ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއުގެ ކޮންޓްރެކްޓް ވީހާވެސް އަވަހަކަށް ރައްޔިތުންގެ މަޖިލީހަށް ފޮނުވުމަށް، އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ސަރުކާރަށް ލަފާދެއްވައިފިއެވެ.

އެކްސްގައި މިއަދު ކުރެއްވި ޕޯސްޓެއްގައި ނަޝީދު ވިދާޅުވި ގޮތުގައި، ބޭރު މީހުންނަށް ރާއްޖެއިން ދިގު މުއްދަތަކަށް ހުރެވޭނެ އިންތިޒާމު ހަމަޖެއްސުމަކީ ގޯސް ކަމެއް ނޫނެވެ. އެމަނިކުފާނު ވިދާޅުވީ، "އުސޫލީގޮތުން ރެސިޑެންސީ ޕްރޮގްރާމަކަށް ރާއްޖެ ހުޅުވާލުމަކީ ރަނގަޅު ކަމެއް” ކަމަށެވެ. ނަމަވެސް، މި މަޝްރޫއާ ގުޅޭ އެއްބަސްވުން ސިއްރުކޮށްފައި އޮތުމަކީ ކަންބޮޑުވުމެއް ކަމަށް ފާހަގަކުރައްވައި، "އީގަލް ހިލްސްގެ ކޮންޓްރެކްޓް އަދި އެއް ނުފެނޭ، ހާމައެއް ނުކުރޭ" ކަމަށް ވިދާޅުވިއެވެ.

މި މަޝްރޫއާ ގުޅޭގޮތުން މިހާތަނަށް ލިބިފައިވާ މައުލޫމާތަށް ބިނާކޮށް މައިގަނޑު ދެ މައްސަލައެއް އޮތް ކަމަށް ނަޝީދު ފާހަގަކުރެއްވިއެވެ. އެގޮތުން، "މިހާތަނަށް އިވުނު ވާހަކަތަކުން އަޅުގަނޑަށް އޮތީ ދެ މައްސަލައެއް؛ 1. އެޑްވާންސް ފައިސާ ނުލިބުން. 2. މާލެ ސަރަހައްދުގައި އެ ތަން ހަދާކަން" ކަމަށް އެ ޕޯސްޓުގައި ލިޔުއްވާފައިވެއެވެ.

މި ކަންބޮޑުވުންތަކަށް ހައްލު ހޯދުމުގެ ގޮތުން، ސަރުކާރަށް އެންމެ ރަނގަޅު ގޮތަކީ ކޮންޓްރެކްޓް އަވަހަށް މަޖިލީހަށް ފޮނުވުން ކަމަށް ނަޝީދު ލަފާދެއްވިއެވެ. އަދި "މި ސަރުކާރުގެ އަގުލަބިއްޔަތުން މި މަޝްރޫއަށް ބޭނުންވާ ގާނޫނީ އޮނިގަނޑު ފާސްކުރުން" މުހިންމު ކަމަށް ވެސް އެމަނިކުފާނު ވިދާޅުވިއެވެ.

ރަސްމާލެ މަޝްރޫއުގެ ދަށުން ހިއްކާ ބިމުގެ ތެރެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް 99 އަހަރަށް ދޭން ސަރުކާރުން ވަނީ ނިންމައިފައެވެ.

ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގުމަށް ހަމަޖެހިފައިވާ 20 ބިލިއަން ޑޮލަރުގެ ބިޔަ މަޝްރޫއުގެ ދަށުން ޒަމާނީ މެރީނާއަކާއި ދުނިޔޭގެ ފެންވަރުގެ ވޯޓަފްރަންޓް ސިޓީއެއް ތަރައްގީކުރުމަށް ހަމަޖައްސާފައިވެއެވެ.