ރަސްމާލޭގައި ހިންގުމަށް ހަމަޖެހިފައިވާ މަޝްރޫއު ކުރިއަށް ގެންދާނީ ރާއްޖޭގެ ގާނޫނުއަސާސީ އާއި ގާނޫނުތަކާ އެއްގޮތަށް ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެއެވެ.

ރަސްމާލެ 99 އަހަރަށް ބޭރުގެ ބަޔަކަށް ދިނުމަކީ ދާއިމީކޮށް އެ ބިން ވިއްކާލުން ކަމަށާއި އެކަން ހުއްޓާނުލައިފި ނަމަ ސަރުކާރު ބަދަލުވުުމާ އެކު އުޝާމް ހިމެނޭހެން އެކަމުގައި ބައިވެރިވި ސަރުކާރުގެ އިސްވެރިންނަށް އަދަބުދޭނެ ކަމުގެ އިންޒާރު ކުރީގެ ރައީސް އަބްދުﷲ ޔާމީން އާދިއްތަ ދުވަހުގެ ރޭ ދެއްވުމާ ގުޅިގެން އެކްސްގައި މިއަދު ކުރެއްވި ޕޯސްޓެއްގައި އުޝާމް ވިދާޅުވީ، ރިސޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައި ވަނީ ރައީސް ޔާމީންގެ ވެރިކަމުގައި ކަމަށެވެ.

އުޝާމް ވިދާޅުވީ، ރާއްޖޭގައި ޓޫރިޒަމާ ބެހޭ ގާނޫނު އެންމެ ފުރަތަމަ އެކުލަވާލާފައި ވަނީ 1999 ވަނަ އަހަރު ކަމަށާއި އެ ގާނޫނުގެ ދަށުން ކުރިން ރިސޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަށް ކަމަށެވެ. އެ މުއްދަތު އިތުރުކުރީ ކުރީގެ ސަރުކާރުތަކުން ކަމަށް އުޝާމް ވިދާޅުވިއެވެ.

"އެގޮތުން 2010 ވަނަ އަހަރު ރައީސް މުހައްމަދު ނަޝީދުގެ ވެރިކަމުގައި އެ މުއްދަތު 50 އަހަރަށް ބަދަލުކުރި. އޭގެ ފަހުން 2015 ވަނަ އަހަރު ރައީސް އަބްދުﷲ ޔާމީންގެ ވެރިކަމުގައި ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް އިތުރުކޮށްފައިވާކަން ފާހަގަކުރެވޭ." އުޝާމް ވިދާޅުވިއެވެ.

އުޝާމް ވިދާޅުވީ، ޓޫރިޒަމާބެހޭ ގާނޫނުގެ 8 ވަނަ މާއްދާގައިވާ ގޮތުން ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓެއްގެ އަގުން ބާކީ ބައި ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަން ޖެހޭނެއެވެ.

"މިއާ ހިލާފަށް ރަސްމާލޭގައި ހިންގުމަށް ރާވާފައިވާ މަޝްރޫއު ގަވާން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން" އުޝާމް ވިދާޅުވިއެވެ.

އުޝާމް ވިދާޅުވީ، މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަަމައެކަނި ލެޓާ އޮފް އިންޓެންޓް (ކޮމާޝަލް ޓާމްސް އެގްރީމެންޓް) އެއްގައި ކަމަށާއި މަޝްރޫއު ފެށުމުގެ ކުރިން މި އެގްރީމެންޓްގައިވާ ޓާމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން މިކަމާ ގުޅުންހުރި ގާނޫނުތައް މަޖިލީހުން ފާސްކުރަން ޖެހޭނެ ކަމަށެވެ.

"މި މަޝްރޫއު ކުރިއަށް ގެންދިއުމުގެ ދިވެހިރާއްޖޭގެ ގާނޫނުއަސާސީ އާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ،" އުޝާމް ވިދާޅުވިއެވެ.

ރަސްމާލެ މަޝްރޫއުގެ ދަށުން ހިއްކާ ބިމުގެ ތެރެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް 99 އަހަރަށް ދޭން ވަނީ ނިންމައިފައެވެ.

ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގުމަށް ހަމަޖެހިފައިވާ 20 ބިލިއަން ޑޮލަރުގެ ބިޔަ މަޝްރޫއުގެ ދަށުން ޒަމާނީ މެރީނާއަކާއި ދުނިޔޭގެ ފެންވަރުގެ ވޯޓަފްރަންޓް ސިޓީއެއް ތަރައްގީކުރުމަށް ހަމަޖައްސާފައިވެއެވެ.