ރާއްޖޭގެ ތަރައްގީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޗައިނާގެ ގައުމީ ދުވަހުގެ މުނާސަބަތުގައި އެކްސްގައި މިއަދު ކުރެއްވި ތަހުނިޔާގެ ޕޯސްޓެއްގައެވެ.

ރައީސްގެ ޕޯސްޓުގައި ޗައިނާގެ ރައީސް ޝީ ޖިންޕިންއަށާއި އެ ގައުމުގެ ސަރުކާރާއި ރައްޔިތުންނަށް ހެޔޮ އެދުންތައް ފޮނުއްވާފައިވެއެވެ. ރާއްޖެއާއި ޗައިނާއާ ދެމެދު އޮތީ އެއް ގައުމު އަނެއް ގައުމަށް އޮތް އިހްތިރާމާއި އިތުބާރުގެ މައްޗަށް ބިނާވެފައިވާ ބަދަހި ރަޙުމަތްތެރިކަމުގެ ގުޅުމެއް ކަމަށް އެ މަނިކުފާނު ފާހަގަކުރެއްވިއެވެ.

ރައީސް ވިދާޅުވީ ދެ ގައުމުންވެސް ގެންގުޅެނީ ތަރައްގީއާއި ފާގަތިކަމަށް އޮތް އެއްގޮތް ތަސައްވުރެއް ކަމަށާއި މި ގުޅުމުގެ ސަބަބުން ދެ ގައުމުގެ ރައްޔިތުންނަށްވެސް މާނަހުރި ގިނަ ފުރުސަތުތަކެއް ފަހިވަމުންދާ ކަމަށެވެ.

ރައީސް ވިދާޅުވީ ދެ ގައުމުގެ ދެމެދުގައި ގާއިމުކުރެވިފައިވާ އިސްތިރާޖީ ގުޅުން އިތުރަށް ބަދަހިކޮށް އާ ހަރުފަތަކަށް ގެންދިއުމަށް ދިވެހި ސަރުކާރުން އަބަދުވެސް ސާބިތުކަމާއެކު އޮންނާނެ ކަމަށެވެ.

ޗައިނާގެ ގައުމީ ދުވަހުގެ ގޮތުގައި ފާހަގަކުރަނީ އޮކްޓޫބަރު މަހުގެ ފުރަތަމަ ދުވަހެވެ. މި ދުވަހަކީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހެވެ.

ރާއްޖެއާއި ޗައިނާއާ ދެމެދު ސިޔާސީ ގުޅުން ގާއިމުކޮށްފައިވަނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ.