މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުގެ މެންބަރުކަމުން، އެ ކުންފުނީގެ އެގްޒެކްޓިވް ޑިރެކްޓަރު، ހ. ފިނޮޅު، މުހައްމަދު މިހާދު އަދި ނޮން-އެގްޒެކްޓިވް ޑިރެކްޓަރު، މ. ވެލާލުގެ، ސަހަރު ވަހީދު ވަކިކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ، އެ ދެ ބޭފުޅުން ވެސް އެމްއޭސީއެލްގެ ޑިރެކްޓަރުންގެ ބޯޑުގެ މެންބަރުކަމުން ވަކިކޮށްފައިވަނީ މިއަދު ކަމަށެވެ.

ނަމަވެސް އެ ދެ ބޭފުޅުން ބޯޑުން ވަކިކުރި ސަބަބެއް ޕީސީބީން ހާމަކޮށްފައެއް ނުވެއެވެ.

އެމްއޭސީއެލްގެ ބޯޑަށް 26 އެޕްރީލް 2025 ގައި އައްޔަންކުރެއްވި މިހާދަކީ އެ ކުންފުނީގެ ޗީފް ކޮމާޝަލް އޮފިސަރު (ސީސީއޯ) ގެ މަގާމު ވެސް ފުރުއްވަމުން ގެންދަވާ ބޭފުޅެކެވެ.

މިހާދު ވަނީ މީގެކުރިން އެސްޓީއޯގެ ސީއެފްއޯގެ މަގާމާއި އެ ކުންފުނީގެ ބޯޑު މެންބަރުކަމުގެ އިތުރުން އެފްއެސްއެމްގެ ޗެއާމަންކަމާއި މިފްކޯ އަދި އެމްއެސްއެސްގެ ބޯޑު މެންބަރުކަން ކުރައްވައިފައެވެ.

ސަހަރު، އެމްއޭސީއެލްގެ ބޯޑަށް އައްޔަން ކުރީ 24 ޑިސެމްބަރު 2023 ގައެވެ. އޭނާ ވަނީ މާލީ ދާއިރާގެ އިސް މަގާމުތަކުގައި 17 އަހަރަށްވުރެ ގިނަ ދުވަހު ހިދުމަތް ކުރައްވައިފައެވެ.