ކުރީގެ ރައީސް އަބްދުﷲ ޔާމީން އަބްދުލްގައްޔޫމްއާ ދެކޮޅަށް ދައުލަތުން ދައުވާ ކޮށްގެން ހިންގަމުންދާ ދެ ހިޔާނާތުގެ މައްސަލައެއްގެ އަޑުއެހުންތައް، އަހަރަކަށްފަހު ކުރިމިނަލް ކޯޓުގައި މިއަދު ފަށައިފިއެވެ.

މި މައްސަލައަކީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ޔާމީން ރިޝްވަތު ނަންގަވައި، ލިބިވަޑައިގެންނެވި ފައިސާ ލޯންޑަކުރެއްވި ކަމަށް ތުހުމަތުކުރާ މައްސަލައެވެ.

މި މައްސަލައިގައި ހިމެނެނީ ރިޝްވަތު ގަބޫލު ކުރުމާއި މަނީލޮންޑަރިންގެ ކުށުގެ ދައުވާއެވެ.

އާރަށް މައްސަލައިގެ އަޑުއެހުންތައް ކުރިމިނަލް ކޯޓުގައި ހުއްޓިފައި އޮތީ، ދައުލަތުން ހުށަހެޅި ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމް ދައުލަތުން ސުޕްރީމް ކޯޓުގައި އިސްތިއުނާފް ކުރުމާ ގުޅިގެންނެވެ. ނަމަވެސް ސުޕްރީމް ކޯޓުން ވަނީ، ހައި ކޯޓުގެ ހުކުމް ދަމަހައްޓައި، ދައުލަތުން ފަހުން ހުށަހެޅި ހެކިތައް ބަލައި ނުގެނެވޭނެ ކަމަށް މިދިޔަ ޖުލައި މަހު ހުކުމްކޮށްފައެވެ.

ރ. ފުއްގިރި ކުއްޔަށް ދޫކުރުމުގައި ރިޝްވަތު ހިފިކަމަށާއި މަނީ ލޯންޑަރިން ހިންގިކަމަށް ތުހުމަތުކޮށް، ކުރީގެ ރައީސް އަބްދުﷲ ޔާމީން އަބްދުލްގައްޔޫމާ ދެކޮޅަށް ހިންގާ ޝަރީއަތުގެ އަޑުއެހުމެއް ވެސް މިމަހު 23 ވަަނަ ދުވަހަށް ތާވަލް ކުރިއެވެ.

ނަމަވެސް ދައުލަތުގެ ވަކީލުން ބަލިވެ އުޅޭތީ، އެ ދުވަހުގެ އަޑުއެހުން ކެންސަލް ކުރިއެވެ.

މި މައްސަލައަކީ ފުއްގިރި މުއާމަލާތުގެ ތެރެއިން އެއް މިލިއަން ޑޮލަރުގެ ރިޝްވަތު ނަންގަވައި، އެ ފައިސާ ލޯންޑާ ކުރިކަމަށް ބުނެ ޔާމީންގެ މައްޗަށް އުފުލާފައިވާ ދައުވާތަކެކެވެ. މައްސަލައިގެ ހެކިބަސް ނެގުން މިހާރު އެއްކޮށް ނިމިފައިވާ އިރު، ޝަރީއަތް ހުއްޓިފައި އޮތީ ހެކިންނާއި ހެއްކާ ބެހޭގޮތުން ވާހަކަދެއްކުމުގެ މަރުހަލާގައެވެ.