ހިންދީ ސިނަމާގެ ހޮރޯ-ކޮމެޑީ ފްރެންޗައިޒް "ސްޓްރީ" ގެ ތިންވަނަ ފިލްމު 2028 ވަނަ އަހަރު ނެރޭނެ ކަމަށް، އެ ފިލްމުގެ ޕްރޮޑިއުސަރު ދިނޭޝް ވިޖަން ބުނެފިއެވެ.

މުމްބާއީގައި ކުރިއަށްދިޔަ ފިކީ ފްރޭމްސް އިވެންޓުގައި ވާހަކަދައްކަމުން ދިނޭޝް ބުނި ގޮތުގައި، ޑައިރެކްޓަރު އަމަރް ކޯޝިކް މިހާރު ވަނީ "ސްޓްރީ 3" ގެ ވާހަކަ ލިޔެ ނިންމާފައެވެ. ފިލްމުގެ ވާހަކައާ ގުޅޭ މާ ގިނަ ތަފްސީލުތަކެއް އޭނާ ނުދެއެވެ.

“ސްޓްރީ 3 އަންނާނީ 2028 ގައި. އިތުރު އެއްޗެއް ބުނެފި ނަމަ އަމަރް ހިތްހަމަނުޖެހޭނެ، ސަބަބަކީ އޭނާ ދާދި ފަހުން ސްކްރިޕްޓް ލިޔެ ނިންމާފައިވުން،” ދިނޭޝް ބުންޏެވެ. އަދި ފިލްމު ފެށޭ ގޮތާއި ނިމޭ ގޮތަކީ ބެލުންތެރިންނަށް ލިބޭނެ ބޮޑު ސަޕްރައިޒަކަށް ވާނެ ކަމަށް އޭނާ ފާހަގަކުރިއެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، އަމަރް ކޯޝިކް ދެން އެންމެ އަވަހަށް ޑައިރެކްޓްކުރާނީ ވިކީ ކޯޝަލް މެއިން ރޯލުން ފެނިގެންދާ ފިލްމު "މަހާވަތާރް" އެވެ. ދިނޭޝް ބުނި ގޮތުގައި އެ ފިލްމުގެ ޝޫޓިން އަންނަ ޖެނުއަރީން ފެށިގެން ޖޫން މަހުގެ ނިޔަލަށް ކުރިއަށްދާނެއެވެ. އަދި "ސްޓްރީ 3" ގެ ޝޫޓިން ފަށާނީ އަންނަ އަހަރުގެ ފަހުކޮޅު ކަމަށް އޭނާ ބުންޏެވެ.

ސްޓްރީ ފްރެންޗައިޒްގެ ފުރަތަމަ ފިލްމު 2018 ގައި ނެރެފައިވާއިރު، ދެވަނަ ފިލްމު ނެރެފައިވަނީ 2024 ގައެވެ. މި ފިލްމުތަކުގެ މެއިން ރޯލުން ފެނިގެންދިޔަ ރާޖްކުމާރް ރާއޯ އާއި ޝްރައްދާ ކަޕޫރު ތިންވަނަ ފިލްމުން ވެސް ފެނިގެންދާނެ ކަމަށް މީޑިއާތަކުން ބުނެއެވެ.

ފިލްމު ރިލީޒްކުރާނެ ވަކި ތާރީހެއް އަދި ރަސްމީކޮށް އިއުލާންކޮށްފައި ނުވި ނަމަވެސް، 2028 ވަނަ އަހަރުގެ އިންޑިއާގެ މިނިވަން ދުވަހާ ނުވަތަ ކްރިސްމަސްއާ ދިމާކޮށް ފިލްމު ނެރުމަކީ އެކަށީގެންވާ ކަމެއް ކަމަށް ދިނޭޝް ވަނީ ލަފާކޮށްފައެވެ.