ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ހަދާފައިވާ އެއްބަސްވުމުގެ ދަށުން ރަސްމާލެ އިން އީގަލް ހިލްސް ކުންފުންޏަށް ބޮޑު ބިމެއް ދިން މައްސަލަ އެންޓިކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.

ރަސްމާލެ މަޝްރޫއުގެ ދަށުން ހިއްކާ ބިމުގެ ތެރެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް 99 އަހަރަށް ދޭން ވަނީ ނިންމައިފައެވެ.

އެ މައްސަލައިގައި ކޮރަޕްޝަން ހިމެނޭ ކަމަށް ބުނެ އެ މައްސަލަ އޭސީސީއަށް ހުށަހެޅީ، އަމިއްލަ ފަރާތެއް ކަމަށްވާ އިދިކޮޅު އެމްޑީޕީގައި އިސްކޮށް ހަރަކާތްތެރިވާ އަހުމަދު ސަލީމް (މާޒް ސަލީމް) އެވެ.

މި މައްސަލައިގައި ބުނެފައިވަނީ، ރައްޔިތުންގެ ޓެކްސް ފައިސާއިން ބޮޑު ހޭދައެއް ކޮށްގެން ހިއްކާ ބިމުން ބޮޑު ބައެއް ބޭރުގެ ކުންފުންޏަކަށް ދިނުމަކީ ރާއްޖޭގެ މިނިވަންކަމާއި އިސްތިގުލާލަށް އޮތް ނުރައްކަލެއް ކަމަށެވެ.

އޭސީސީއަށް ހުށަހެޅި މައްސަލައިގައި ފާހަގަކޮށްފައި ވަނީ، ރަސްމާލެ މަޝްރޫއަކީ ދެފުށް ފެންނަ ގޮތެއްގައި ހިންގާ މަޝްރޫއެއް ނޫން ކަމަށެވެ.

މިގޮތުން މި މަޝްރޫއު އީގަލް ހިލްސްއާ ހަވާލު ކުރި ގޮތާއި ބިޑް ކުރުމުގެ ފުރުސަތު ހުޅުވާލި ގޮތެއް ސަރުކާރުން ހާމަކޮށްފައި ނުވާކަން ވަނީ ފާހަގަކޮށްފައެވެ. އަދި މި މަޝްރޫއާ ގުޅޭގޮތުން ހައުސިން މިނިސްޓަރު ޑރ. އަބްދުﷲ މުއްތަލިބު ދެއްވާ މައުލޫމާތާއި އީގަލް ހިލްސް ކުންފުނިން ނެރުނު ބަޔާނުގައި ބޮޑެތި ފުށުއެރުންތަކެއް ހުރިކަން ވެސް ވަނީ ފާހަގަކޮށްފައެވެ. މިނިސްޓަރު ވިދާޅުވީ މަޝްރޫއުގެ އަގަކީ 20 ބިލިއަން ޑޮލަރު ކަމަށެވެ. ނަމަވެސް އީގަލް ހިލްސްގެ ބަޔާނުގައި ވަނީ އެއީ 12 ބިލިއަން ޑޮލަރުގެ މަޝްރޫއެއް ކަމަށް ވެސް އެ މައްސަލައިގައި ބުނެފައިވެއެވެ.

މީގެ އިތުރުން، ބިމުގެ މިލްކުވެރިކަމާ ގުޅޭގޮތުން ވެސް ބޮޑެތި ކަންބޮޑުވުންތަކެއް ވަނީ ފާޅުކޮށްފައެވެ. ސަރުކާރުން ބުނަމުންދަނީ ބިމުގެ މިލްކުވެރިކަން ދައުލަތަށް އޮންނާނެ ކަމަށެވެ. ނަމަވެސް އީގަލް ހިލްސްގެ ބަޔާނުގައި ބުނެފައިވަނީ، އެތަނުން ޕްރޮޕަޓީއެއް ވިއްކާލާ ކޮންމެ ފަހަރަކު ނުވަތަ ވާރިސުންނަށް ބަދަލުވާ ކޮންމެ ފަހަރަކު 99 އަހަރުގެ މުއްދަތު އަލުން އިއާދަވާނެ ކަމަށް ވެސް އެ މައްސަލައިގައި ބުނެފައިވެއެވެ.

މި މައްސަލަ އޭސީސީއަށް ހުށަހެޅުމަށްފަހު، މައްސަލަ ހުށަހެޅުމުގައި އިސްކޮށް އުޅުއްވި މާޒް ސަލީމްގެ އިތުރުން ރައްޔިތުންގެ މަޖިލީހުގެ ކުރީގެ ދެ މެންބަރުން ކަމަށްވާ، މާފަންނު މެދު ދާއިރާގެ ކުރީގެ އެމްޑީޕީ މެންބަރު އިބްރާހިމް ރަޝީދު (ބޮންޑެ) އާއި ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވެސް ވަނީ އެ މައްސަލައާ ބެހޭގޮތުން ވާހަކަ ދައްކަވައިފައެވެ.