ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސް ނެންގެވުމުގެ މަތިން މި ސަރުކާރުން ފެށި ދިވެހި ވަތަނީ ހިދުމަތުގެ ޕްރޮގްރާމުގެ ތެރެއަށް ފަންނީ އިތުރު ދާއިރާތައް ތައާރަފުކޮށް، ނޭޝަނަލް ސާވިސްގެ އިންޓާންޝިޕް ޕްރޮގްރާމްތައް ތައާރަފު ކުރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިދިޔަ އަހަރުގެ އޮކްޓޫބަރުގެ މަހުގެ ފުރަތަމަ ދުވަހު ފެށި ދިވެހި ވަތަނީ ހިދުމަތުގެ ޕްރޮގްރާމަށް އަހަރު ފުރުމާ ގުޅިގެން ސޯޝަލް މީޑީއާގައި މިއަދު ހިއްސާކުރެއްވި ޕޯސްޓެއްގައެވެ.

ރައީސް ވިދާޅުވީ، ދިވެހި ޒުވާނުންގެ ކުރިމަގު ބައްޓަންކޮށް އުޖާލާކޮށްދިނުމުގެ މުޅީން އާ ރާސްތާއެއް ފަހިކޮށްދިނުމުގެ ނިޔަތާއި އުންމީދުން ފުރިގެންވި އަޒުމާއެކު މިދިޔަ އަހަރުގެ އޮކްޓޫބަރު މަހުގެ ފުރަތަމަ ދުވަހު މި ސަރުކާރުން ފެށި ދިވެހި ވަތަނީ ހިދުމަތަށް މިއަދަށް އެއް އަހަރު ފުރިފައިވާ ކަމަށެވެ.

މި މުނާސަބާގައި، ދިވެހި ވަތަނީ ހިދުމަތުގެ ތަމްރީނުތައް ފުރިހަމަކުރި ޒުވާނުންނަށާއި އާއިލާތަކަށް ތަހުނިޔާ ދަންނަވައި، ދިވެހި ވަތަނީ ހިދުމަތުގެ ކާމިޔާބު ހަރަކާތް ކުރިއަށް ގެންދިއުމުގައި ޝާމިލުވާ ހުރިހާ ފަރާތްތަކަށް ޝުކުރު އަދާކުރައްވާ ކަމަށްވެސް އެމަނިކުފާނު ވިދާޅުވެފައިވެއެވެ.

ރައީސް ވިދާޅުވީ، ދިވެހި ވަތަނީ ހިދުމަތުގެ ތެރެއިން ކޮންމެ އަހަރަކު އެއްހާސް ޒުވާނުން ތަމްރީނު ކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރުވެސް ހާސިލުކުރެވިފައިވާކަމަށެވެ.

ފާއިތުވެދިޔަ އެއް އަހަރު ވެގެންދިޔައީ، ޒުވާނުންނަށް ޓަކައި، ދިވެހި ވަތަނީ ހިދުމަތުގެ ތެރެއިން ކާމިޔާބު އަދި އުފެއްދުންތެރި މަސައްކަތްތަކެއް ކޮށްދެވުނު އެއް އަހަރަށް ކަމަށާއި، އަދި ނޭޝަނަލް ސާވިސް އިނީޝަލް ޓްރޭނިންގ ގެ ތެރެއިން 1028 ދިވެހި ޒުވާނުން ތަމްރީނު ކުރެވުނުއިރު، ނޭޝަނަލް ސާވިސް ސްކިލް ޓްރޭނިންގ ޕްރޮގްރާމުން 136 ޒުވާނުން ވަނީ ތަމްރީނު ކުރެވިފައިވާ ކަމަށްވެސް ވިދާޅުވިއެވެ.

މާތް ﷲ ގެ ހެޔޮ ރަހުމަތާއެކު ދިވެހި ވަތަނީ ހިދުމަތުގެ ކުރިމަގު އުޖާލާކޮށް ފެންނަމުންދާކަން ފާހަގަކުރައްވައި ރައީސް ވިދާޅުވީ، ނޭޝަނަލް ސާވިސްގެ ތެރެއަށް ފަންނީ އިތުރު ދާއިރާތައް ތައާރަފުކޮށް، ނޭޝަނަލް ސާވިސްގެ އިންޓާންޝިޕް ޕްރޮގްރާމްތައްވެސް ތައާރަފުކުރެވޭނެ ކަމަށެވެ. އަދި، ނޭޝަނަލް ސާވިސްގެ ތަމްރީނުތައް ފުރިހަމަކުރާ ޒުވާނުންނަށް ވަޒީފާގެ ފުރުސަތުތައް ފަހިކޮށްދިނުމަށް ކުރާ މަސައްކަތުގައި ނޭޝަނަލް ކެރިއާ ސާވިސްގެ ދައުރު ފުޅާކުރުމަކީ ސަރުކާރުގެ އަމާޒެއް ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.

ދިވެހި ވަތަނީ ހިދުމަތަކީ ރާއްޖޭގެ ޒުވާނުންގެ މުސްތަގުބަލު ބިނާކުރުމަށްޓަކައި، ގައުމީ ރޫހާއި އިސްލާމީ އަހުލާގު ދިރުވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފެއްޓެވި ޕްރޮގްރާމެކެވެ. ދިވެހި ޒުވާނުންގެ މެދުގައި ގައުމިއްޔަތުގެ ރޫހާއި ފަހުރު ދިރުވައި އާލާކޮށް، އިސްލާމްދީނަށް ލޯބިކުރާ، އަދި ގައުމަށް ހިދުމަތް ކުރުމުގެ ރޫހު ހުރި ރައްޔިތެއް ބިނާކުރުމަށް ކުރިއަށްގެންދާ މި ޕްރޮގްރާމުގެ ދަށުން ތިން ބެޗެއްގެ ތަމްރީނުތައް 1000 އަށްވުރެ ގިނަ ދަރިވަރުން ވަނީ ފުރިހަމަކޮށްފައެވެ.