މޯލްޑިވްސް ހައްޖު ކޯޕަރޭޝަންގެ މާލީ ހާލަތު ރަނގަޅުކޮށް، ކުންފުންޏަށް މާލީ ފައިދާ ހޯދަން ހިންގާ މަޝްރޫއުގެ ތެރޭގައި ހިމެނޭ ނިއަމް ރެސިޑެންސް އެޕާޓްމަންޓްތައް ވިއްކުމަށް މިހާތަނަށް ކޮށްފައިވާ ހުރިހާ މުއާމަލާތްތަކެއް ބާތިލުކުރަން ނިންމައިފިއެވެ.

ހުޅުމާލޭގައި އިމާރާތްކުރަމުން އަންނަ ނިއަމް ރެސިޑެންސުން އެޕާޓްމަންޓް ދޫކުރާނެ ގޮތުގެ އުސޫލް ކަނޑައަޅައި ކުންފުނީގެ މުވައްޒަފުންނާ އެކު އޮތީ ފްލެޓް ގަތުމުގެ މުއާމާލާތްތަކެއް ހިންގައިފައެވެ. މިކަމުގައި އެ ކުންފުނީގެ ކުރީގެ މެނޭޖިން ޑިރެކްޓަރު މުހައްމަދު ޝަކީލާއި އިސްވެރިންތަކެއް ވެސް ހިމެނެއެވެ.

ހައްޖު ކޯޕަރޭޝަނުން ރޭ ނެރުނު ނޫސްބަޔާނެއްގައި ބުނީ "ނިއަމް ރެސިޑެންސް" އަކީ އެ ކޯޕަރޭޝަންގެ މާލީ ހާލަތު ރަނގަޅުކޮށް، ކުންފުންޏަށް މާލީ ފައިދާ ހޯދުމަށް ކުރެވެމުން އަންނަ މަސައްކަތްތަކުގެ ތެރެއިން ތަރައްގީ ކުރުމަށް ހަމަޖެހިފައިވާ ލަގްޒަރީ ހައުސިން ޕްރޮޖެކްޓެއް ކަމަށެވެ.

މި ޕްރޮޖެކްޓުގެ ތެރެއިން ތަރައްގީ ކުރެވޭ ކޮންމެ އެޕާޓްމަންޓު ޔުނިޓަކުން ކުންފުންޏަށް އެންމެ ބޮޑު ފައިދާއެއް ލިބޭނެހެން މަސައްކަތް ކުރިއަށް ގެންދިއުމަށްޓަކައި، ޔުނިޓުތަކުގެ އަގުތައް ކަނޑައެޅުމާއި ވިއްކުމަށް އާންމުކޮށް ހުޅުވާލުމަށް ވާން ޖެހޭ އެންމެހައި ތައްޔާރީތައް ވަމުން އަންނަ ކަމަށެވެ. މި މަސައްކަތްތައް ފުރިހަމަކުރުމަށްފަހު ވަރަށް އަވަހަށް ޔުނިޓުތައް ވިއްކުމަށް އާންމުކޮށް ހުޅުވާލާނެ ކަމަށް އެ ކުންފުނިން ބުންޏެވެ.

މީގެ އިތުރުން، މި މަސައްކަތްތަކުގެ ތެރެއިން، މުވައްޒަފުންނަށް އެޕާޓްމަންޓުތައް ވިއްކުމަށްޓަކައި މިހާތަނަށް ކޮށްފައިވާ އެންމެހާ މުއާމަލާތްތައް ބާތިލު ކުރުމަށް ނިންމާފައިވާ ކަމަށްވެސް ހައްޖު ކޯޕަރޭޝަނުގެ ބަޔާނުގައި ބުނެފައިވެއެވެ.

ހައްޖު ކޯޕަރޭޝަނުން ރިއަލް އެސްޓޭޓް މަޝްރޫއެއް އިއުލާން ކުރީ 2024ގެ ކުރީކޮޅުއެވެ. އަދި ހަމަ އެ އަހަރު އެކަމަށް ބޭނުންވާ ބިމެއް ހުޅުމާލޭގެ ދެ ވަނަ ފިޔަވަހިން ވަނީ ގަނެފައެވެ.

ނިއާމް ރެސިޑެންސް ހަދަނީ ހުޅުމާލެ ދެ ވަނަ ފިޔަވަހީގެ ޕްލޮޓު ނަންބަރު 22313ގައެވެ. 15 ފަންގިފިލާ ހުންނަ މި އިމާރާތުގެ ޑިޒައިނިން ހަވާލުކުރީ ފަހި ދިރިއުޅުން ކޯޕަރޭޝަން (އެފްޑީސީ)އާއެވެ.