އަމީނީ މަގު މަރާމާތު ކުރި ސަރަޙައްދު އާދިއްތަ ދުވަހު ހުޅުވާލަނީ

އަމީނީ މަގުގައި މަރާމާތުކުރުމުގެ މަސައްކަތް ކުރަމުންދިޔަ ސަރަހައްދު އަންނަ އާދިއްތަ ދުވަހު އާންމު ދަތުރުފަތުރަށް ހުޅުވާލަން ނިންމައިފިއެވެ.

ހައުސިން މިނިސްޓްރީން މިއަދު "ވަން" އަށް ބުނީ މިހާރު ކުރިއަށް ދަނީ އަމީނީ މަގުގެ އެންމެ ފަހުގެ މަސައްކަތްތައް ކަމަށާއި އަންނަ އާދިއްތަ ދުވަހު އާންމު ދަތުރުފަތުރަށް މަގު ހުޅުވާލާނެ ކަމަށެވެ.

އަމީނީ މަގުގެ ތާރުގަނޑު ހަލާކުވެގެން އެ މަގު ޒަމާނީ ފެންވަރަކަށް އަލުން މަރާމާތުކުރުމުގެ މަސައްކަތް އެމްޓީސީސީއާ ހަވާލުކުރީ މިއަހަރުގެ ޖޫން މަހުގެ ތެރޭގައެވެ.

މި މަޝްރޫއު އެކި ފިޔަވަހިތަކަކަށް ބަހާލައިގެން ކުރިއަށްގެންދާއިރު، އިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލު ކައިރީގައިވާ ޕާކާ ހަމައަށް ހިމެނޭ ފުރަތަމަ ސެގްމަންޓުގެ މަސައްކަތް ނިންމާލާފައިވަނީ މި ހިނގާ މަހުގެ 15 ވަނަ ދުވަހުއެވެ.

އޭގެ ފަހުން، ދެވަނަ ސެގްމަންޓުގެ އަމަލީ މަސައްކަތް މިމަހުގެ 23 ގައި ފަށައި، ކުރީގެ ބާ ތާރުފަށަލަ ނެގުމަށްފަހު އާ ތާރު އަޅައި ފުރިހަމަކޮށްފައިވަނީ މިދިޔަ ހޯމަ ދުވަހުއެވެ.

މަގުގެ ދެމެހެއްޓެނިވިކަން އިތުރުކުރުމަށްޓަކައި، މިފަހަރު ތާރު އަޅަމުން އަންނަނީ ދެ ފަށަލައަށެވެ.