ދިރާގުގެ 38 ވަނަ އަހަރީ ދުވަހުގެ މުނާސަބަތުގައި އެ ކުންފުނީގެ ކަސްޓަމަރުންނަށް ހާއްސަ އޮފާތަކެއް މިއަދު ތައާރަފުކޮށްފިއެވެ.

މި އޮފާތައް އިއުލާނުކޮށްފައިވަނީ ދިރާގު ހެޑް އޮފީހުގައި މިއަދު ބޭއްވި ހާއްސަ ޕްރެސް ކޮންފަރެންސެއްގައެވެ. މިގޮތުން ތައާރަފުކުރި އޮފާތަކުގެ ތެރޭގައި، ދިރާގުގެ ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށް މިއަދު 38 ޖީބީގެ ޑޭޓާ މުޅިން ހިލޭ ދިނުން ހިމެނެއެވެ. ދިރާގު އެޕް މެދުވެރިކޮށް އެކްޓިވޭޓްކުރާ މި ޑޭޓާ 24 ގަޑިއިރު ވަންދެން ބޭނުންކުރެވޭނެއެވެ. މީގެ އިތުރުން، ޕްރީޕެއިޑް ކަސްޓަމަރުންނަށް ބަންގްލަދޭޝް، އިންޑިއާ، ނޭޕާލް، ސްރީލަންކާ، ޕާކިސްތާން، ފިލިޕީންސް އަދި އިންޑޮނޭޝިއާއަށް ގުޅުމަށް 38 އައިޑީޑީ މިނެޓް ވެސް ހިލޭ ލިބޭނެއެވެ.

އަހަރީ ދުވަހާ ގުޅިގެން ދިރާގުން ވަނީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ފޯނު ކޯލުތަކަށް ޖަވާބުދީ މެނޭޖުކުރާ "އައިވް" ގެ ނަމުގައި އާ ހިދުމަތެއް ވެސް ތައާރަފުކޮށްފައެވެ. މި ހިދުމަތަށް ދިރާގު އެޕް މެދުވެރިކޮށް ސަބްސްކްރައިބް ކުރެވޭނެއެވެ. ހަމައެއާއެކު، ދިރާގު ފައިބާ ބްރޯޑްބޭންޑް ބޭނުންކުރާ ކަސްޓަމަރުންގެ ތެރެއިން ޝަރުތު ހަމަވާ ފަރާތްތަކަށް، މިހާރު ގެންގުޅޭ ރައުޓަރުގެ ބަދަލުގައި ފަހުގެ އޯއެންޓީ ރައުޓަރަކަށް މުޅިން ހިލޭ އަޕްގްރޭޑް ކުރުމުގެ ފުރުސަތު ވެސް ވަނީ ހުޅުވާލައިފައެވެ.

މީގެ އިތުރުން، ދިރާގު އެލީޓް ކްލަބްގެ ޕާޓްނަރުންގެ ގޮތުގައި ހިމެނޭ 12 އައުޓްލެޓަކުން 38 ދުވަސް ވަންދެން ކޮންމެ ދުވަހަކު ހިލޭ ވައުޗަރު ލިބޭ ޕްރޮމޯޝަނެއް ވެސް ވަނީ ފަށައިފައެވެ. މި ޕްރޮމޯޝަންގެ ދަށުން ކޮންމެ އައުޓްލެޓަކަށް ވެސް އެންމެ ފުރަތަމަ ޒިޔާރަތްކުރާ 38 ކަސްޓަމަރުންނަށް ވައުޗަރެއް ލިބޭނެއެވެ. މި ވައުޗަރުތައް ބޭނުންކޮށްގެން ކެފޭ، ރެސްޓޯރަންޓް އަދި ރީޓެއިލް ފިހާރަތަކުން ވިޔަފާރިކުރުމުގެ އިތުރުން ޗުއްޓީ ހޭދަކުރުމުގެ ފުރުސަތު ވެސް ލިބޭނެ ކަމަށް އެ ކުންފުނިން ބުންޏެވެ.

މިއަދު ބޭއްވި ޕްރެސް ކޮންފަރެންސްގައި ދިރާގުގެ އާ ސީއީއޯ އަދި މެނޭޖިން ޑިރެކްޓަރު ވަލްޑީ ފެރަޑާޒް ވެސް ބައިވެރިވެވަޑައިގެންނެވިއެވެ. އޭނާ ވިދާޅުވި ގޮތުގައި ރާއްޖޭގެ އިގުތިސާދަށާއި އެހެނިހެން ސިނާއަތްތަކަށް ލިބިފައިވާ ކުރިއެރުންތަކަކީ ދިރާގުގެ ބައިވެރިވުމާ ނުލައި ތަސައްވަރުކުރަން ދަތި ކަންކަމެވެ.

"މިއަދު އަޅުގަނޑުމެން ދިރާގުގެ 38 ވަނަ އަހަރީ ދުވަސް ފާހަގަކުރަމުންދާ އިރު، ދިވެހިރާއްޖެ ހޯދާފައިވާ ކުރިއެރުމާއި ކާމިޔާބީގެ ބާރުވެރިއެއްގެ ގޮތުގައި ދިރާގުން އަދާކޮށްފައިވާ މުހިންމު ދައުރަކީ އަޅުގަނޑުމެންނަށް ލިބޭ ވަރަށް ބޮޑު ފަހުރެކެވެ،" ވަލްޑީ ވިދާޅުވިއެވެ. އަދި ރާއްޖޭގެ ރަށްތައް ގުޅުވައިދިނުމުން ފެށިގެން ޑިޖިޓަލް ބަދަލުތަކަށް މަގުފަހިކޮށްދިނުމުގައި ދިރާގުން މުހިންމު ދައުރެއް އަދާކޮށްފައިވާކަން ފާހަގަކުރައްވައި، ކަސްޓަމަރުންނާއި ޕާޓްނަރުންގެ އިތުރުން ސަރުކާރާއި މުވައްޒަފުންނަށް އޭނާ ޝުކުރު އަދާކުރެއްވިއެވެ.

ރާއްޖޭގެ ޑިޖިޓަލް ކުރިމަގު ބިނާކުރުމުގައި 1988 އިން ފެށިގެން ދިރާގުން އަންނަނީ އިސް ދައުރެއް އަދާކުރަމުންނެވެ. އެ ކުންފުނިން ވަނީ ރާއްޖޭގައި އެންމެ ފުރަތަމަ ފަހަރަށް 100 ޕަސެންޓް މޮބައިލް ކަވަރޭޖް ފޯރުކޮށްދީފައެވެ. އަދި ރާއްޖެއަށް 5ޖީގެ ހިދުމަތް ތައާރަފުކޮށް، އެ ހިދުމަތް ރާއްޖޭގެ އާބާދީގެ 73 ޕަސެންޓަށް މިހާރު ވަނީ ފުޅާކޮށްފައެވެ. މީގެ އިތުރުން، މީހުން ދިރިއުޅޭ ހުރިހާ ރަށަކަށް ފައިބާ ބްރޯޑްބޭންޑްގެ ހިދުމަތް ވެސް ދިރާގުން ވަނީ ފޯރުކޮށްދީފައެވެ.