ބޮލީވުޑްގެ ބަތަލާ އުރުވަޝީ ރައުޓޭލާގެ ނަމާއި ތަސްވީރުތައް ހުއްދަނެތި ބޭނުންކުރި ކަމަށް ބުނެ، އެމެރިކާގެ ލޮސް އެންޖެލިސްގެ އާޓިފިޝަލް އިންޓެލިޖެންސް (އޭއައި) ކުންފުންޏަކާ ދެކޮޅަށް ފިޔަވަޅު އަޅައި، ބަދަލުގެ ގޮތުގައި 7،000 ކްރޯޑު ރުޕީސް ހޯދުމުގެ މަސައްކަތް ފަށައިފިއެވެ.

އުރުވަޝީގެ ޓީމުން އިންސްޓަގްރާމްގައި އާންމުކުރި ބަޔާނެއްގައި ބުނި ގޮތުގައި، އެ ކުންފުނިން ވަނީ އޭނާގެ ހުއްދައަކާ ނުލައި އޭނާގެ ނަމާއި ވީޑިއޯތައް ބޭނުންކޮށްގެން ބިލިއަނުން ފައިދާ ހޯދާފައެވެ. ހުއްދަ ނެތި އުރުވަޝީގެ ނަން ވިޔަފާރީގައި ބޭނުން ނުކުރުމަށް އެ ޓީމުން ވަނީ އިންޒާރުދީފައެވެ. މި މައްސަލައިގައި ލިބުނު ގެއްލުމުގެ ބަދަލު 7،000 ކްރޯޑު ރުޕީސްއަށް އަރާނެ ކަމަށް އަންދާޒާ ކުރެވޭ ކަމަށާއި، އެކަމަށްޓަކައި ގާނޫނީ ފިޔަވަޅުތައް އަޅަމުން އަންނަ ކަމަށްވެސް އެ ބަޔާނުގައި ބުނެފައިވެއެވެ.

މި ތުހުމަތުތަކާ ގުޅިގެން، 'ބޮލީވުޑް.އޭއައި' އަދި 'ހޮލީވުޑް.އޭއައި' ގެ ބާނީ އަދި ސީއީއޯ ޝީރާޒް ހަސަން ވަނީ ރައްދު ދީފައެވެ. އޭނާ ބުނި ގޮތުގައި އުރުވަޝީގެ ޓީމުން ކުރާ ދައުވާއަކީ އެއްވެސް އަސާސެއް ނެތް ވާހަކަތަކެކެވެ.

ދާދި ފަހުން އުރުވަޝީ ދިން އިންޓަވިއުއަކަށް އިޝާރާތްކޮށް ޝީރާޒް ބުނީ، އުރުވަޝީ ނުބުނާ އެއްޗެއް އެ ކުންފުނިން އޭނާގެ ނަމުގައި ހަދައިގެން ބުނެފައި ނުވާނެ ކަމަށެވެ. މީގެ އިތުރުން، މުނިފޫހިފިލުވުމުގެ ދާއިރާގެ މުސްތަގުބަލުގައި އޭއައިގެ ދައުރާ ގުޅޭގޮތުން އުރުވަޝީ އިތުރަށް މައުލޫމާތު ހޯދުމަށް އޭނާ ވަނީ ލަފާދީފައެވެ.

ޝީރާޒް އިތުރަށް ފާހަގަކުރި ގޮތުގައި، އޭއައި މެދުވެރިކޮށް އުފައްދާ ފިލްމުތަކާއި ޑިޖިޓަލް ތަރިންނަކީ މުނިފޫހިފިލުވުމުގެ ސިނާއަތުގެ މުސްތަގުބަލެވެ. އެހެންކަމުން، މި ބަދަލުތަކާ ދެކޮޅުހެދުމުގެ ބަދަލުގައި އެކަން ގަބޫލުކުރުމަށް އޭނާ ވަނީ އުރުވަޝީއަށް ގޮވާލައިފައެވެ. މި މައްސަލައިގައި ދެ ފަރާތުން ބަހުގެ ހަމަލާތައް ބަދަލުކުރަމުން އަންނައިރު، އުރުވަޝީގެ ޓީމުން އަންނަނީ ގާނޫނީ ގޮތުން ކުރިއަށްދާނެ މަގުތައް ހޯދަމުން ކަމަށް އެ ޓީމުން ވަނީ ބުނެފައެވެ.