އެޕަލްގެ އާ ސީއީއޯ ޖޯން ޓާނަސް މަގާމާ ހަވާލުވުމަށްފަހު، ކުންފުނީގެ ބައެއް ވަޒީފާތައް މަދުކޮށް، އާ އުފެއްދުންތައް ބާޒާރަށް ނެރުން އަވަސްކުރުމަށް މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ. މިދިޔަ ސެޕްޓެންބަރު މަހުގެ 1 ވަނަ ދުވަހު ޓިމް ކުކްގެ ބަދަލުގައި ސީއީއޯގެ މަގާމާ ހަވާލުވި ޓާނަސް ބޭނުންވަނީ، އާޓިފިޝަލް އިންޓެލިޖެންސް (އޭއައި) ގެ ޒަމާނުގައި އެޕަލްއަކީ ވާދަވެރި ކުންފުންޏެއްގެ ގޮތުގައި ދެމެހެއްޓުމަށް ކަމަށް ބްލޫމްބާގުން ރިޕޯޓުކޮށްފައިވެއެވެ. މީގެ ކުރިން އެޕަލްގެ ހާޑްވެއާ އިންޖިނިއަރިންގެ އިސްވެރިޔާގެ މަގާމުގައި ހުރި ޓާނަސް ސީއީއޯކަމާ ހަވާލުވީ، 15 އަހަރު ވަންދެން އެ މަގާމުގައި ހުރި ޓިމް ކުކް އެގްޒެކެޓިވް ޗެއާމަންގެ މަގާމަށް ބަދަލުވުމާ ގުޅިގެންނެވެ.

މި ބަދަލުތަކާ ގުޅޭގޮތުން އެޕަލްއިން ރަސްމީކޮށް ވަކި އެއްޗެއް ބުނެފައެއް ނުވެއެވެ. ނަމަވެސް ބްލޫމްބާގާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ކުންފުނީގެ ހާޑްވެއާ ޑިވިޝަނުން ގިނަ އަދަދެއްގެ އިންޖިނިއަރިން ޕްރޮގްރާމް މެނޭޖަރުންނާއި ޑިރެކްޓަރުން ވަނީ ދާދި ފަހުން ވަޒީފާއިން ވަކިކޮށްފައެވެ. ވަޒީފާ ގެއްލުނު މުވައްޒަފުންނަށް ކުންފުނީގެ އެހެން މަގާމެއް ހޯދަން މަދު ހަފުތާތަކެއް ދީފައިވާ ކަމަށާއި، އެހެން މަގާމެއް ނުލިބިއްޖެނަމަ މިއަހަރުގެ ފަހުކޮޅު އެ މީހުން ވަޒީފާއިން ވަކިކުރާނެ ކަމަށްވެސް ރިޕޯޓުތައް ބުނެއެވެ.

މީގެ އިތުރުން، އޭއައި މެދުވެރިކޮށް ކަސްޓަމަރުންނަށް ހިދުމަތް ދިނުމަށްޓަކައި އެޕަލްކެއާގެ 5،000 މުވައްޒަފުން ވަކިކުރުމަށް ކުރިން ރޭވި ނަމަވެސް، އެ ނިންމުން މިހާރު ބަދަލުކޮށްފައިވާ ކަމަށް ރިޕޯޓުތައް ބުނެއެވެ.

އުފެއްދުންތައް ނެރުމުގެ ސިޔާސަތެއް ގެންނަން އުޅޭ ބަދަލުތަކަށް ބަލާއިރު، ޓާނަސް ބޭނުންވަނީ ކޮންމެ އަހަރެއްގެ ވަކި ދެ މޫސުމެއްގައި އުފެއްދުންތައް ނެރުމަށް އޮންނަ އާދަ ދޫކޮށްލައި، އަހަރުގެ އެކި ދުވަސްވަރު އުފެއްދުންތައް ބާޒާރަށް ނެރެން ކަމަށްވެސް ހަބަރުތައް ބުނެއެވެ. މީގެ ބޭނުމަކީ ކުންފުނީގެ އާމްދަނީ އިތުރުކުރުމާއި، ވާދަވެރި މާހައުލުގައި އަވަހަށް އާ ޓެކްނޮލޮޖީތައް ތައާރަފުކުރުން ކަމަށް ރިޕޯޓުތަކުގައި ފާހަގަކޮށްފައިވެއެވެ.

ކުންފުނީގެ އެތެރޭގެ މަސައްކަތްތައް މިހާރު ކުރިއަށްދަނީ ވަރަށް ބާރު ސްޕީޑެއްގައި ކަމަށާއި، ކަންކަން ވަރަށް އަވަސްވެފައިވާ ކަމަށް އެތެރޭގެ މަސްދަރަކާ ހަވާލާދީ ބްލޫމްބާގުން ރިޕޯޓުކޮށްފައިވެއެވެ. މިކަންކަމާ ގުޅޭގޮތުން އެޕަލްގެ ރަސްމީ ބަހެއް އަދި ލިބިފައެއް ނުވެއެވެ.