އެމެރިކާގެ މިޑްޓާމް އިންތިހާބާ ދިމާކޮށް، ރައީސް ޑޮނަލްޑް ޓްރަމްޕްގެ ސަރުކާރު ބަދަލުކުރުމަށް ގޮވާލައި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން އެމެރިކާގެ ރައްޔިތުންނަށް އަމާޒުކޮށް 25 ސަފުހާގެ ހުޅުވާލެވިފައިވާ ސިޓީއެއް އާންމުކޮށްފިއެވެ.

އެމެރިކާގެ ވޯޓުލާ މީހުންނަށް އަމާޒުކޮށް ޕީޑީއެފް ފޯމެޓުގައި އަންގާރަ ދުވަހު ނެރުނު މި ސިޓީގައި، ކޮރަޕްޓް ސިޔާސީ މީހުންގެ އަތުން ގައުމުގެ ކޮންޓްރޯލް އަނބުރާ ހޯދުމަށް އެމެރިކާގެ ރައްޔިތުންނަށް ވަނީ ގޮވާލައިފައެވެ. މިއީ އެމެރިކާގެ ސިޔާސީ ނިޒާމު އެންމެ ބަލިކަށިވެފައިވާ ވަގުތު ކަމަށް ސިފަކޮށް، ސަރުކާރުގެ ސިޔާސަތުތަކާ މެދު ސުވާލު އުފެއްދުމަށް އައިއާރްޖީސީން ވަނީ އެދިފައެވެ.

އަލްޖަޒީރާއާއި ރޮއިޓާސްއިން ރިޕޯޓުކޮށްފައިވާ ގޮތުގައި، އައިއާރްޖީސީގެ ސިޓީގައި ބުނެފައިވަނީ އީރާނުގެ ނިއުކްލިއާ ޕްރޮގްރާމާއި ހޮރުމުޒް ކަނޑުއޮޅީގެ ހާލަތާ ގުޅޭގޮތުން ޓްރަމްޕްގެ ސަރުކާރުން އެމެރިކާގެ ރައްޔިތުންނަށް އޮޅުވާލަމުންދާ ކަމަށެވެ. އީރާނާ ދެކޮޅަށް ކުރަމުންދާ ހަނގުރާމައިގައި އެމެރިކާއާއި އިސްރާއީލަށް އެއްވެސް ކާމިޔާބީއެއް ލިބިފައިނުވާ ކަމަށްވެސް އެ ސިޓީގައި ބުނެފައިވެއެވެ.

އައިއާރްޖީސީގެ ތަރުޖަމާނު ހުސައިން މުހިއްބީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވި ގޮތުގައި، މި ސިޓީގެ މަގުސަދަކީ އެމެރިކާގެ ސަރުކާރުގެ އަމަލުތަކުގެ ސަބަބުން ލިބެމުންދާ ގެއްލުންތައް އެ ގައުމުގެ ރައްޔިތުންނަށް ސާފުކޮށްދިނުމެވެ. އެމެރިކާގެ ރައްޔިތުންނަށް ހަގީގަތް އެނގޭ ނަމަ، އެ މީހުންގެ ވިސްނުން ބަދަލުވެ ސަރުކާރަށް ޕްރެޝަރު ކުރާނެ ކަމަށް އޭނާ ވިދާޅުވިއެވެ.

މީގެ އިތުރުން، އީރާނުން ބޭނުންކުރާ "އެމެރިކާއަށް މަރު" މި ޝިއާރަކީ އެމެރިކާގެ އާންމު ރައްޔިތުންނާ ދެކޮޅަށް ބޭނުންކުރާ ޝިއާރެއް ނޫން ކަމަށާއި، އެއީ ވައިޓް ހައުސްގައި ތިބި ސިޔާސީ ވެރިންނަށް އަމާޒުކޮށް ބޭނުންކުރާ ޝިއާރެއް ކަމަށްވެސް ސިޓީގައި ބަޔާންކޮށްފައިވާ ކަމަށް މުހިއްބީ ފާހަގަކުރެއްވިއެވެ.

ނޮވެންބަރު މަހު ބޭއްވުމަށް ހަމަޖެހިފައިވާ އެމެރިކާގެ މިޑްޓާމް އިންތިހާބަށް ފަސް ހަފުތާއަށް ވެފައިވާއިރު، އީރާނާއި އެމެރިކާއާ ދެމެދު އުފެދިފައިވާ މައްސަލަތަކަށް ހައްލެއް ހޯދުމަށް ނުސީދާ ގޮތެއްގައި މަޝްވަރާތައް ދަނީ ކުރިއަށެވެ.