ގަވާއިދާ ހިލާފަށް ވިލިމާލެ ފަޅު ބޭނުން ކުރަމުންދިޔަ 12 އުޅަނދެއް ޖޫރިމަނާކޮށްފިއެވެ.

މާލޭ ސިޓީ ކައުންސިލުން މިއަދު ބުނީ ވިލިމާލެ ފަޅުތެރެ ތަރުތީބުކޮށް ބެލެހެއްޓުމަށް ކުރިއަށްގެންދާ މަސައްކަތުގެ ތެރެއިން، ގަވާއިދާ ހިލާފަށް ފަޅު ބޭނުން ކުރަމުންދިޔަ 12 އުޅަނދެއް ޖޫރިމަނާ ކޮށްފައިވާ ކަމަށެވެ.

މި އުޅަނދުތަކަކީ ގަވާއިދުން ހުއްދަ ނަގައިގެން ފަޅު ބޭނުންކުރާ ފަރާތްތަކަށް ދަތިވާގޮތަށް، އުސޫލުތަކާ ހިލާފަށް ފަޅުތެރޭގައި ބާއްވާފައިވާ އުޅަނދުތަކެއް ކަމަށްވެސް ސިޓީ ކައުންސިލުން ބުންޏެވެ.

ފަޅުތެރޭގެ ތަރުތީބު ގެއްލޭގޮތަށް ހުރި އުޅަނދުތަކާ މެދު ފިޔަވަޅު އަޅަން ފަށާފައިވަނީ ފަޅު ބޭނުންކުރާ އެހެން ފަރާތްތަކަށް ކުރިމަތިވާ ދަތިތަކަށް ހައްލެއް ހޯދައިދިނުމުގެ ގޮތުން ކަމަށްވެސް ސިޓީ ކައުންސިލުން ބުންޏެވެ.

ވިލިމާލޭގެ ފަޅަކީ މާލެ ސިޓީ ކައުންސިލްގެ ބެލުމުގެ ދަށުން ބަލަހައްޓަމުން އަންނަ ސަރަހައްދެކެވެ.

ކައުންސިލުން ވަނީ ފަޅު ބޭނުންކުރުމުގައި ކަނޑައެޅިފައިވާ ގަވާއިދުތަކަށް ހުރިހާ ފަރާތްތަކުން ވެސް އިހުތިރާމް ކުރުމަށް އިލްތިމާސްކޮށްފައެވެ.