން ވަޑައިގެންނެވީ ކޯރުގެ އައްސޭރިއަށެވެ. ކުރީ ދުވަހުގެ ހަވީރު ރަންބީރު ވަނީ ނިރުމަލާ ގަވާލިޔާރަށް ވަޑައިގަންނަވާ ވާހަކަ އާއި، ނިރުމަލާ ގަނޑުވަރުން ނުކުމެވަޑައިގަންނަވާ ވަގުތު އޭނާ ފެނިވަޑައިގަންނަވާ ހިސާބުގައި ހުންނަވާން ބޭނުންފުޅު ނޫން ވާހަކަ ރާމްނާތުގެ އަރިހުގައި ވިދާޅުވެފައެވެ. ރާމްނާތަށް ރަންބީރުގެ މޫނުފުޅުމަތީން އޭނާގެ ހިތްޕުޅުގެ ޙާލުކޮޅު ވަނީ އެނގިވަޑައިގެންފައެވެ.

ރާމްނާތު އެއްވެސް އެއްޗެކޭ ވިދާޅެއް ނުވެއެވެ. ކޯރުގެ އައްސޭރީން ހިންގަވަމުން ދެ ބޭފުޅުންނަށް ވަރަށް ދުރަށް ވަޑައިގެންނެވިއްޖެއެވެ. ރަންބީރު ވަރުބަލިފުޅު ވުމުން، ތަނެއްގައި އިށީނދެވަޑައިގެންފިއެވެ. ރާމްނާތު ވިދާޅުވިއެވެ. "އޭނާ ވަރަށް ރީތި ކަމުގައި ބުނާތީ އަޅުގަނޑު އެހީމެވެ."

ރަންބީރު ޖަވާބު ދެއްވިއެވެ. "އަޅުގަނޑަކަށް ނޭނގެއެވެ. އަޅުގަނޑަށް އެނގޭ ވަރަކީ އަޅުގަނޑަށް ފަރުވާތެރިކަމާ އެކު އޭނާގެ މޫނުފުޅާ ދިމާޔަށް ބަލާން ނުކެރޭ ވާހަކައެވެ. ނިރުމަލާ އަކީ ހަމައެކަނި އަންހެން ބޭފުޅެއްގެ ނަމެއް ނޫނެވެ. ހިތްތައް ތަޅުވައިފޮޅުވައި އޮޔާ ގެންދާ ބާރެއްގެ ނަމެކެވެ. ބަލާ މީހާގެ ކަޅި އޭނާގެ މޫނުފުޅަށް ހުއްޓުމުގެ ބަދަލުގައި ދަނީ އެކި ފަރާތްފަރާތަށް ވިއްސިވިހާލި ވެގެންނެވެ. މަނިކުފާނަކީ ޝާޢިރަކީމުއެވެ. އަޅުގަނޑަށް ވުރެ މި ކަހަލަ ކަންތައް މާ ރަނގަޅަށް މަނިކުފާނަށް އެނގިވަޑައިގަންނަވާނެއެވެ."

ރާމްނާތު ވިދާޅުވިއެވެ. "އެއީ ޖޭކްރިޝަންގެ ދަރިކަނބަލަކަށް ނުވާ ނަމަ، މަނިކުފާނު ހައްދަވާނީ ކިހިނަކުންތޯއެވެ؟"

"އަޅުގަނޑަކަށެއް ނޭނގެއެވެ. އޭނާ ވަޑައިގަތުމަކީ، އަޅުގަނޑު ހިތްދަތި ވާ ކަމަކަށް ވީސްކަންނޭނގެއެވެ."

"މިހާރު އޭނާ ވަޑައިގަންނަވާތީ މަނިކުފާނުގެ ހިތްޕުޅަށް ދަތިކަން ލިބިވަޑައިނުގަންނަވާކަން ޔަޤީންތޯއެވެ؟ މަނިކުފާނު މި ރޭ ހަތަރުދަމު އަވަހާރަފުޅެއް ނުލައްޕަވަމުއެވެ. މި ވަގުތު މަނިކުފާނު ގަނޑުވަރާ ދުރަށް ވަޑައިގަތުމުން ސާބިތު ވަނީ މަނިކުފާނުގެ ކިބައިގައި ހިތި ޙަޤީޤަތަކާ ކުރިމަތި ލެއްވުމުގެ ހިތްވަރުފުޅެއް ނެތްކަމެވެ."

"އަޅުގަނޑު ދެވަނަ ފަހަރަށް އޭނާ ނުދެކޭންކަމަށް އިއްޔެ ކަނޑައަޅައިފީމެވެ."

