ދުނިޔޭގެ ރެކޯޑެއް މުގުރާލުމަށްޓަކައި ނައިޖީރިއާގެ ނެށުންތެރިއެއް ކަމަށްވާ ބެންޖަމިން ޑެނިއަލް (ބެންޑާންސަރ) މެދުނުކެނޑި ހަތް ދުވަހު ނެށުމުގެ ހަރަކާތެއް ފަށައިފިއެވެ.

ނައިޖީރިއާގެ ލާގޯސްގެ ފްރީޑަމް ޕާކުގައި ކުރިއަށްދާ މި ހަރަކާތުގައި އޭނާގެ އަމާޒަކީ 168 ގަޑިއިރު ވާންދެން މެދުނުކެނޑި ނެށުމެވެ. މިއީ މިހާރު ގިނިސް ވޯލްޑް ރެކޯޑްސްގައި މި ރެކޯޑު އޮތް މިންވަރަށްވުރެ 41 ގަޑިއިރު އިތުރު އަދަދެކެވެ. މިހާރު މި ރެކޯޑު އޮންނަނީ 2023 ވަނަ އަހަރު 127 ގަޑިއިރު ވާންދެން ނަށައިގެން ރެކޯޑު ހެދި އިންޑިއާގެ ނެށުންތެރިއެއް ކަމަށްވާ ސްރުޝްޓީ ސުދީރް ޖަގްތާޕްގެ އަތުގައެވެ.

ބީބީސީން ރިޕޯޓުކޮށްފައިވާ ގޮތުގައި، ބެންޑާންސަރގެ މި ހަރަކާތުގައި އޭނާ ނަށަމުން އަންނަނީ އެފްރޯބީޓްސް، ފޫޖީ އަދި ޖޭޒް ފަދަ މިޔުޒިކަށެވެ.

ގިނިސް ވޯލްޑް ރެކޯޑްސްގެ ގަވާއިދުތަކާ އެއްގޮތަށް، ކޮންމެ ގަޑިއިރަކު އޭނާއަށް ފަސް މިނެޓުގެ ރެސްޓެއް ލިބެއެވެ. އުމުރުން 33 އަހަރުގެ ބެންޑާންސަރ ބުނި ގޮތުގައި، މި ހަރަކާތުގެ ބޭނުމަކީ ހަމައެކަނި ރެކޯޑެއް ހެދުމެއް ނޫނެވެ. އޭގެ ބަދަލުގައި، އެފްރިކާގެ ނެށުމުގެ ސަގާފަތާއި ޒުވާނުންގެ ހިތްވަރު ދައްކުވައިދިނުން ވެސް މަގުސަދުގެ ތެރޭގައި ހިމެނޭކަމަށް އޭނާ ބުންޏެވެ. އޭނާގެ ޓީމުން މައުލޫމާތުދޭ ގޮތުގައި، މިކަމަށް ތައްޔާރުވުމުގެ ގޮތުން އޭނާ ވަނީ ކެއުމަށް ބަދަލުގެނެސް، ހާއްސަ ކަސްރަތުތަކެއް ކޮށްފައެވެ.

މި ހަރަކާތް ބަލައި، އޭނާއަށް ހިތްވަރު ދިނުމަށް ގިނަ އަދަދެއްގެ ބަޔަކު ފްރީޑަމް ޕާކަށް ޖަމާވަމުންދެއެވެ.

މީގެ ކުރިން 2023 ވަނަ އަހަރު ނައިޖީރިއާގެ ކައްކާއެއް ކަމަށްވާ ހިލްޑާ ބާސީ ވަނީ 93 ގަޑިއިރު ވާންދެން މެދުނުކެނޑި ކައްކައިގެން ގިނިސް ވޯލްޑް ރެކޯޑެއް ހަދާފައެވެ. އެއަށްފަހު ނައިޖީރިއާގައި މިފަދަ ރެކޯޑުތައް ހެދުމަށް މަސައްކަތްކުރާ މީހުންގެ އަދަދު ވަނީ އިތުރުވެފައެވެ. ނަމަވެސް، ބެންޑާންސަރގެ މި ހަރަކާތަކީ ރަސްމީ ރެކޯޑެއްގެ ގޮތުގައި ބަލައިގަންނާނެ ކަމެއްތޯ ގިނިސް ވޯލްޑް ރެކޯޑްސްއިން އަދި ކަށަވަރުކޮށްދީފައެއް ނުވެއެވެ. އޭނާގެ މި ހަރަކާތް ނިމުމުން، ރެކޯޑު ލިބުނުކަން ކަށަވަރުވާނީ ގިނިސްގެ ރަސްމީ ފަރާތްތަކުން އެކަން އިއުލާންކުރުމުންނެވެ.