އޮސްޓްރޭލިއާގެ އަސްލު ވަޒަންވެރިންނާ ދެކޮޅަށް ގަތުލުއާންމު ހިންގަމުންދާ ކަމަށް ތުހުމަތުކޮށް، އިނގިރޭސި ރަސްގެފާނު ޗާލްސްއާ ދެކޮޅަށް އިންޓަނޭޝަނަލް ކްރިމިނަލް ކޯޓު (އައިސީސީ) އަށް މައްސަލައެއް ހުށަހަޅަން އޮސްޓްރޭލިއާގެ އަސްލު ވަޒަންވެރިންގެ އިސް މީހަކު ނިންމައިފިއެވެ.

މި މައްސަލަ އައިސީސީއަށް ހުށަހަޅަން ނިންމީ، ރަސްގެފާނު ޗާލްސްއާ ދެކޮޅަށް އޮސްޓްރޭލިއާގެ ކޯޓަކަށް ހުށަހެޅި މައްސަލަ، އެ ގައުމުގެ އެޕީލް ކޯޓުން ބޭރުކޮށްލުމާ ގުޅިގެންނެވެ.

އުމުރުން 68 އަހަރުގެ ރޮބީ ތޯޕް ބުނި ގޮތުގައި، އޮސްޓްރޭލިއާގެ ދައުލަތުގެ އެންމެ އިސްވެރިޔާގެ ހައިސިއްޔަތުން ރަސްގެފާނު ޗާލްސް އާއި އޮސްޓްރޭލިއާގެ މުއައްސަސާތަކުން ދަނީ އަސްލު ވަޒަންވެރިންނަށް ގެއްލުންވާ ފަދަ ނިޒާމުތަކެއް ދަމަހައްޓައި، ގަތުލުއާންމު ހިންގަމުންނެވެ. އޭނާ ބުނީ އޮސްޓްރޭލިއާގެ ކޯޓުތަކުން އިންސާފު ލިބޭނެ ކަމަށް ގަބޫލު ނުކުރާ ކަމަށާއި އެހެންކަމުން ނެދަލޭންޑްސްގައި ހުންނަ އައިސީސީއަށް މި މައްސަލަ ހުށަހަޅާނެ ކަމަށެވެ.

ވިކްޓޯރިއާ ސްޓޭޓްގެ ކޯޓް އޮފް އެޕީލްގެ ތިން ފަނޑިޔާރުންގެ ބެންޗަކުން މިދިޔަ ހޯމަ ދުވަހު މި މައްސަލަ ބޭރުކޮށްލި އިރު، މިއީ 2023 ވަނަ އަހަރުން ފެށިގެން ތޯޕް ކުރަމުންދާ މަސައްކަތުގައި އޭނާއަށް ކުރިމަތިވި ގާނޫނީ ތިންވަނަ ނާކާމިޔާބީއެވެ. މި ނިންމުމާއެކު، އޮސްޓްރޭލިއާގެ އެތެރޭގެ ކޯޓުތަކުން އޭނާއަށް އޮތް ހަމައެކަނި ފުރުސަތަކީ ހައިކޯޓުގައި އިސްތިއުނާފު ކުރުމުގެ ހުއްދައަށް އެދުމެވެ.

ތަފާސްހިސާބުތައް ދައްކާ ގޮތުން އޮސްޓްރޭލިއާގެ އާބާދީގެ ގާތްގަނޑަކަށް 4 ޕަސެންޓަކީ އަސްލު ވަޒަންވެރިންނެވެ. އަދި އެހެން ރައްޔިތުންނާ އަޅައި ބަލާއިރު، އެ މީހުންގެ ސިއްހީ ހާލަތު ދަށްވެފައި، ޖަލަށްލާ ނިސްބަތާއި ވަޒީފާ ނެތް މީހުންގެ ނިސްބަތް މަތިކަމަށް ރަސްމީ އިދާރާތަކުން ހާމަކޮށްފައިވެއެވެ.

ގާނޫނީ މާހިރުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، އިނގިރޭސި ރަސްގެފާނަށް ޖިނާއީ އަދި މަދަނީ ދައުވާތަކުން ފުޅާ ދާއިރާއެއްގައި ރައްކާތެރިކަން ލިބިވަޑައިގަންނަވައެވެ. އަދި އައިސީސީއަށް އަމިއްލަ ފަރުދުންނަށް ސީދާ ދައުވާ ހުށަނޭޅޭނެ ކަމަށާއި ކުރެވެން އޮންނަ ހަމައެކަނި ކަމަކީ ގަތުލުއާންމެއް ހިނގާފައިވާ ކަމަށް ގަބޫލުކުރެވޭ ހެކިތައް އެ ކޯޓުގެ ޕްރޮސެކިއުޓަރުގެ އޮފީހަށް ހުށަހެޅުން ކަމަށް މާހިރުން ފާހަގަ ކުރެއެވެ.