އިރުވައި މޫސުމާ ދިމާކޮށް ދުނިޔޭގެ އެކި ކަންކޮޅުތަކުން ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނިތައް ހިފުމާއި އެތަކެތި ބަންދުކޮށްގެން ގެންގުޅުމާއި އަދި ވިޔަފާރިކުރުމަކީ މަނާ ކަމެއް ކަމަށާއި އެފަދަ އަމަލުތައް ކުރާ ފަރާތްތަކާ މެދު ގާނޫނީ ފިޔަވަޅު އަޅާނެކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން ބުނެފިއެވެ.

އެންވަޔަރަންމަންޓަލް ރެގިއުލޭޓަރީ އޮތޯރިޓީން މިއަދު ނެރުނު ބަޔާނެއްގައި ބުނީ އިރުވައި މޫސުމުގައި ރާއްޖެއަށް ހިޖުރަކުރާ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ގުދުރަތީ ގޮތުން ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާބެހޭ ގަވާއިދުގެ ދަށުން ހިމާޔަތްކުރެވިފައިވާ ދިރުންތަކެއް ކަމަށެވެ.

އެހެންކަމުން މިއިން އެއްވެސް ބާވަތެއްގެ ދޫންޏެއް ހިފައި، ފިޔަކޮށައި، ކޮށީގައި ބަންދުކޮށްގެން ގެންގުޅުމަކީ އެ ގަވާއިދުގެ ސަތާރަވަނަ މާއްދާގެ ދަށުން މަނާ ކަމެއް ކަމުގައި ބުންޏެވެ.

އެންވަޔަރަންމަންޓަލް ރެގިއުލޭޓަރީ އޮތޯރިޓީން ބުނީ އިރުވައި މޫސުމާ ދިމާކޮށް ގިނަ އަދަދަކަށް ދޫނި ހިފާ، އޮޅުދޫނީގެ ގޮތުގައި ގެންގުޅުމާއި ވިޔަފާރިކުރާކަން ފާހަގަ ކުރެވިފައިވާ ކަމަށެވެ. އަދި އެއީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއެއް ކަމަށްވާ ކޮންވެންޝަން އޮން މައިގްރޭޓަރީ ސްޕީޝީޒްއާވެސް ހިލާފު ކަމެއް ކަމަށް ބުންޏެވެ.

ރާއްޖޭގައި 2021 ވަނަ އަހަރުން ފެށިގެން 207 ބާވަތެއްގެ ދޫންޏަކީ ހިމާޔަތްކޮށްފައިވާ ދޫނީގެ ބާވަތްތަކުގެ ގޮތުގައި ކަނޑައަޅާފައިވެއެވެ.

ގަވާއިދާ ހިލާފަށް ދޫނި ހިފާ ގެންގުޅޭ ފަރާތްތަކުގެ މައުލޫމާތު އެނގޭނަމަ، އެ ފަރާތެއްގެ މައުލޫމާތާއި، ދޫނި ހިފާފައިވާ ގޭގެ ނަމާއި، ރަށާއި އަތޮޅުގެ ތަފްސީލު، ދޫނީގެ ބާވަތް އަދި ފޮޓޯއާއި ވިޑީއޯ ފަދަ ހެކިތަކާއެކު އެ އޮތޯރިޓީގެ ނަންބަރަށް 3335949 ނުވަތަ އީމެއިލް [email protected] މެދުވެރިކޮށް ރިޕޯޓުކުރުމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން ވަނީ އެދިފައެވެ.