"މަނިކުފާނުގެ ތިޔަ ކަނޑައެޅުއްވުމާ އެއްގޮތަށް ސާބިތު ވެވަޑައިގެން ހުންނަވާން މަނިކުފާނު ގަސްތު ކުރައްވަމުތޯއެވެ؟"

"އާދޭހެވެ! އަޅުގަނޑުގެ ކެތްތެރިކަން ކިތަންމެ ކުޑަ ކުރި ކަމުގައި ވިޔަސް އަޅުގަނޑުމެން ދެމީހުން އެކަކު އަނެކަކާ ދުވަހަކުވެސް ނުގުޅޭނެއެވެ."

ރާމްނާތު ސުވާލު ކުރެއްވިއެވެ. "އޭނާ މަނިކުފާނާ މެދު ޚިޔާލު ކުރައްވަނީ ކޮން ގޮތަކަށްތޯއެވެ؟"

"އަޅުގަނޑު މަނިކުފާނުގެ އަރިހުގައި ދަންނަވާން ހަނދާން ނެތުނީއެވެ. އޭނާ އަޅުގަނޑު ޤަތުލު ކުރައްވާން ވެސް އުޅުއްވައިފިއެވެ."

"ތިޔަހެން ވީއިރު، އޭނާގެ ޙާލުކޮޅާ މެދު މަނިކުފާނަށް ވުރެ ވެސް މާ ބޮޑަށް ރަޙުމު ކުރުން ޙައްޤެވެ."

"އެއީ ކީއްވެގެންތޯއެވެ؟"

"އޭނާ މަނިކުފާނު ދެކެ އިންތިހާޔަށް ލޯބިފުޅު ވެއެވެ."

"މަނިކުފާނަކީ ޙަޤީޤަތުގައި ވެސް ޝާޢިރަކީމުއެވެ. ދެން ތިޔަ ވާހަކަ ހުއްޓައިލައްވައިފައި އެހެން ކޮންމެވެސް ވާހަކަފުޅެއް ދައްކަމާ ހިންގަވާށެވެ."

އިރު އެރި ވަގުތު ރަންބީރު އެނބުރި ގެއަށް ވަޑައިގަތުމުން، އެނގިވަޑައިގަތީ ނިރުމަލާ ވަޑައިގެންފިކަމެވެ.

އިރުކޮޅެއްގެ ފަހުން ރަންބީރު އޭނާގެ ކޮޓަރީގައި އިންނަވަނިކޮށް، ކޮންމެވެސް މީހަކު މެދުކޮޓަރިތެރެޔަށް ހުޅުވޭ ދޮރުގައި ޓަކި ދީފިއެވެ.

"ކާކުހެއްޔެވެ؟" ރަންބީރު ސުވާލު ކުރެއްވިއެވެ.

ނިރުމަލާގެ ޚާދިމާއެއް ދޮރު ހުޅުވައިލައިފައި އެތެރެޔަށް ވަދެއްޖެއެވެ. އޭނާގެ އަތުގައި ކުޑަ ކޮތަޅެއް އޮތެވެ. އޭނާ ދެންނެވިއެވެ. "ނިރުމަލާ ވަޑައިގަތީ މި ކޮތަޅު އަޅުގަނޑާ ޙަވާލު ކުރައްވައިފައެވެ. އޭނާ ވިދާޅުވެފައި ވަނީ މަނިކުފާނުގެ އަރިހަށް ރައްދު ކުރާށެވެ. މި ކޮތަޅުގައި ހުރީ އެއްކަލަ ދުވަހު މަނިކުފާނު އަތުލައްވާން ޤަބޫލުފުޅު ވެވަޑައިނުގެންނެވި ގަހަނާކޮޅުތަކެވެ."

ރަންބީރު ވިދާޅުވިއެވެ. "ކަލޭ ތިޔައިގައި ހިފީ ކީއްވެގެން ހެއްޔެވެ؟"

"އަޅުގަނޑު އޭނާގެ އަރިހުގައި މަނިކުފާނު ކޯފާ ވާނެ ވާހަކަ ދެންނެވީމެވެ. ނަމަވެސް އޭނާ މި ކޮތަޅު އެއްލައިލައްވައިފައި ވަޑައިގަތީއެވެ."

"އެންމެ ރަނގަޅެވެ. ތިޔަ އެއްޗެތި ކަލޭގެ އަތުގައި ބަހައްޓާށެވެ."

ޚާދިމާ ދެންނެވިއެވެ. "އަޅުގަނޑުމެންނާ މެދު މަނިކުފާނުގެ އަމުރުފުޅަކީ ކޮބައިތޯއެވެ؟"

"ކޮން ކަހަލަ އަމުރެއް ހެއްޔެވެ؟"

"އަޅުގަނޑުމެން މިތާނގައި ތިބުމާ މެދުގައެވެ."

"ކަލޭމެން މިތާނގައި ތިބޭން ގަސްތު ކުރާ ނަމަ، އަހަރެން އުފާ ވާނެއެވެ."

ޚާދިމާ ހެޔޮ ދުޢާ ކުރަމުން އެ ކޮޓަރީން ބޭރަށް ނުކުމެއްޖެއެވެ.

(ނުނިމޭ)