މޮރޮކޯގެ 18 ވަނަ ބޮޑުވަޒީރުގެ މަގާމާ ހަވާލުވެވަޑައިގަތް ފާތިމާ އައްޒަހްރާ އަލް މަންސޫރީއަށް، ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަހުނިޔާ ފޮނުއްވައިފިއެވެ.

މޮރޮކޯގެ އާ ބޮޑުވަޒީރަށް ރައީސް ފޮނުއްވި ސިޓީފުޅުގައި ވިދާޅުވި ގޮތުގައި، އެކަމަނާ އެ މަގާމާ ހަވާލުވެވަޑައިގަތުމަކީ މޮރޮކޯއަށާއި މުޅި އަރަބި ދުނިޔެއަށް ވެސް ލިބުނު ތާރީހީ މުހިންމު ކާމިޔާބީއެކެވެ.

ފާތިމާ އައްޒަހްރާއަކީ މޮރޮކޯގެ ތާރީހުގައި ބޮޑުވަޒީރުކަން ކުރައްވާ ފުރަތަމަ އަންހެން ބޭފުޅާއެވެ. އަދި މިއީ މުޅި އަރަބި ދުނިޔޭގައި ވެސް މިފަދަ އިސް މަގާމަކާ އަންހެން ބޭފުޅަކު ހަވާލުވެވަޑައިގަންނަވާ ދެވަނަ ފަހަރުކަން ފާހަގަކުރައްވައި، މިއީ ސަރަހައްދުގެ ސިޔާސީ ތާރީހުގައި ފެށުނު އާ ސަފުހާއެއް ކަމަށް ރައީސް ސިފަކުރެއްވިއެވެ.

މީގެ އިތުރުން، އަންހެނުން އިސް ސަފުގައި ހަރަކާތްތެރިވުމުގެ މުހިންމު ނަމޫނާއެއްގެ ގޮތުގައި މިކަން ފާހަގަކުރައްވައި، މިއީ ހުރިހާ ތަނެއްގައި ވެސް އަންހެނުންނަށް ލިބިގެންދިޔަ ވަރަށް ބޮޑު ހިތްވަރެއް ކަމަށް ރައީސް ވިދާޅުވިއެވެ. އަދި އަންހެނުންގެ ހައްގުތައް ކުރިއެރުވުމަށާއި، އާންމު ދިރިއުޅުމުގައި އަންހެނުންގެ ބައިވެރިވުން އިތުރުކުރުމަށް ރާއްޖެއިން އަބަދުވެސް ދޭ އަހައްމިއްޔަތުކަން އެމަނިކުފާނު ތަކުރާރުކުރެއްވިއެވެ.

ދިވެހިރާއްޖެއާއި މޮރޮކޯއާ ދެމެދު އޮތް ޒަމާންވީ ގާތް ގުޅުމުގެ މައްޗަށް އަލިއަޅުއްވާލައްވަމުން، އެ ގުޅުމަކީ އެއްބަޔަކު އަނެއް ބަޔަކަށް ކުރާ އިހުތިރާމާއި ގުޅިގެން މަސައްކަތްކުރުމުގެ މައްޗަށް ބިނާވެފައިވާ ގުޅުމެއްކަން ރައީސް ފާހަގަކުރެއްވިއެވެ. އަދި ދެ ގައުމުގެ ލާބަޔާއި މަންފާއަށްޓަކައި، މި ގުޅުން އިތުރަށް ބަދަހިކުރުމަށް މޮރޮކޯގެ އާ ބޮޑުވަޒީރާއެކު ގާތުން މަސައްކަތްކުރެއްވުމަށް ބޭނުންފުޅުވާކަން ފާހަހަކުރެއްވިއެވެ.

ރައީސްގެ ސިޓީފުޅު ނިންމަވައިލެއްވީ، ބޮޑުވަޒީރުގެ އާ މަސްއޫލިއްޔަތުތަކަށާއި، މޮރޮކޯގެ ރައްޔިތުންގެ ކުރިއެރުމާއި ފާގަތިކަމަށް ކުރައްވާ މަސައްކަތްތަކަށް ކާމިޔާބީއަށް އެދިވަޑައިގަންނަވަމުންނެވެ.