ގައުމީ އެއާލައިން، މޯލްޑިވިއަންގެ ސީޕްލޭން ހިދުމަތް މެދުވެރިކޮށް މިހާތަނަށް 1.2 މިލިއަނަށްވުރެ ގިނަ ފަސިންޖަރުން ދަތުރުކޮށްފައިވާކަމަށް މޯލްޑިވިއަންގެ މެނޭޖިން ޑިރެކްޓަރު އިބްރާހިމް އިޔާޒް ވިދާޅުވެއްޖެއެވެ.

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ހުންނަ މޯލްޑިވިއަންގެ ސީޕްލޭން ޓާމިނަލްގެ ޖާގަ ދެގުނަ ބޮޑުކޮށް، ޒަމާނީ ބަދަލުތަކާއެކު އަލުން ހުޅުވުމަށް މިއަދު ބޭއްވި ރަސްމިއްޔާތުގައި އިޔާޒް ވިދާޅުވީ، ސަރުކާރުން މި ދާއިރާ ތަރައްގީކުރުމަށް ދޭ އަހައްމިއްޔަތުކަމުގެ ދަށުން މިދިޔަ އަހަރު ފެށި ޓާމިނަލް ތަރައްގީކުރުމުގެ މަސައްކަތް މިހާރު ކާމިޔާބުކަމާއެކު ނިންމާލެވިފައިވާ ކަމަށެވެ.

އެގޮތުން ކުރިން 10،000 އަކަފޫޓުގައި ހިންގަމުން އައި ޓާމިނަލްގެ ޖާގަ ދެގުނައަށް ބޮޑުކުރެވި، އެތެރެއާއި ބޭރުގެ ޑިޒައިނަށް ވަނީ ޒަމާނީ ބޮޑެތި ބަދަލުތަކެއް ގެނެސްފައެވެ. މީގެއިތުރުން، ޓާމިނަލްގައި ފަސިންޖަރުންނަށް ހިދުމަތް ދިނުމަށްޓަކައި ލައުންޖުގެ ޖާގަ ދެގުނަކޮށް، ކުޑަކުދިން ކުޅޭ ސަރަހައްދަކާއި، ލުއިކާނާއާއި ސުވެނިއާ ލިބޭނެ އިންތިޒާމުތައް ވަނީ ގާއިމުކޮށްފައެވެ. އަދި ބޯޑިން ގޭޓުތައް އިތުރުކުރުމުގެ އިތުރުން، ރާއްޖޭގެ ގުދުރަތީ މާހައުލާ ގުޅޭގޮތަށް ބޭރުގައި މަޑުކޮށްލެވޭނެ ހިތްގައިމު އައުޓްޑޯ ސަރަހައްދަކާއި، މުވައްޒަފުންނަށް ހާއްސަ ކެންޓީނެއްވެސް ވަނީ ހިމަނާފައެވެ.

އިޔާޒް ވިދާޅުވީ 2014 ވަނަ އަހަރުގެ އޭޕްރީލް މަހު އެންމެދެ ބޯޓުން ފެށި މި ހިދުމަތަކީ ރާއްޖޭގެ ދުރު ރަށްތަކާއި ރިސޯޓުތައް ވިއުގައަކުން ގުޅާލުމަށް އެޅުނު މުހިންމު ފިޔަވަޅެއް ކަމަށެވެ. އަދި 2015 ވަނަ އަހަރު ޓާމިނަލްގެ ހިދުމަތް ރަސްމީކޮށް ފެށިފަހުން، މިއަދު އެ ކުންފުނީގެ ފްލީޓުގައި 11 ޓުވިން އޮޓާ މަތިންދާބޯޓު އޮޕަރޭޓްކުރަމުން އަންނަކަން އޭނާ ފާހަގަކުރެއްވިއެވެ.

މިދިޔަ އޯގަސްޓް މަހު އެންމެ ފަހުގެ ޓުވިން އޮޓާ ކްލެސިކް 300ޖީ މަރުކާގެ 2 ބޯޓެއް ގަތުމަށް އޯޑަރު ދީފައިވާކަމަށް އިޔާޒް ވިދާޅުވިއެވެ. އަދި އަންނަ އަހަރުގެ ތެރޭގައި އެ ދެ ބޯޓު ރާއްޖެ ގެނެސް، އޮޕަރޭޝަންތަކުގައި ބޭނުންކުރަން ފެށުމަށް ހަމަޖެހިފައިވާކަމަށް އޭނާ ވިދާޅުވިއެވެ.