ނުކުޅެދުންތެރިކަން ހުންނަ ފަރާތްތަކަށް ހުރި ދަތިތައް ބަލައި، ފުރުސަތުތައް ފަހިކޮށްދިނުމަށް މަސައްކަތްކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

"ރައްޔިތުންގެ އަޑު" ޕްރޮގްރާމުގެ މިރޭގެ އެޕިސޯޑުގައި ޑައުންސިންޑްރޯމް ހުންނަ ކުއްޖެއްގެ ބެލެނިވެރިއެއް ކަމަށްވާ ފާތިމަތު ފައިރޫޒާ އާދަމް ވަނީ ގިނަ ކަންބޮޑުވުންތަކެއް ހިއްސާކުރައްވައިފައެވެ. އޭގެ ތެރޭގައި ތައުލީމު ހާސިލުކުރުމުގައި އަދި ކުޅިވަރުގެ ހަރަކާތްތަކުގައި ނުކުޅެދުންތެރިކަން ހުންނަ ކުދިންނަށް ކުރިމަތިވާ ދަތިތަކާ ގުޅޭ ކަންބޮޑުވުންތައް ހިމެނެއެވެ.

ފައިރޫޒާ ކަންބޮޑުވުންތައް ފާހަގަކުރަމުން ބުނި ގޮތުގައި އޭނާގެ ދަރިފުޅު ސާރާ، އިންކްލޫސިވް ތައުލީމު ފޯރުކޮށްދޭ ކަމަށް ޕްރޮމޯޓުކުރި ފަސް ޕްރައިވެޓް ސްކޫލަކަށް ވެއްދުމަށް މަސައްކަތްކުރި ނަމަވެސް، ބޭރުފުށުން ޑައުންސިންޑްރޯމް ހުންނަކަން ފާހަގަވާތީ އެ ފުރުސަތުދީފައެއް ނުވެއެވެ. އޭގެ ފަހުން އުމުރުން ހަތް އަހަރުގައި ގްރޭޑް އެކަކަށް އިމާދުއްދީން ސްކޫލަށް ވެއްދުމަށްފަހު، ޖަމާލުއްދީން ސްކޫލު އެއަށްވުރެ ރަނގަޅު ކަމަށް ފެންނާތީ އެ ސްކޫލަށް ފަހުން ދަރިފުޅު ވައްދާފައިވާ ކަމަށް އޭނާ ބުންޏެވެ.

ތައުލީމުގެ ގޮތުން ޖަމާލުއްދީނަކީ ރަނގަޅު ސްކޫލެއް ނަމަވެސް، ނުކުޅެދުންތެރިކަން ހުންނަ ކުދިންނަށް ވެސް އެސެސްމަންޓުތައް ދިނުމާއި މާކްސް ދިނުމުގައި ގެންގުޅެފައިވަނީ އެހެން ކުދިންނެކޭ ވެސް އެއްގޮތަށް ކަމަށާއި އެހެންކަމުން އުނދަގޫތަކެއް ހުރި ކަމަށެވެ. އަދި އޭގެ ފަހުން މިއަހަރު ގްރޭޑް 4 އިން ފެށިގެން ތާޖުއްދީން ސްކޫލަށް ވައްދައި، ރަނގަޅު ކުރިއެރުންތަކެއް ފާހަގަވާ ކަމަށް އޭނާ ބުންޏެވެ.

އެ ދަތިތަކަށް ހުރި ހައްލެއްގެ ގޮތުން ފައިރޫޒާ ދިން ހިޔާލެއްގެ ގޮތުގައި ފާހަގަކުރީ، އެކި ނުކުޅެދުންތެރިކަމަށް ބަލައިގެން އެގޮތަށް ތައުލީމީ ކަންކަން ކުރިއަށްގެންދެވޭނެ ގޮތަށް ފަހިކޮށްދިނުމަށެވެ. އަދި ކުދިންގެ އެފަދަ ކަންކަމަށް ބަލައިގެން ސްކޫލު ހަމަޖައްސައިދިނުމަށް ވެސް އޭނާ އެދުނެވެ.

ބޯހިޔާވަހިކަން ހޯދުމުގައި ހުރި ދަތިތަކާއި ސްޕެޝަލް އޮލިމްޕިކްސްއަށް ކުޅިވަރު ގާނޫނުގައި ހުރި ދަތިތައް އަދި އެފަދަ އެތުލީޓުންނަށް އިންޝުއަރެންސް ނުލިބުން ފަދަ ކަންކަން ވެސް ފައިރޫޒާ ފާހަގަކުރިއެވެ.

ފައިރޫޒާގެ ކަންބޮޑުވުންތަކަށްފަހު ރައީސް ވަނީ، ވީ އެންމެ ރަނގަޅަކަށް، ވީ އެންމެ އަވަހަކަށް އެކަންކަން ފަހިކޮށްދިނުމަށް މަސައްކަތްކުރައްވާނެ ޔަގީންކަން ދެއްވައިފައެވެ. އަދި އެކަންކަމުގައި ރަނގަޅު ހައްލެއް ގެނައުމަށް މަސައްކަތްކުރައްވާނެ ކަމަށް އެ މަނިކުފާނު ވިދާޅުވިއެވެ.

"މިއީ ވަކި ކުއްޖަކަށް ވަކި އާއިލާއަކާ ބެހޭ ކަމެއް ނޫން، މިކަމުގައި ޝާމިލުވާ ހުރިހާ އެންމެންނަށް ފައިދާވާނެ، މުޖުތަމައަށް ފައިދާވާނެ. އަޅުގަނޑު ބޭނުން ރާއްޖޭގެ ހުރިހާ ރައްޔިތުންނަށް ހަމަހަމަ ގޮތުގައި ވީއެންމެ ރަނގަޅަކަށް ކަންކަން ފަހިވާން، ފަހިކުރަން،" އެ މަނިކުފާނު ވިދާޅުވިއެވެ.