ހޮރުމުޒް ކަނޑުއޮޅިން ދަތުރުކުރަމުންދިޔަ ސުޕަޓޭންކަރަކަށް ކޯއްޗެއްކަން ނޭނގޭ އެއްޗެއް އަމާޒުވެ، އެ އުޅަނދުގައި އަލިފާން ރޯވެފައިވާ ކަމަށް އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ބުނެފިއެވެ.

ޔޫކޭއެމްޓީއޯއިން ނެރުނު ބަޔާނެއްގައި ބުނި ގޮތުގައި، އިއްޔެގެ ޖީއެމްޓީން 17:50 ގައި ހިނގި މި ހާދިސާގެ މައުލޫމާތު އެ އިދާރާއަށް ލިބުނީ ތިންވަނަ ފަރާތަކުން ކަމަށެވެ. މި ހަމަލާއާ ގުޅިގެން އުޅަނދުގައި ރޯވި އަލިފާންގަނޑުގެ ސަބަބުން އުޅަނދަށް ލިބުނު ގެއްލުމުގެ ތަފުސީލާއި ކަނޑަށް ތެޔޮ އެޅި ތިމާވެއްޓަށް އެއްވެސް އަސަރެއް ކޮށްފައިވާކަން އަދި ކަށަވަރުވެފައި ނުވާ ކަމަށް އެ އިދާރާއިން ބުނެފައިވެއެވެ.

ނަމަވެސް، މި ހާދިސާގައި އުޅަނދުގެ ހުރިހާ ފަޅުވެރިން ސަލާމަތުން ތިބި ކަމަށް ރަސްމީކޮށް ރިޕޯޓުކޮށްފައިވާ ކަމަށް ޔޫކޭއެމްޓީއޯއިން ފާހަގަކުރިއެވެ.

ގާތްގަނޑަކަށް 2.5 މިލިއަން ފީފާގެ ތެޔޮ އުފުލޭ މި އުޅަނދަށް އަމާޒުވީ ކޮން ބާވަތެއްގެ ހަތިޔާރެއް ނުވަތަ އެއްޗެއް ކަމާއި އެ ފޮނުވާލީ ކޮން ފަރާތަކުންކަން އަދި ކަށަވަރުކުރެވިފައެއް ނުވެއެވެ. އަދި އެއީ ކޮން ގައުމެއްގެ ދިދައެއްގެ ދަށުން ދަތުރުކުރަމުންދިޔަ، ކޮން ކުންފުންޏަކަށް ނިސްބަތްވާ އުޅަނދެއް ކަމެއް ވެސް ޔޫކޭއެމްޓީއޯގެ ރިޕޯޓުގައި ހާމަކޮށްފައެއް ނުވެއެވެ. އެ އިދާރާއިން މި ހާދިސާ ސިފަކޮށްފައި ވަނީ އުޅަނދަށް ދިން ހަމަލާއެއްގެ ގޮތުގައެވެ.

ކަމާބެހޭ ފަރާތްތަކުން މި ހާދިސާ އިތުރަށް ތަހުގީގުކުރަމުން ދާ އިރު، ހޮރުމުޒް ކަނޑުއޮޅިން ދަތުރުކުރާ އެހެނިހެން އުޅަނދުތަކުން ސަމާލުވުމަށާއި ޝައްކުކުރެވޭ ފަދަ ކަމެއް ފެނިއްޖެނަމަ ލަސްނުކޮށް އެ އިދާރާއަށް އެންގުމަށް ޔޫކޭއެމްޓީއޯއިން ވަނީ އަންގައިފައެވެ.