ސަލާމަތީ ކަންތައްތައް ބަލަހައްޓާ އަމިއްލަ ކުންފުނިތަކުން ދޭ ހިދުމަތްތައް މިހާރަށް ވުރެ ބޮޑަށް ޕްރޮފެޝަނަލް ހިދުމަތަކަށް ހެދުމަށް ސަރުކާރުން ފުރިހަމައަށް އެހީތެރިވެދޭނެ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.

މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ، މަފްސީއިން އިންތިޒާމުކޮށްގެން ބޭއްވި ސޭފްޓީ އެންޑް ސެކިއުރިޓީ ކޮންފަރެންސް މޯލްޑިވްސް 2026 ފެށުމަށް ބާސެލޯ ނަސަންދުރާގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ކުއްލި ހާދިސާއެއް ދިމާވާ ހިނދު އެންމެ ފުރަތަމަ ހަރަކާތްތެރިވާ ފަރާތްތަކަކީ ސަލާމަތީ ކަންކަން ބަލަހައްޓާ ފަރާތްތައް ކަމަށާއި އެ މީހުންނަކީ އެއީ ގައުމީ ސަލާމަތާއި ރައްކާތެރިކަމުގެ އޮނިގަނޑުގައި މުހިންމު ދައުރެއް އަދާކުރާ ބައެއް ކަމަށެވެ.

މިނިސްޓަރު ވިދާޅުވީ، ސެކިއުރިޓީގެ ދާއިރާ ކުރިއެރުވުމަށްޓަކައި މުވައްޒަފުންނަށް ވަރުގަދަ ތަމްރީނުތަކެއް ދޭންޖެހޭ ކަމަށާއި ގާބިލުކަން ވަޒަން ކުރެވޭނެ ހަރުދަނާ މިންގަނޑުތަކާއި ޕްރޮފެޝަނަލް އަހުލާގީ އުސޫލުތަކެއް ކަނޑައަޅަން ވެސް ޖެހޭ ކަމަށެވެ.

މިނިސްޓަރު ވިދާޅުވީ، ޕްރައިވެޓް ސެކިއުރިޓީ ދާއިރާގައި މަސައްކަތް ކުރާ މުވައްޒަފުންނަށް އެކަށީގެންވާ ސެޓްފިކެޓް ދޭނެ ނިޒާމެއް ގާއިމުކޮށް، އެ މީހުންނަށް ކެރިއާ ބިނާކުރުމުގެ ފުރުސަތުތައް ހޯދައިދޭން ޖެހޭ ކަމަށެވެ.

"އަޅުގަނޑު މިއަދު ތިޔަބޭފުޅުންނަށް (މަފްސީއަށް) މިދެނީ މިކަމަށް އަޅުގަނޑުމެން (ހޯމްލޭންޑް މިނިސްޓްރީން) އެހީތެރިވާނެ،" މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، ޕްރައިވެޓް ސެކިއުރިޓީގެ ދާއިރާއަށް މީހުންގެ އިތުބާރު ހޯދުން މުހިންމު ކަމަށާއި ހާއްސަކޮށް ޓޫރިޒަމް އިންޑަސްޓްރީގައި މަސައްކަތް ކުރާ ސެކިއުރިޓީ އޮފިސަރުންނަކީ ހަމައެކަނި ދޮރެއްގެ ކައިރީގައި ކޮޅަށް ހުންނަ ބައެއްގެ ގޮތުގައި ނުދެކި، ކުއްލި ހާދިސާތަކުގައި އަމަލު ކުރާނެ ގޮތާއި އިމަޖެންސީ ރެސްޕޮންސްގެ ކަންކަން ރަނގަޅަށް ދަންނަ ބަޔަކަށް ވާން ޖެހޭނެ ކަމަށެވެ.