ބާލާޖީ މޯހަން ޑައިރެކްޓުކޮށް، ޔާމީ ގޯތަމް ލީޑު ރޯލުން ފެނިގެންދާ ފެންޓަސީ ހޮރޯ-ކޮމެޑީ ފިލްމު "ނައްޔި ނަވެއްލި" ގެ ޓްރެއިލާ އާންމުކޮށްފިއެވެ.

މި ޓްރެއިލާއިން ފެންނަ ގޮތުގައި، ޔާމީ ކުޅެނީ މީރަތުގެ އާއިލާއަކަށް އަލަށް އަންނަ ފަހަރިއެއް ކަމަށްވާ މޯހިނީގެ ރޯލެވެ. އޭނާ އާއިލާއާ ގުޅުމަށްފަހު ގޭތެރެއަށް އުފާވެރިކަން ގެނެސްދޭ މަންޒަރު ޓްރެއިލާއިން ފެނެއެވެ. ނަމަވެސް، އޭނާގެ ޅިޔަނަށް ބައެއް ކަންކަން ގޯސްކޮށް ހިނގާކަން ފާހަގަވެ، މޯހިނީއަކީ ސިފަ ބަދަލުކޮށްގެން އުޅޭ "ޑާޔަން" އެއް (ސިހުރުވެރިއެއް) ކަމަށް ތުހުމަތުކުރަން ފަށައެވެ.

ޕްރޮމޯޝަނަލް ވީޑިއޯތަކުގައި މޯހިނީއަކީ އާދަޔާ ހިލާފު ބާރުތަކެއް ލިބިފައިވާ މީހެއްކަން ދައްކުވައިދިން ނަމަވެސް، އޭނާގެ އަސްލު ހަގީގަތަކީ ކޮބައިކަން ޓްރެއިލާގައި ކަށަވަރުކޮށްދީފައެއް ނުވެއެވެ. ބައެއް މީޑިއާތަކުންނާއި ސޯޝަލް މީޑިއާގައި މިއީ އިންޑިއާގެ ސަގާފީ ވާހަކަތަކުގައި އުޅޭ ރާވަނާއާ ގުޅުވައިގެން އުފައްދާފައިވާ ކެރެކްޓާއެއް ކަމަށް ބުނެފައިވީ ނަމަވެސް، ފިލްމުގެ އުފެއްދުންތެރިން މިކަން ރަސްމީކޮށް ކަށަވަރުކޮށްދީފައެއް ނުވެއެވެ. ޓްރެއިލާގައި ފެންނަނީ ހަމައެކަނި އާއިލާގެ ތެރޭގައި އުފެދޭ ޝައްކުތަކާއި، އޭގެ ސަބަބުން ދިމާވާ މަޖާ އަދި ބިރުވެރި ކަންތައްތަކެކެވެ.

https://youtu.be/NPkMecGOxDc?si=WgNUnOmnxjSAxR5G

މި ފިލްމާ ގުޅޭގޮތުން ނެރުނު ބަޔާނެއްގައި ޔާމީ ބުނީ، މޯހިނީގެ ކެރެކްޓާއަކީ ބެލުންތެރިން އުންމީދުކުރާ ފަދަ އާދައިގެ ކެރެކްޓާއަކަށް ނުވާނެ ކަމަށެވެ. އަދި އެ ރޯލުގެ ސަބަބުން އާއިލީ ގުޅުމާއި، މަޖާ، އަދި ފެންޓަސީ އެކުލެވޭ ތަފާތު އިހުސާސްތަކެއް ދައްކުވައިދިނުމުގެ ފުރުސަތު ލިބުނު ކަމަށް އޭނާ ފާހަގަކުރިއެވެ. މީގެ އިތުރުން، ފިލްމުގެ ވާހަކަ ކުރިއަށްދާއިރު މޯހިނީގެ ސިއްރުތައް މަޑުމަޑުން ހާމަވަމުންދާނެ ކަމަށް ވެސް ޔާމީ ބުނެފައިވެއެވެ.

މި ފިލްމުގައި ޔާމީގެ އިތުރުން އާދިނާތު އެމް ކޮތާރޭ، އަންރާގް ތާކުރް، ސުނީތާ ރާޖްވާރް އަދި މީތާ ވަސިޝްތު ފަދަ ތަރިން މުހިންމު ރޯލުތަކުން ފެނިގެންދާނެއެވެ. ފިލްމުގެ މިއުޒިކް ތައްޔާރުކޮށްދީފައިވަނީ ޖީވީ ޕްރަކާޝް ކުމާރެވެ.

އާނަންދު އެލް ރާއީ އަދި ހިމާންޝޫ ޝަރްމާ ޕްރޮޑިއުސްކުރާ މި ފިލްމު ސިނަމާތަކަށް ނެރުމަށް ހަމަޖެހިފައިވަނީ މިއަހަރުގެ އޮކްޓޯބަރު 16 ގައެވެ.