ސަރުކާރުގެ ހާއްސަ އެހީތެރިކަމާއެކު މިހާތަނަށް 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވިފައިވާ ކަމަށް ހެލްތު މިނިސްޓަރު ގީލާ އަލީ ވިދާލުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، ތެލެސީމިއާ ކުދިންނަށް ދާއިމީ ޝިފާއެއް ހޯދައިދިނުމަށްޓަކައި ޒަކާތު ފަންޑުން އެހީތެރިކަން ފޯރުކޮށްދިނުމާ ގުޅޭގޮތުން އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ސޮއިކުރި އެއްބަސްވުމުގެ ދަށުން ކޮންމެ އަހަރަކު ވަކި އަދަދެއްގެ ކުދިންނަށް ބޯންމެރޯ ޓްރާންސްޕްލާންޓް ހެދުމަށް މާލީ އެހީތެރިކަން ދިނުމަށް ހަމަޖެހިފައިވާ ކަމަށެވެ.

"އެ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް އެއީ ކޮންމެ ކުއްޖަކަށް އެއް މިލިއަން ރުފިޔާއަށް ވުރެ އިތުރުނުވާނެ ގޮތުގެ މަތީން ޖުމްލަ ދިހަ މިލިއަން ރުފިޔާ ހަރަދުކުރުމަށް ވަނީ ހަމަޖައްސާފައި،" ގީލާ ވިދާޅުވިއެވެ.

މިނިސްޓަރު ވިދާޅުވީ، އެ އެއްބަސްވުމުގެ ދަށުން މިހާތަނަށް 28 ކުއްޖެއް ބޯންމެރޯ ހެދުމަށް ފޮނުވައި ފަރުވާގެ ކަންކަން ކުރިއަށްދާ ކަމަށެވެ.

މިނިސްޓަރު އިތުރަށް ވިދާޅުވީ، ތެލެސީމިއާ ބަލި ތަހައްމަލުކުރަމުންދާ ކުދިންނަށް ދައުލަތުން ދެމުން އަންނަ މާލީ އިނާޔަތް އިތުރުކޮށްފައިވާ ކަމަށާއި، މިހާރު 500 އަށް ވުރެ ގިނަ ކުދިންނަށް އެ އެލަވަންސް ލިބެމުން އަންނަ ކަމަށެވެ.

ތެލަސީމިއާ ކުދިންނަށް ކުރިން ދެމުން އައީ 1000ރ ގެ އެލަވަންސެކެވެ. ނަމަވެސް މި ސަރުކާރުން ވަނީ އެ އެލަވަންސް 2000ރ އަށް ބޮޑުކޮށްފައެވެ.